កីឡាអន្តរជាតិ
អន្តរជាតិ
ប្រធានក្លិប Ankaragucu ដែលដាល់អាជ្ញាកណ្តាលក្នុងទីលាន ត្រូវបានចាប់ខ្លួន
× តុលាការប្រទេសតួកគី នៅថ្ងៃទី១២ ខែធ្នូ បានបញ្ជាឱ្យចាប់ខ្លួនលោក Faruk Koca ប្រធានក្លិប Ankaragucu ដែលចូលទៅដាល់អាជ្ញាកណ្តាលដល់ក្នុងទីលានប្រកួត នៃក្របខណ្ឌ Super Lig។ ដោយឡែកជនសង្ស័យពីររូបទៀត ត្រូវបានឃុំខ្លួនពាក់ព័ន្ធនឹងអំពើហិង្សាលើអាជ្ញាកណ្តាលនេះដែរ។
បើតាមសម្តីរបស់រដ្ឋមន្ត្រីក្រសួងយុត្តិធម៌តួកគីលោក Yilmaz Tunc លោក Koca និងពីរនាក់ផ្សេងទៀតត្រូវបានចាប់ខ្លួនពីបទ ធ្វើឱ្យរបួសដល់មន្ត្រីអាជ្ញាកណ្តាល បន្ទាប់ពីរដ្ឋអាជ្ញាទទួលពាក្យបណ្តឹងជុំវិញករណីហិង្សាក្នុងទីលានបាល់ទាត់ នៃលីគកំពូលតួកគី។
លោក Koca បានចូលទៅក្នុងទីលាន ហើយដាល់អាជ្ញាកណ្តាល Halil Umut Meler នៅពេលដែលសំឡេងផ្លុំកញ្ចែចុងក្រោយបញ្ចប់ការប្រកួតរវាងក្រុមភ្ញៀវ Rizespor ដែលរកបានគ្រាប់បាល់តាមស្មើ Ankaragucu នៅនាទី ៩៧ ក្នុងលទ្ធផលស្មើ ១-១ នៅកីឡដ្ឋាន Eryama ថ្ងៃទី១១ ខែធ្នូ។ លោកអាជ្ញាកណ្តាល Meler ក៏រងការទាត់បន្ថែមទៀត បន្ទាប់ពីដួលលើស្មៅ ក្រោយត្រូវកណ្តាប់ដៃប្រធានក្លិបលោក Koca ពីសំណាក់អ្នកគាំទ្រ Ankaragucu។
ក្រោយហេតុការណ៍នេះ សហព័ន្ធកីឡាបាល់ទាត់តួកគី (TFF) បានសម្រចផ្អាកការប្រកួតលីគទាំងអស់ក្នុងប្រទេស ដោយគ្មានកំណត់ផងដែរ។ TFF អះអាងថា ប្រធានក្លិប មន្ត្រី និងអ្នកដែលមានកំហុសលើអាជ្ញាកណ្តាល Umut Meler នឹងត្រូវទទួលរងការដាក់ពិន័យធ្ងន់ធ្ងរបំផុត។
លោក Tunc បានបង្ហោះសារលើប្រព័ន្ធផ្សព្វផ្សាយសង្គម X ថា៖«ការស៊ើបអង្កេតនៅតែធ្វើបន្តយ៉ាងយកចិត្តទុកដាក់ បើទោះមានការចាប់ខ្លួនប្រធានក្លិប Ankaragucu និងពីរនាក់ទៀតហើយក្តី»។
លោក Gianni Infantino ប្រធានប្រធានសហព័ន្ធកីឡាបាល់ទាត់អន្តរជាតិ (FIFA) មិនអាចទទួលយកបាននោះទេចំពោះហេតុការណ៍ដ៏អាក្រក់នេះ ទាំងក្នុងកីឡា និងក្នុងសង្គម។ លោក Infantino បន្ថែមថា៖ «បើគ្មានមន្ត្រីអាជ្ញាកណ្តាល និងមន្ត្រីរៀបចំប្រកួតផ្សងទៀត ក៏គ្មានកីឡាបាល់ទាត់ដែរ»៕
Tag:
Faruk Koca
Ankaragucu
© រក្សាសិទ្ធិដោយ thmeythmey.com