ជាតិ
វីដេអូ
វ៉ាលិសជាសម្ភារប្រើប្រាស់មួយប្រភេទ ដែលមិនសូវមានការវិវឌ្ឍរូបរាង
× ភ្នំពេញ៖ វ៉ាលិសបុរាណ ៥គ្រឿង ត្រូវបានគេដាក់តាំងលម្អ នៅក្នុងហាងកាហ្វេ TEMPLE ក្នុងខណ្ឌចំការមន រាជធានីភ្នំពេញ។ វ៉ាលិសបុរាណទាំងនេះ ត្រូវបានផលិតក្នុងកាលបរិច្ឆេទខុសៗគ្នា គឺនៅរវាងឆ្នាំ ១៩៣០ និងឆ្នាំ ១៩៧០ ហើយរូបរាងរបស់វាមិនមានការវិវឌ្ឍខុសគ្នាខ្លាំងនោះទេ។
សូមអញ្ជើញទស្សនាវីដេអូខាងក្រោមនេះ៖
វ៉ាលិស ដែលចាស់ជាងគេ គឺជាវ៉ាលិសមួយធ្វើពីកាតុងក្រាស់រឹង និងក្រណាត់ក្រាស់ពណ៌ប្រផេះ។ វាមានអាយុកាលប្រហែលជាជិត១០០ឆ្នាំ។ វាក៏ត្រូវបានដេរស្បែកបន្តិច ដើម្បីការពារផ្នែកខ្លះ។ ផ្នែកមួយចំនួនក៏ផលិតពីដែកដែរ ជាពិសេសសោសុវត្ថិភាពចំនួនពីរ។
មានវ៉ាលិសមួយទៀត ពណ៌ត្នោត ដែលធ្វើពីស្បែកដ៏ក្រាស់។ កែងទាំង៨របស់វា មានដែក ដើម្បីការពារ។ វ៉ាលិសកញ្ចាស់នេះ ក៏មានសោពីរដែរ សម្រាប់សុវត្ថិភាព។ ទំនងត្រូវបាន ផលិតវា នាទសវត្សរ៍ឆ្នាំ១៩៣០។
វ៉ាលិស ៣គ្រឿងចុងក្រោយ គឺជាប្រភេទវ៉ាលិសធ្វើពីអាលុយមីញ៉ូម។ ទាំងអស់មានកែងដែកបន្ថែម ដើម្បីការពារ។ វ៉ាលិសទាំងអស់នោះ ក៏មានសោពីរដូចគ្នាដែរ សម្រាប់សុវត្ថិភាព។ ត្រូវបានផលិតវា នាទសវត្សរ៍ឆ្នាំ១៩៦០ និង១៩៧០។
វ៉ាលិសពីសម័យមុន ជំនាន់ណា ក៏មានទំហំមិនសូវខុសពីវ៉ាលិសសម័យឥឡូវនេះទេ : បណ្ដោយ ៦០សង់ទីម៉ែត្រ ទទឹង ៤០សង់ទីម៉ែត្រ កម្រាស់ ២០សង់ទីម៉ែត្រ និងទម្ងន់ ២គីឡូក្រាម។ គឺជាទំហំល្មមដើម្បីយួរ និងដើរទៅ។ វ៉ាលិសសម័យបច្ចុប្បន្ន វាគ្រាន់តែខុសគ្នាត្រង់ថា វាធ្វើពីជ័រ មានកង់ ហើយស្រួលប្រើជាងប៉ុណ្ណោះ។
ពាក្យ វ៉ាលិស គឺជាពាក្យកម្ចីពីភាសាបារាំង។ ពាក្យបារាំង valise [valiz] មានអត្ថន័យដូចគ្នាថា ជាហិបតូចស្រាល មានដៃយួរបាន សម្រាប់ដាក់អីវ៉ាន់ស្រាលៗ៕
© រក្សាសិទ្ធិដោយ thmeythmey.com