ក្នុងបទសម្ភាសមួយជាមួយកាសែត The Wall Street Journal (WSJ) តារាភាពយន្ត Angelina Jolie បានលើកឡើងពីគម្រោងផែនការជីវិតរបស់ខ្លួន ដោយចង់ចាកពីតំបន់ហូលីវូត ក្រុងឡូសអេនជឺឡែស សហរដ្ឋអាម៉េរិក មករស់នៅដ៏សុខស្ងប់នៅគេហដ្ឋានរបស់ខ្លួន ដែលស្ថិតនៅក្នុងស្រុកសំឡូត ខេត្តបាត់ដំបង ប្រទេសកម្ពុជា។
«វាជាផ្នែកមួយនៃការសម្រេចចិត្តដែលបានកើតឡើងបន្ទាប់ពីការលែងលះរបស់ខ្ញុំ»។ ខ្ញុំលែងរស់នៅ និងធ្វើដំណើរដោយសេរីដូចមុន។ ដូច្នេះខ្ញុំនឹងផ្លាស់ប្តូរ នៅពេលសមស្របណាមួយ»។ បណ្តាសារព័ត៌មានបរទេស បានដកស្រង់សម្តីតារាសម្តែងវ័យ៤៨ឆ្នាំរូបនេះ ដោយផ្អែកលើអត្ថបទរបស់ WSJ ដែលមានចំណងជើងថា “Angelina Jolie Is Rebuilding Her Life” (អេនជឺលីណា ជោលី កំពុងកសាងជីវិតរបស់ខ្លួនឡើងវិញ)។
ក្នុងបទសម្ភាស តារា Angelina បានរៀបរាប់ពីជីវិតដ៏តប់ប្រមល់នៅហូលីវូត តំបន់ឧស្សាហកម្មភាពយន្តដ៏ល្បីល្បាញ។ «ខ្ញុំបានចម្រើនវ័យនៅទីដ៏រាក់មួយ។ ក្នុងចំណោមទីកន្លែងនានាលើពិភពលោក ហូលីវូត មិនមែនជាទីកន្លែងប្រកបដោយសុខុមាលភាពនោះឡើយ»។
ទោះបីជាមានឈ្មោះល្បីល្បាញលើពិភពលោកទៅហើយក៏ដោយ ប៉ុន្តែកូនស្រីរបស់តារាសម្តែង Jon Voight រូបនេះ លើកឡើងថា ខ្លួនដែលមិនចាប់អារម្មណ៍ពីភាពអស្ចារ្យទាល់តែសោះ ហើយនេះ ក៏ប្រហែលដោយសារតែគាត់ស៊ាំនឹងជីវិតនៅជុំវិញហូលីវូត តាំងពីកុមារភាព។
ក្តីក្តាំនៃសំណុំរឿងលែងលះជាមួយ Brad Pitt កាលពី៧ឆ្នាំមុន ក៏ជាផ្នែកមួយដែលបានរុញភាពស្មុគ្រស្មាញក្នុងជីវិតរបស់ Angelina ផងដែរ។ នាពេលនោះ គាត់យល់កាន់តែច្បាស់ពីអត្ថន័យនៃជីវិត ហើយបានប្រើប្រាស់ពេលវេលាដ៏ច្រើននៅផ្ទះជាមួយកូនៗចិញ្ចឹម និងបង្កើតទាំង៦នាក់របស់ខ្លួន។
តើគាត់នឹងមកតាំងទីលំនៅក្នុងប្រទេសកម្ពុជាពេលណា? បទសម្ភាសមិនបានលម្អិតអំពីគម្រោងផែនការនេះឡើយ។ ទោះបីជាយ៉ាងណាក៏ដោយ វាជារឿងដែលនឹងអាចកើតឡើង ដោយសារព្រះរាជាណាចក្រអច្ឆរិយៈ បានក្លាយជាផ្នែកមួយដ៏សំខាន់ក្នុងជីវិតរបស់ Angelina រួចទៅហើយ។
ស្គាល់កម្ពុជាដំបូងតាមរយៈការថតរឿង «Lara Croft: Tomb Raider» នាអំឡុងឆ្នាំ២០០០ Angelina បានអះអាងថា គាត់បានជួបរឿងរ៉ាវថ្មីៗច្រើន។ ក្នុងបទសម្ភាសជាមួយ AP តារាហូលីវូតរូបនេះ បានបញ្ជាក់ថា កម្ពុជា ជាទឹកដី ដែលបានផ្លាស់ប្តូរចិត្តគាត់ឱ្យចេះស្រឡាញ់ ដោយកន្លែងមក គាត់មិនដែលធ្លាប់គិតទាល់តែសោះក្នុងតួនាទីភាពជាមាតា។
តារាលំដាប់ពិភពលោករូបនេះ បានថ្លែងប្រាប់ AP ថា៖ «នៅពេលដែលខ្ញុំមកដល់កម្ពុជាជាលើកដំបូង ខ្ញុំមានការផ្លាស់ប្តូរ ជាពិសេសទស្សនវិស័យ។ ខ្ញុំបានមើលរឿងរ៉ាវជាច្រើនទាក់ទងនឹងប្រវត្តិសាស្ត្រ ដែលខ្ញុំមិនដែលធ្លាប់បានរៀននៅសាលា ហើយមានរឿងរ៉ាវជាច្រើនទៀតនៅក្នុងជីវិតដែលខ្ញុំត្រូវរៀនសូត្រ»។
Angelina បានបន្ថែមថា៖ «វាពិតជាចម្លែក ពីព្រោះខ្ញុំមិនដែលចង់បានកូននោះឡើយ។ ខ្ញុំមិនដែលធ្លាប់ចង់ពរពោះទាល់តែសោះ។ ភ្លាមៗនោះ វាច្បាស់ណាស់សម្រាប់ខ្ញុំដែលមើលឃើញថា កូនប្រុសរបស់ខ្ញុំ [ឈ្មោះ Maddox ដែលបានសុំសិទ្ធិចិញ្ចឹមពីកម្ពុជាកាលពីឆ្នាំ២០០២] គឺជាផ្នែកមួយនៅក្នុងប្រទេសនេះ»។
គឺកូនប្រុសចិញ្ចឹមច្បង Maddox Chivan Jolie-Pitt នេះហើយ ដែលបានធ្វើឱ្យទំនាក់ទំនងរវាង Angelina ជាមួយកម្ពុជា កាន់តែរឹងមាំ រហូតដល់ឈានទៅបង្កើតអង្គការសប្បុរសធម៌មិនស្វែងរកប្រាក់ចំណេញដែលផ្តោតលើសន្តិសុខបរិស្ថាន ការលើកកម្ពស់សុខភាព និងការបង្កើតសន្តិភាព និងស្ថិរភាពនៅក្នុងសហគមន៍ទាំងអស់នៅក្នុងនាមឈ្មោះរបស់គាត់ ដែលត្រូវបានគេហៅថាមូលនិធិ Maddox Jolie-Pitt (MJP) Foundation។
តាមរយៈបេសកកម្មមនុស្សធម៌ជាច្រើន រួមទាំងតួនាទីជាទូតសុច្ឆន្ទៈរបស់អង្គការ UNHCR ផងដែរនោះ Angelina បានមើលឃើញពីទុក្ខលំបាករបស់មនុស្សជាតិ ជាពិសេសពលរដ្ឋដែលរស់នៅលើដីចម្ការមីន។ កិច្ចប្រឹងប្រែងនានាសម្រាប់កម្ពុជា បានទទួលនូវការតបស្នងដ៏គាប់ចិត្ត ដោយកាលពីថ្ងៃទី៣១ ខែកក្កដា ឆ្នាំ២០០៥ ព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី បានប្រោសប្រទានសញ្ជាតិខ្មែរដល់តារាអាម៉េរិករូបនេះ។
នៅឆ្នាំ២០១៧ រឿង «First They Killed My Father» (មុនដំបូង ខ្មែរក្រហមសម្លាប់ប៉ារបស់ខ្ញុំ) ដែលផ្អែកតាមរឿងពិតរបស់អ្នកនិពន្ធ អ៊ឹង លឿង ដែលរៀបរាប់ពីទុក្ខលំបាកវេទនាក្នុងសម័យខ្មែរក្រហម ត្រូវបានចាក់បញ្ចាំងជាលើកដំបូង ដោយ Maddox មានចំណែកដ៏ធំក្នុងការជួយម្តាយចិញ្ចឹមរបស់ខ្លួនលើការផលិតរឿងនេះ។
នៅដើមឆ្នាំ២០២២ លោកស្រី Angelina Jolie អនុវត្តគម្រោង «ស្ត្រីដើម្បីឃ្មុំ» ដោយផ្តោតលើការបណ្តុះបណ្តាលស្ត្រីខ្មែរ៥០នាក់ក្នុងជំនាញចិញ្ចឹមឃ្មុំ នៅស្រុកសំឡូត ខេត្តបាត់ដំបង។ Angelina ក៏ត្រូវបានគេប្រសិទ្ធនាមថា «Godmother» ផងដែរ ដោយគម្រោងនេះ នឹងបង្កើតសំបុកឃ្មុំចំនួន២៥០០សំបុកសម្រាប់ឃ្មុំចំនួន១២៥លានក្បាលនៅត្រឹមឆ្នាំ២០២៥។
នៅស្រុកសំឡូត Angelina បានទិញដី និងសាងផ្ទះនៅឆ្នាំ២០០៣ ក្នុងគោលបំណងប្រែក្លាយតំបន់ដែលពោរពេញទៅដោយការលួចបរបាញ់សត្វ ទៅជាតំបន់អភិរក្សសត្វព្រៃ ជាពិសេសប្រភេទសត្វដែលជិតផុតពូជ។
ក្រៅពី Maddox Chivan Jolie-Pitt ដែលជាកូនច្បង Angelina Jolie មានកូនបង្កើត និងចិញ្ចឹម៥នាក់ទៀត ក្នុងនោះ មាន PaxThien (កូនប្រុសពីវៀតណាម), Zahara Marley (កូនស្រីពីអេក្យូពី), Shiloh Nouvel (កូនស្រីបង្កើតទីមួយដែលកើតនៅណាមីប៊ី) និងកូនបង្កើតភ្លោះប្រុស-ស្រី Knox L’eon និង Vivienne Marcheline៕