ក្នុងកិច្ចសម្ភាសជាមួយសារព័ត៌មានថ្មីៗ ព្រឹទ្ធាចារ្យល្បុក្កតោរូបនេះ ក៏មើលឃើញ និងទទួលស្គាល់ថា គុនល្បុក្កតោ មានការរីកចម្រើន បើធៀបនឹង៣០ឆ្នាំមុន ដែលជាការចាប់ផ្ដើមស្ដារ និងអភិរក្សក្បាច់គុនបុរាណខ្មែរ ដ៏ចំណាស់នេះឡើងវិញ។
 

ទន្ទឹមនឹងការរីកចម្រើនេះ ក៏មិនត្រូវបញ្ឈប់សកម្មភាពត្រឹមនេះដែរ។ លោកគ្រូក្រមាមាសរូបនេះ ជំរុញឱ្យយុវជនជំនាន់ក្រោយ ត្រូវខិតខំពួតដៃគ្នា ធ្វើការរួមគ្នា ដើម្បីពង្រឹង និងពង្រីកវិសាលភាពក្បាច់គុនល្បុក្កតោទាំងក្នុងស្រុក និងលើឆាកអន្តរជាតិថែមទៀត។
 

«យើងរស់ ដោយសារញាំបាយ៣ពេល ហើយបើមិនទាន់ទៅណា(ស្លាប់) យើងក៏ត្រូវការបាយ៣ពេលទៀត ។ ដូច្នេះរឿងវប្បធម៌(រីកចម្រើន) មិនអាចស្កប់ស្កល់ទេ។ យើងបានល្បីឈ្មោះ យើងកាន់តែខំទៀតហើយ។ ហើយបើអត់ល្បីឈ្មោះ គឺបាត់ហើយ»។ ព្រឹទ្ធាចារ្យ សាន គឹមស៊ាន ថ្លែងបែបនេះ នៅក្រោយការបញ្ចប់ការប្រកួតគុនល្បុក្កតោជ្រើសរើសជើងឯកថ្នាក់ជាតិ ឆ្នាំ២០២៣ នាថ្ងៃទី១៨ ខែធ្នូ នៅសាកលវិទ្យាល័យភូមិន្ទភ្នំពេញ។
 

ជាមួយគ្នានេះ លោកគ្រូ សាន គឹមស៊ាន ក៏ស្នើឱ្យរដ្ឋាភិបាល ជាពិសេសអាជ្ញាធរតាមមូលដ្ឋាន ជួយស្វែករងព្រឹទ្ធាចារ្យល្បុក្កតោ ដែលនៅសេសសល់ពីសម័យសង្គ្រាម ដើម្បីឱ្យពួកគាត់ជួយពង្រឹង និងអភិរក្សក្បាច់គុនបុរាណខ្មែរនេះថែមទៀត។ លោកគ្រូ គឹមស៊ាន ជឿជាក់ថា ព្រឹទ្ធាចារ្យ ដែលមានចំណេះដឹងល្បុក្កតោនេះ អាចនៅសេសសល់ច្រើនទៀត តាមបណ្ដាខេត្តនានា ។