ជាតិ
ចាប់ផ្ដើមពីឆ្នាំ ១៩៨៨ លោក អៀច បន្តលក់ទឹកកកឈូស ទោះបានប្រាក់ចំណេញតិច រូបភាព នាយ យ៉ាន តាមដងផ្លូវ សប្ដាហ៍ ទី40
× ភ្នំពេញ៖ រៀងរាល់ព្រឹក ម៉ោង៧ លោក អៀច រងចាំអ្នកដឹកដុំទឹកកក ដើម្បីយកទឹកកក៤ដុំ។ លោក អៀច ច្នៃដុំទឹកកក ឱ្យតូចល្មម សម្រាប់ឈូសលក់។ បុរសរូបនេះ ជិះកង់ចេញទៅលក់ទឹកកកឈូស នៅសង្កាត់ស្ទឹងមានជ័យទី៣ ខ័ណ្ឌមានជ័យ រាជធានីភ្នំពេញ។
លោក អៀច លក់ទឹកកកឈូសមួយកែវក្នុងតម្លៃ ១០០០រៀលរហូតដល់អស់ទឹកកក ប្រហែលម៉ោង៦ល្ងាច។ បុរសវ័យ៥៤ឆ្នាំរូបនេះ ប្រកបមុខរបរនេះតាំងពីមានអាយុ១៩ឆ្នាំមក។ រយៈពេល៣៥ឆ្នាំមកហើយ លោក អៀច នៅបន្តប្រកបរបរលក់ទឹកកកឈូស។ របរនេះ មិនអាចក្លាយជាអ្នកមានបាននោះទេ តែគ្រាន់រួចផ្គត់ផ្គង់ម្ហូបអាហារក្នុងគ្រួសារ។
អ្នកលក់ទឹកកកឈូសរូបនេះ អះអាងថា ៖ « ពីមុនមានអ្នកលក់ទឹកកកឈូសច្រើន តែឥឡូវនៅសល់តែមួយពីរអ្នក [នៅសង្កាត់ស្ទឹងមានជ័យទី៣]»។ ពិតមែនហើយ សម័យឥឡូវនេះមិនសូវនិយមទទួលទានទឹកកកឈូសប៉ុន្មានទេ។ ពេលបច្ចុប្បន្ន អ្នកលក់បង្អែមភាគច្រើនប្រើផ្កាព្រឹល (ទឹកកកឈូសសុទ្ធ) សម្រាប់បង្អែមផ្សេងៗ។
ក្រៅពីផ្កាព្រឹលសុទ្ធ លោកតា អៀច ប្រើគ្រាប់ជី ស៊ីរ៉ូ និងទឹកដោះគោខាប់។ គាត់មិនប្រើទឹកស្ករទេ ពីព្រោះគាត់យកស៊ីរ៉ូទៅលាយជាមួយស្ករសតែម្ដង។ គាត់ប្រើស៊ីរ៉ូពណ៌លឿង ពណ៌ក្រហម និងពណ៌បៃតង។ ថ្ងៃណាក្ដៅ គាត់លក់ដាច់ ថ្ងៃណាភ្លៀង គាត់លក់មិនសូវដាច់។ ជាមធ្យម ក្នុងមួយថ្ងៃ គាត់ចំណេញបាន ៣ម៉ឺនរៀល។ ដើម្បីលក់ទឹកកកឈូសបាន គាត់ប្រើកង់រហូតមក។ ពេលបច្ចុប្បន្ន កង់ទី៦ហើយ ដែលគាត់បណ្ដើរ។
កង់ម៉ាក PHOENIX នេះ មានអាយុកាលច្រើនជាងលោកតាតែម្ដង។ គាត់និយាយថា មានម៉ូយតែម្នាក់គត់ ដែលមកទិញទឹកកកឈូសជាមួយចានរបស់ខ្លួន ដើម្បីកុំឱ្យបង្កើតសំរាម។ ក្រៅពីម្នាក់នេះ លោកតាលក់ទឹកកឈូសក្នុងកែវប្លាស្ទិក ជាមួយទុយយោប្លាស្ទិក និងស្លាបព្រាប្លាស្ទិក ខណៈកាលពីគាត់ចាប់ផ្ដើម ឆ្នាំ១៩៨៨ គាត់ប្រើតែចានក្រដាស និងស្លាបព្រាឈើ៕
© រក្សាសិទ្ធិដោយ thmeythmey.com