ជាតិ
×![]()
ដោយ: នាយយ៉ាន
សៀមរាប៖ សារមន្ទីរ វិមានសុខា នៅក្រុងសៀមរាប តាំងវត្ថុបុរាណជាច្រើនមុខ ដូចជា យានជំនិះបុរាណ នាឡិកាបុរាណ ឧបករណ៍សោតទស្សន៍បុរាណ និងវត្ថុបុរាណផ្សេងៗទៀតខ្លះៗដែរ។ សារមន្ទីរនេះ ក៏មានហាងកាហ្វេមួយកន្លែងដែរ។ សម្ភារៈ ដែលតាំងក្នុងសារមន្ទីរនេះ ត្រូវបានគេប្រើក្នុងអំឡុងទសវត្សចាប់ពីឆ្នាំ៤០ រហូតដល់ឆ្នាំ៦០ និងមួយចំនួនទៀតផលិតតាំងពីឆ្នាំ ១៧៥៧ មក។
ក្នុងចំណោមវត្ថុបុរាណ និងចាស់ៗទាំងអស់ក្នុងសារមន្ទីរ មាននាឡិកាព្យួរជញ្ជាំងមួយគ្រឿង ដែលចំណាស់ជាងគេ គឺអាយុកាលជាង២៦០ឆ្នាំ។ វាគឺជានាឡិកាបុរាណ ដែលត្រូវបានក្រុមហ៊ុន Thwaites and Reed Ltd. ផលិតនៅឆ្នាំ១៩៧៣ តាមគំរូទាំងស្រុងនាឡិកាដែល លោក FRANKLIN Benjamin បានធ្វើឆ្នាំ១៧៥៧។
ក្រុមហ៊ុនដែលបង្កើតឡើងនាឆ្នាំ១៧៤០ នៅទីក្រុងឡុងដ៍ ប្រទេសអង់គ្លេសនេះ បានផលិតនាឡិកា ១ ០០០គ្រឿងគត់។ លោក លី ប៉េងហេង ដែលជាស្ថាបនិកសារមន្ទីរ វិមានសុខា បានធ្វើដំណើរទៅសហរដ្ឋអាម៉េរិក ឆ្នាំ១៩៩៨ ដើម្បីទិញនាឡិកាលេខ៥៤២ លើ១០០០ នេះ។
ហាងកាហ្វេក្នុងសារមន្ទីរ ត្រូវបានតុបតែងជាមួយវត្ថុបុរាណដូចជា នាឡិកាព្យួរលើជញ្ជាំងយ៉ាងច្រើន កង់ វិទ្យុ ឧបករណ៍ភ្លេង កាម៉េរ៉ា អាប៉ារៃថតរូប ទូរស័ព្ទ ចង្កៀង តុក្កតា និងរូបភាពផ្សេងៗ ពិសេសមានវត្ថុបុរាណ ដែលទាក់ទងនឹងហាងកាហ្វេដូចជា ម៉ាស៊ីនកិនគ្រាប់កាហ្វេ ប៉ាន់តែ ពែង ដប ថូ ម៉ាស៊ីនឈូសទឹកកក និងកញ្ចប់បារី។
លោក លី ប៉េងហេង ហៅតាឆ្កួត ដែលជាស្ថាបនិកសារម្ទីរវិមានសុខា បានព្យួរវត្ថុបុរាណ លើសពី១០០គ្រឿង លើជញ្ជាំងហាងកាហ្វេ នៃសារមន្ទីរវិមានសុខា។ លោក ប៉េងហេង បានអះអាងថា ៖ « ភ្ញៀវដែលមកក្នុងកាហ្វេនេះ មានអារម្មណ៍ថា ត្រឡប់ទៅអតីតកាលវិញ។»
ជាការពិតណាស់ មិនថានៅខេត្ត ឬនៅក្រុងភ្នំពេញ ហាងកាហ្វេដែលយករបស់បុរាណមកតាំង មានមួយចំនួនហើយ ក៏ប៉ុន្តែទូទាំងប្រទេស គ្មានហាងកាហ្វេណាមួយ ដែលតាងវត្ថុបុរាណច្រើនដូចនេះ។
ហាងកាហ្វេនៃសារមន្ទីរ វិមានសុខា បើករៀងរាល់ថ្ងៃ ពីម៉ោង៨ព្រឹក ដល់ម៉ោង៥ល្ងាច។ វាស្ថិតនៅផ្លូវលេខ២២ ភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប៕
Tag:
(នាយយ៉ាន
សារមន្ទីរ វិមានសុខា)
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
