អន្តរជាតិ
យន្តហោះMH៣៧០៖ ចិនបើកសវនាការផ្តល់សំណងជំងឺចិត្តដល់គ្រួសារជនរងគ្រោះ
×
ដោយ៖អៀង សុខម៉ិញ/ RFI
យន្តហោះMH៣៧០ ចិនបើកសវនាការផ្តល់សំណងជំងឺចិត្តដល់គ្រួសារជនរងគ្រោះ AP - Vincent Thian ជិត១០ឆ្នាំក្រោយការធ្លាក់បាត់យន្តហោះMH៣៧០របស់ក្រុមហ៊ុនអាកាសចរណ៍ម៉ាឡេស៊ីអ៊ែរឡាញមក តុលាការចិនបានបើកសវនការនៅថ្ងៃចន្ទទី ២៧វិច្ឆិកា ជុំវិញការផ្តល់សំណងជំងឺចិត្តដល់គ្រួសារជនរងគ្រោះសញ្ជាតិចិន។
នៅថ្ងៃទី៨មីនា២០១៤ យន្តហោះប៊ូអ៊ីង៧៧៧ របស់ក្រុមហ៊ុនអាកាសចរណ៍ម៉ាឡេស៊ីអ៊ែរឡាញ លេខMH៣៧០ មានផ្ទុកអ្នកដំណើរនិងបុគ្គលិក ២៣៩នាក់ ក្នុងនោះជាង១៥០នាក់ជាជនជាតិចិន បានបាត់ពីប្រព័ន្ធរ៉ាដា ក្រោយហោះចេញពីក្រុងកូឡាឡាំពួរសំដៅក្រុងប៉េកាំងបានបន្តិច។ ការស្រាវជ្រាវរកបំណែកយន្តហោះដែលប្រើមធ្យោបាយដ៏សម្បើមមហិមាត្រូវផ្អាកទាំងស្រុងនៅខែមករាឆ្នាំ២០១៧។ ឯមូលហេតុនៃការបាត់យន្ត MH៣៧០ នៅជាអាថ៌កំបាំងបំផុតសម្រាប់ប្រវត្តិអាកាសចរណ៍ស៊ីវិលទំនើប។
ទើបនៅថ្ងៃចន្ទទី២៧វិច្ឆិកា ២០២៣នេះប៉ុណ្ណោះដែលតុលាការចិនបានបើកសវនាការជាលើកទីមួយ រយៈពេល១០ថ្ងៃ ពោលរហូតដល់ថ្ងៃទី៦ធ្នូ ដើម្បីសិក្សាបណ្តឹងរបស់ក្រុមគ្រួសារជនរងគ្រោះជាង៤០គ្រួ ដែលទាមទារចង់បានការជួយគាំទ្រផ្នែកផ្លូវចិត្តឡើងវិញ ទាមទារឱ្យមានភ្នាក់ងារទំនាក់ទំនងរវាងក្រុមហ៊ុននិងគ្រួសាររងគ្រោះ និងពិសេសទាមទារថ្លៃសំណងជំងឺចិត្ត។
បើតាមទូរទស្សន៍ជាតិចិនCCTV ក្រុមគ្រួសារជនរងគ្រោះបានប្តឹងទៅតុលាការឱ្យក្រុមហ៊ុនអាកាសចរណ៍ម៉ាឡេស៊ី ក្រុមហ៊ុនផលិតតួយន្តហោះប៊ូអ៊ីងអាមេរិក ក្រុមហ៊ុន Rolls-Royceអង់គ្លេសអ្នកផលិតម៉ាស៊ីនយន្តហោះ និងក្រុមហ៊ុនធានារ៉ាប់រងអាល្លឺម៉ង់Allianz ដែលអវត្តមានក្នុងអង្គសវនការ សងជំងឺចិត្តនិងផ្តល់ការបំភ្លឺអំពីហេតុការណ៍បាត់យន្តហោះ។
គ្រួសារចិននីមួយៗទាមទារសំណងជំងឺចិត្តប្រមាណពី ១០ទៅ៨០លានយ័ន ព្រមទាំងសំណងការខូចខាត៣០ទៅ៤០លានយ័ន។
ប៉ុន្តែតាំងពីជិត១០ឆ្នាំមកនេះ គេមិនអាចកំណត់បានថាតើនរណាជាអ្នកទទួលខុសត្រូវក្នុងគ្រោះបាត់យន្តហោះ MH៣៧០ទេ។ ក្រុមហ៊ុនម៉ាឡេស៊ីអ៊ែរឡាញក៏គ្មានតំណាងនៅចិន។ បើទោះបីជាតុលាការសម្រេចសាលក្រមឱ្យបង់ថ្លៃខូចខាត ក៏ក្រុមហ៊ុនម៉ាឡេស៊ីអាចបដិសេធបានដែរ។ កន្លងមក តុលាការតែងសម្រួលឱ្យមានការផ្សះផ្សាគ្នាដោយផ្ទាល់រវាងគ្រួសារជនរងគ្រោះនិងភាគីពាក់ព័ន្ធ។ នេះបើតាមប្រសាសន៍របស់មេធាវីម្នាក់។ សំណុំរឿងប្តឹងផ្តល់ជាងពាក់កណ្តាលបានដោះស្រាយរួចនិងដោយផ្ទាល់រវាងក្រុមហ៊ុនអាកាសចរណ៍ ក្រុមហ៊ុនធានារ៉ាប់រង និងគ្រួសារជនរងគ្រោះ។ គ្រួសារជនរងគ្រោះ១១០គ្រួទទួលសំណង ប្រមាណពី២,៥ទៅ៣លានយ័នរួចហើយ។ នេះបើតាមប្រភពដដែល។
© រក្សាសិទ្ធិដោយ thmeythmey.com