-សន្ធិប្រកាស ឆព្វណ្ណល្អន់ល្អះ

ត្រចះភ្លឺផ្លេក ចាំងជះរស្មី

បីបមថ្នមមេឃ ដួងចិត្តវិវេក

ពន់ពេកស្លុតី។
 

-គន់ពីចម្ងាយ អង្គរអើតកាយ

ឆើតឆាយសុស្មី ឆាយាប្រាសាទ

ស្អានស្អាតឥតបី យាមវតី

ប្រេមប្រិយសុលក្សណ៍។
 

-ទ្រើសទ្រង់អនេក ជាស្នាដៃឯក

តេជខត្តិយៈ ព្រះចមក្សត្រា

មហាពិទ័គ្ធ នាមាសូរ្យ

វរ្ម័នទីពីរ។
 

-ស្អិតស្អាងប្រាង្គប្រា ក្បាច់រចនា

អស្ចារ្យសោភី សោភ័ណប្រណីត

ឋិតក្នុងវារី បែរវារុណី 

ទីក្រុងរុងឫទ្ធិ។
 

-ប្រាសាទតូចធំ នៅមូលជិតជុំ

ដូចព្រហ្មនិម្មិត នាគាអើតប្រាណ

ហំហានវិជិត នៅអែបនែបនិត្យ 

ពិតស្មោះភូមី។
 

-តោសិង្ហសម្ញែង អំណាចហំហែង

បន្លែងនាគី ទប់ទ្រគ្រហឹម

ផ្ទឹមសិម្ពលី ថ្វាត់ថ្វាយជីវី

ធានីរឿងរម្យ។
 

-គ្រប់ជនជាតិសាសន៍ ឈូឆរដេរដាស

ប្រះប្រាណជិតជុំ ក្រោមខ្យល់ថ្ងួចថ្ងូរ

សូរ្យអស្ដង្គមន៍ រស្មីស្រទំ

រយំផ្កាព្រៃ។
 

-ត្រដែតត្រដឹម ត្រដួចស្រឡឹម

ស្រឡោចហទ័យ ស្រឡាញ់ជាប់ចិត្ត 

ដិតដក់មមៃ ជាក់ជាវិលវៃ

រំពៃមើលមៀង។
 

-ឯអប្សរា ប្រណម្យហត្ថា

កាយាផ្អងផ្អៀង ញញិមសមក្រៃ

ប៉ប្រៃឈ្មងឆ្មៀង បង្កប់សូរសៀង

ទៀងទន់ពីរោះ។
 

-អង្គរទ្រលោក នាំព្នៃជ័យជោគ

បំពោកកេរ្ដិ៍ឈ្មោះ រន្ទឺឮឆ្ងាយ

សាយកិត្តិយស រុងរោចន៍ខ្ពង់ខ្ពស់

រស់ចេរនិរន្តរ៍៕