ដោយ៖ លោក សៀម រាប
សៀមរាប៖ ក្នុងរយៈពេលចុងក្រោយនេះ មានការជជែកគ្នាច្រើនជុំវិញការបំលាស់ទីប្រជា ពលរដ្ឋមួយចំនួនដែលរស់នៅលើដីតំបន់ការពារនៃបេតិកភណ្ឌពិភពលោកអង្គរ(តំបន់អង្គរ) ទៅកាន់តំបន់រុនតាឯក និងពាក់ស្នែងដែ លមានចម្ងាយប្រមាណជា៤០គីឡូម៉ែត្រ ពីទីតាំងចាស់។ បើយោងតាមអ្នកជំនាញបេតិកភណ្ឌ ការបំលាស់ខាងលើនេះ គឺជាការសង្រ្គោះរមណីយដ្ឋានអង្គរមិនឲ្យធ្លាក់ចូលក្នុងស្ថានភាពគ្រោះថ្នាក់ឡើងវិញ។ តែអង្គការសង្គមស៊ីវិលជាតិ-អន្តរជាតិ និងប្រជាពលរដ្ឋខ្លះ មិនពេញចិត្តនឹងការបំលាស់ទីនេះឡើយ។
ខ្ញុំក្នុងនាមជាប្រជាពលរដ្ឋម្នាក់ និងក្នុងនាមជាអ្នកស្រឡាញ់បេតិកភណ្ឌ ជាពិសេសរមណីយដ្ឋានអង្គរនៅក្នុងខេត្តសៀមរាប ខ្ញុំសូមរម្លឹកសាវតានៃការវែកញែកគ្នា រវាងអ្នកការពារសិទ្ធិ មនុស្ស និងអ្នកថែរក្សា-អភិរក្ស-ស្រឡាញ់បេតិកភណ្ឌបន្តិចជាមុនសិន។
ជាដំបូង ការប្រើប្រាស់ពាក្យពេចន៍។ អ្នកការពារសិទ្ធិមនុស្សដែលជំទាស់ទៅនឹងការបំលាស់ទីប្រជាពលរដ្ឋចេញពីតំបន់ថែរក្សាបេតិកភណ្ឌ បានប្រើប្រាស់ពាក្យ«បណ្តេញចេញ» ឬជម្លៀសចេញ។ រីឯ អ្នកស្រឡាញ់ ឬអ្នកការពារបេតិកភណ្ឌ បានប្រើប្រាស់ពាក្យ «បំលាស់ទី»។
ខ្ញុំគ្រាន់តែចង់បង្ហាញសាវតានៃរឿងរ៉ាវបន្តិចថា តើហេតុដូចម្តេចបានជាមានគោលនយោបាយបំលាស់ទីប្រជាពលរដ្ឋចេញពីតំបន់បេតិកភណ្ឌរមណីយដ្ឋានអង្គរ? តើជីវិតប្រាសាទ និងជីវិតមនុស្សមួយណាសំខាន់ជាង?
ផ្អែកលើការវិវត្តនៃរឿង គឺថាក្នុងរយៈពេលមួយទសវត្សរ៍ចុងក្រោយនេះ ដោយសារហេតុផលសេដ្ឋកិច្ច និងហេតុផលផ្សេងៗទៀត ប្រជាពលរដ្ឋមកពីគ្រប់ទិសទី បានមកបោះទីតាំងខុសច្បាប់ នៅលើដីតំបន់ការពារនៃបេតិកភណ្ឌពិភពលោកអង្គរ។ នៅក្នុងធម្មនុញ្ញអង្គរ ប្រជាពលរដ្ឋមិនអាចមកតាំងទីលំនៅ នៅលើដីកេរដំណែលបេតិកភណ្ឌនៃមនុស្សជាតិនេះបានឡើយ។ ទង្វើនេះ វាខុសច្បាប់ និងបំផ្លាញតម្លៃជាសកលនៃរមណីយដ្ឋានអង្គរ ដែលត្រូវបានគេចាត់ទុកជាបេតិភណ្ឌពិភពលោកនៃមនុស្សជាតិ។
សូមរម្លឹកថា នៅឆ្នាំ១៩៩២ អង្គការយូណេស្កូ បានចុះឧទ្យានអង្គរនៃព្រះរាជាណាចក្រកម្ពុជាទៅក្នុងបញ្ជីបេតិកភណ្ឌពិភពលោកនៃមនុស្សជាតិ នៅក្នុងសម័យប្រជុំលើកទី១៦ នៃគណៈកម្មាធិការបេតិកភណ្ឌពិភពលោក នៅក្រុងសាន់តាហ្វេ សហរដ្ឋអាម៉េរិក ក្រោមគំនិតផ្ដួចផ្ដើមរបស់ព្រះបាទ សម្ដេច ព្រះនរោត្ដម សីហនុ ព្រះបរមរតនកោដ្ឋ។ ការចុះបញ្ជីខាងលើនេះ មានន័យថា អង្គរយូណេស្កូ មានកាតព្វកិច្ចក្នុងកម្រិតណាមួយនោះ ក្នុងការការពារ និងថែរក្សារមណីយដ្ឋានអង្គរ។
ដោយសារកាតព្វកិច្ចនេះហើយ ទើបអង្គរការយូណេស្កូ ធ្លាប់បានព្រមានប្រាប់អាជ្ញាធរជាតិ អប្សរា និងរាជរដ្ឋាភិបាលកម្ពុជាជាច្រើនលើកច្រើនសាថា វត្តមានប្រជាពលរដ្ឋកាន់តែច្រើន និងខុសច្បាប់នៅលើដីការពារបេតិកភណ្ឌតំបន់អង្គរ អាចគំរាមកំហែងតម្លៃជាសកលនៃតំបន់អង្គរ ហើយរមណីយដ្ឋានអង្គរ អាចត្រូវបានគេដកចេញពីបញ្ជីបេតិកភណ្ឌនៃមនុស្សជាតិ។ តាមរយៈការចុះបញ្ជីនេះ រមណីយដ្ឋានអង្គរត្រូវបានគេការពារ ថែរក្សា ជួសជុល និងដកចេញពីបញ្ជីបេតិកភណ្ឌស្ថិតនៅក្នុងស្ថានភាពគ្រោះថ្នាក់។
ខ្ញុំសូមបញ្ជាក់បន្ថែមទៀតថា មិនត្រឹមតែរស់នៅខុសច្បាប់លើតំបន់ការពារបេតិកភណ្ឌទេ តែប្រជាពលរដ្ឋមួយចំនួនធំរស់នៅដោយមិនស្របច្បាប់(ដីគ្មានប្លង់) គ្មានអនាម័យ គ្មានហេដ្ឋារចនាសម្ព័ន្ធត្រឹមត្រូវឡើយ។ បើនិយាយពីសិទ្ធិមនុស្ស ពួកគេមិនមានសិទ្ធិរស់នៅដោយសេចក្តីថ្លៃថ្នូរឡើយ។
ងាកមកនិយាយពីអ្នករិះគន់គោលនយោបាយបំលាស់ទីវិញ ពួកគេថា នេះមិនមែនជាការបំលាស់ទីទេ តែជាការបណ្តេញប្រជាពលរដ្ឋចេញពីកន្លែងចាស់ផ្លាស់ទៅកន្លែងថ្មី ដោយយកពួកគេទៅទុកចោលនៅតំបន់រុនតាឯក ដែលគ្មានអ្វីៗទាំងអស់។ តាមពិត កន្លែងថ្មីមានអ្វីៗគ្រប់យ៉ាង គ្រាន់តែថា អ្វីៗត្រូវការពេលវេលាបន្តិច។ កន្លែងថ្មីមានហេដ្ឋារចនាសម្ព័ន្ធដូចជា ផ្លូវថ្នល់ ប្រព័ន្ធទឹកស្អាត អគ្គិសនី សាលារៀន មន្ទីរពេទ្យ ផ្សារ។ល។
នៅទីបញ្ចប់ ខ្ញុំសូមទាញចំណាប់អារម្មណ៍អ្នកអានបន្តិចថា ផ្អែកលើគោលនយោបាយរបស់អ្នកស្រឡាញ់ និងការពារបេតិកភណ្ឌ ការបំលាស់ទីខាងលើ គឺជាសកម្មភាពជួយសង្រ្គោះរមណីយដ្ឋានអង្គរទេតើ។ សង្រ្គោះតម្លៃជាសកលរបស់រមណីយដ្ឋានអង្គរទេតើ។ សង្រ្គោះអង្គរ មានន័យថា សង្រ្គោះសេដ្ឋកិច្ចជាតិខ្មែរទាំងមូល តាមរយៈសកម្មភាពទេសចរណ៍។
សិទ្ធិរបស់ប្រាសាទ ឬសិទ្ធិមនុស្ស?
រមណីយដ្ឋានអង្គរ ត្រូវបានគេចាត់ទុកជាតួអង្គស័ក្តិសិទ្ធ។ ស័ក្តិសិទ្ធ ព្រោះ អង្គរ ជាទីកន្លែង ដែលគ្រប់គ្នាបង្ហាញសេចក្តីស្រឡាញ់ បង្ហាញការក្រៀមក្រំ និងសុំសេចក្តីសុខពីអង្គរ។ រីឯអង្គរវិញ ក៏បានប្រាប់រឿងរ៉ាវគ្រប់យ៉ាងទៅកាន់មនុស្សជាតិ តាមរយៈប្រវត្តិរបស់រមណីដ្ឋានអង្គ។ ប្រាង្គប្រាសាទ មិនត្រឹមជាដុំថ្មធម្មតាប៉ុណ្ណោះទេ តែថ្មនៅទីនេះ គឺជាថ្មមានព្រលឹង និងអាចបង្ហាញប្រាប់គ្រប់រឿងរ៉ាវកាលពីអតីតកាលនៃជនជាតិខ្មែរ។ ដូច្នេះ ថ្មដែលបង្កើតជាប្រាង្គប្រាសាទ ក៏ត្រូវមានសិទ្ធិរស់រានមានជីវិត ដូចមនុស្សដែរ។ រីឯមនុស្សវិញ ក៏មានសិទ្ធិរស់នៅដោយសមរម្យ និងសេចក្តីថ្លៃថ្នូរផងដែរ។ តែសំណូមពររបស់ខ្ញុំ គឺថា សូមកុំឲ្យមនុស្សទាំងឡាយទៅទន្រ្ទាន ឬរំខានជីវិតប្រាសាទ ជាពិសេសនៅលើទីតាំងតំបន់ការពារនៃបេតិកភណ្ឌ។
មនុស្ស ក៏មានសិទ្ធិ រីឯប្រាសាទ ក៏មានសិទ្ធិដែរ។ ប្រាសាទដើម្បីមនុស្ស-មនុស្សដើម្បី ប្រាសាទ៕