RFI
អន្តរជាតិ
ស្នាមដីប្រេះប្រវែងប្រមាណ៤គីឡូម៉ែត្រ បើកចំហ ខ្ជាក់ចេញកម្អែលម៉ាក់ម៉ា នៅតំបន់ក្បែរភូមិ Grindavik ភាគនិរតីអ៊ីស្លង់ ថ្ងៃទី១៨ធ្នូ។ REUTERS
×![]()
ដោយ៖ម៉ម ពិសី/RFI
១សប្តាហ៍បន្ទាប់ពីបានកម្រើកសកម្មភាព តំបន់ភ្នំភ្លើងនៅភាគនិរតីប្រទេសអ៊ីស្លង់ បានផ្ទុះកក្រើកជះចេញជាកម្អែល និងអណ្តាតភ្លើងសន្ធោសន្ធៅ។ ចំណុចផ្ទុះនេះ ស្ថិតនៅចំងាយប្រមាណតែ៣គីឡូម៉ែត្រ ពីភូមិមួយឈ្មោះ Grindavik ដែលស្ថិតនៅលើឧបទ្វីប Reykjanes នៃកោះអ៊ីស្លង់។ ប្រជាជនប្រមាណ៤០០០នាក់ ដែលរស់នៅភូមិនេះ ត្រូវបានអាជ្ញាធរជម្លៀសចេញ តាំងតែពីថ្ងៃទី១១វិច្ឆិកាម្លេះ បន្ទាប់ពីបានទទួលសញ្ញាអាសន្នពីអ្នកជំនាញភ្នំភ្លើង។ គិតត្រឹមពេលនេះ មិនមានមនុស្សរងគ្រោះ ចំណែកការហោះហើរផ្លូវអាកាស ក៏មិនមានបញ្ហារអាក់រអួលដែរ។
យោងតាមវិទ្យាស្ថានឧតុនិយមនិងធរណីសាស្ត្រអ៊ីស្លង់ ភ្នំភ្លើងបានចាប់ផ្តើមផ្ទុះ នៅវេលាម៉ោង ១០និង១៧នាទីយប់ ថ្ងៃចន្ទទី១៨ធ្នូ បន្ទាប់ពីដីបានចាប់ផ្តើមរញ្ជួយ នៅវេលាម៉ោង៩យប់។
ស្នាមដីប្រេះ ដែលខ្ទាក់ចេញជាផ្កាភ្លើង មានប្រវែងប្រមាណ៤គីឡូម៉ែត្រ។ រូបភាពភ្នំភ្លើងផ្ទុះ ត្រូវបានផ្សាយផ្ទាល់ តាមកញ្ចក់ទូរទស្សន៍ បង្ហាញឲ្យឃើញកំអែលម៉ាក់ម៉ា ពណ៌លឿងក្រហមច្រាល ផ្ទុះផុសកញ្ជោលឡើង។
ស្នាមដីប្រេះ ដែលខ្ទាក់ចេញជាផ្កាភ្លើង មានប្រវែងប្រមាណ៤គីឡូម៉ែត្រ។ រូបភាពភ្នំភ្លើងផ្ទុះ ត្រូវបានផ្សាយផ្ទាល់ តាមកញ្ចក់ទូរទស្សន៍ បង្ហាញឲ្យឃើញកំអែលម៉ាក់ម៉ា ពណ៌លឿងក្រហមច្រាល ផ្ទុះផុសកញ្ជោលឡើង។
ស្ថានីយ៍អគ្គិសនីដើរដោយចំហាយទឹក ឈ្មោះ Svarstengi ស្ថិតនៅចំងាយតែ២គីឡូម៉ែត្រប៉ុណ្ណោះ ពីទីតាំងផ្ទុះភ្នំភ្លើងនេះ។ ស្ថានីយ៍នេះ ផលិតចរន្តអគ្គិសនី ព្រមទាំងផ្គត់ផ្គង់ទឹកក្តៅ ដល់ប្រជាជនប្រមាណ៣០០០០នាក់ នៅតំបន់នេះ។ កាលពីតំបន់ភ្នំភ្លើងនេះ បានចាប់ផ្តើមកម្រើក នៅដើមខែវិច្ឆិកា អាជ្ញាធរអ៊ីស្លង់ បានសាងសង់ជញ្ជាំងដើម្បីការពារស្ថានីយ៍នេះ និងបានជម្លៀសប្រជាជន៤០០០នាក់ ចេញពីភូមិ Grindavik បន្ទាប់ពីអ្នកជំនាញភ្នំភ្លើង បានសង្កេតឃើញថា ស្រទាប់ផ្ទៃដីតំបន់នេះឡើងប៉ោងខ្លាំង ដោយសារតែកម្លាំងម៉ាក់ម៉ារុញបុកឡើង។
ផ្អែកតាមក្រុមអ្នកជំនាញភ្នំភ្លើងអ៊ីស្លង់ គិតត្រឹមថ្ងៃអង្គារទី១៩ធ្នូ កម្លាំងខ្ជាក់ជះកម្អែលភ្នំភ្លើង ហាក់បានថយចុះ។ ក៏ប៉ុន្តែមិនមែនមានន័យថា ការផ្ទុះភ្នំភ្លើងនេះនឹងចប់ឆាប់ៗនោះទេ។ វាមានន័យ កម្លាំងផ្ទុះចាប់ផ្តើមថេរ មានលំនឹងស្មើ។
គួរបញ្ជាក់ថា នេះជាលើកទី៤ហើយ ដែលភ្នំភ្លើងនៅតំបន់នេះ បានផ្ទុះកម្រើកឡើង ក្នុងរវាង២ឆ្នាំចុងក្រោយនេះ។ អ្នកជំនាញភ្នំភ្លើង ជឿថាតំបន់ឧបទ្វីប Reykjanes កំពុងតែឈានចូលក្នុងអំឡុងពេល ដែលសកម្មភាពភ្នំភ្លើង នឹងកម្រើកឡើងញឹកញាប់។ សកម្មភាពកម្រើកឡើងនៃភ្នំភ្លើង ក្នុងរវាង២ឆ្នាំមកនេះ បានធ្វើឲ្យតំបន់ឧបទ្វីប Reykjanes ក្លាយជាគោលដៅទេសចរណ៍ដ៏ល្បីល្បាញ។ យោងតាមការិយាល័យទេសចរណ៍អ៊ីស្លង់ យ៉ាងហោចណាស់ មានទេសចរចំនួន ៦៨ម៉ឺននាក់ បានធ្វើដំណើរមកមើល សកម្មភាពកម្រើកនៃតំបន់ភ្នំភ្លើននេះ ក្នុងរវាងជាង២ឆ្នាំមកនេះ។ តែយ៉ាងណា លោកប្រធានការពារសុវត្ថិភាពប្រជាជនអ៊ីស្លង់ បានទាញសញ្ញាអាសន្នថា ករណីផ្ទុះនៅលើកនេះ មិនមែនផ្ទុះដើម្បីមើលកម្សាន្តសប្បាយឡើយ គេអាចមើលវាបានតែមើលពីចំងាយ។
គួរបញ្ជាក់ថា ប្រទេសអ៊ីស្លង់ដែលគ្រប់ដណ្តប់ទៅដោយទឹកកក ត្រូវគេដាក់ងារហៅថា ជាដែនដីទឹកកកនិងភ្លើង។ យ៉ាងហោចណាស់ ប្រព័ន្ធបណ្តុំភ្នំភ្លើងចំនួន៣៣តំបន់ ដែលកំពុងតែសកម្មនៅឡើយ នៅខាងក្រោមស្រទាប់ដី អ៊ីស្លង់ ហើយដែលតម្រូវឲ្យអ្នកជំនាញ តាមដានយកចិត្តទុកដាក់បំផុត។ កាលពីឆ្នាំ២០១០ ភ្នំភ្លើង Eyjafjallajökull បានផ្ទុះកក្រើកឡើង ជះចេញជាល្អងផេះ ហើយបានធ្វើឲ្យរាំងស្ទះដំណើរការហោះហើរជើងយន្តហោះ សឹងតែពាសពេញអឺរ៉ុបទាំងមូល។ ថ្មីៗនេះ ភ្នំភ្លើងមួយទៀត ឈ្មោះ Askja ស្ថិតនៅភាគកណ្តាលអ៊ីស្លង់ បានបង្ហាញសញ្ញាកម្រើកគួរឲ្យបារម្ភដែរ។ កាលពីថ្ងៃទី១៨វិច្ឆិកា បន្ទាប់ពីបានសម្រេចជម្លៀសមនុស្សចេញពីភូមិ Grindavik លោកស្រី Katrin Jakobsdottir នាយករដ្ឋមន្ត្រីអ៊ីស្លង់ បានអះអាងថា ក្នុងមួយពិភពលោកនេះ គ្មានប្រទេសណាមានសមត្ថភាពល្អដូចអ៊ីស្លង់ទេ ក្នុងការបទប់ទល់ជាមួយគ្រោះធម្មជាតិ៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
