នៅក្នុងកិច្ចសម្ភាសជាមួយនឹងសារព័ត៌មានថ្មីៗ លោក សុខហៀង បានរៀបរាប់ពីប្រវត្តិនៃការប្រលូកក្នុងវិស័យកីឡាប្រណាំងទូក ដោយនិយាយថា លោកចងចាំបណ្តាំរបស់ឪពុកដែលជាអ្នកស្រលាញ់លើទូកអ៊ុំ មួយរូប បណ្តាលឱ្យលោកមានចិត្តចង់បានទូក មួយគ្រឿងដើម្បីចូលរួមប្រលងប្រណាំង។
 

«ពីអតីតកាល តាំងពីសព្វរបស់ឪពុកខ្ញុំមក គឺខ្ញុំមិនដែលចាប់អារម្មណ៍លើរឿងនេះនោះទេ កាលនោះ ឪពុកជាអ្នកលេងទូក ចែវ ហើយគាតក៏ចូលចិត្តទូកអ៊ុំ។ តែដល់ពេលខ្ញុំបានបំពេញការងារតំណាងឱ្យក្រុមហ៊ុនមួយនៅខេត្តព្រះវិហារ ខ្ញុំក៏បានទៅជួបជាមួយនឹងជាងធ្វើទូក តាមពិតទៅកាលនោះខ្ញុំគ្មានចំណងអ្វីទេ ប៉ុន្តែតម្លៃទូកមួយកាលនោះក៏រៀងធូរថ្លៃ រួមតាំងមានចិត្តចង់ទិញ និងមានបណ្តាំពីឪពុកមក ខ្ញុំក៏សម្រេចចិត្តទិញ។ […] ពីដំបូងឆ្នាំ ២០១០ យកតែទូកខ្លីមួយមកទេ ដើម្បីបន្តឈ្មោះសារាយសែនជ័យដែលបានបាត់មុខ រហូតបណ្តាលចិត្តឱ្យកសាងទូក ង វែងបន្ថែមទៀត។»។ នេះបើតាមសម្តីរបស់លោក សុខហៀង ស្ថាបនិកទូក ង សារាយតេជោសែនជ័យ។
  

លើសពីនេះ ស្ថាបនិកទូក ង សារាយតេជោសែនជ័យ ក៏បានពន្យល់អំពីប្រភេទឈើគគីរផ្សេងៗ ដែលល្អក្នុងការធ្វើទូក ង ដែលជាប្រពៃណីវប្បធម៌របស់កម្ពុជា ជាយូរណាស់មកហើយតាំងពីសម័យអង្គរ រាជកាលព្រះបាទជ័យវរ្ម័នទី៧។ 
 

ដើមឈើគគីរជាប្រភេទដើមឈរមួយប្រភេទ ដែលមនុស្សចាស់បុរាណតែងឱ្យតម្លៃថាជាឈើ ដែលជាប់ធន់ជាមួយនឹងទឹក ព្រមទាំងមានភាពរឹងមាំល្អខុសពីដើមឈរដទៃ និងមានប្រវែង វែងស្របតាមតម្រូវការក្នុងការកសាងទូក ង។ ដើមឈើគគីរ បែងចែកទៅតាមប្រភេទដូចជា គគីរល្មៀត, គគីរម្សៅ, គគីរថ្ម និងគគីរខ្សាច់។ 
 

ជាពិសេស ទូក ង ដែលមានល្បឿនលឿន នឹងមានកេរ្តិ៍ឈ្មោះល្បីល្បាញក្នុងប្រទេសកម្ពុជាមួយ ទូក ង ដែលមានឈ្មោះ សារាយតេជោសែនជ័យ បានកសាងឡើងពីដើមឈើគគីរល្មៀត ដែលជាប្រភេទឈើកម្ររ មួយ ហើយដែលមានគុណភាពល្អខ្លាំងក្នុងការធ្វើទូកឱ្យមានភាពជាប់ធន់ និងគុណភាពយូអង្វែង៕