សហព័ន្ធកីឡាទោចក្រយានកម្ពុជា នឹងរៀបចំការប្រកួតជ្រើសរើសជើងឯកថ្នាក់ជាតិ ឆ្នាំ២០២៣ នៅខេត្តកំពង់ឆ្នាំង ដែលនឹងប្រព្រឹត្ត នៅថ្ងៃទី៦-៨ ខែមករា ឆ្នាំ២០២៤។ លោក នូ ចំរើន បានបញ្ជាក់ប្រាប់ថា ខេត្តកំពង់ឆ្នាំង មានសក្ដានុពល សម្រាប់រៀបចំការប្រកួតនេះ។ 
 

ថ្លែងក្នុងសន្និសីទសារព័ត៌មាន នាថ្ងៃទី២ ខែមករា ឆ្នាំ២០២៤ នៅទីស្នាក់ការគណៈកម្មាធិការជាតិអូឡាំពិកកម្ពុជា អគ្គលេខាធិការរូបនេះ បាននិយាយដូច្នេះ ៖ «ចំណុចវិជ្ជមានខេត្ត គឺផ្លូវស្រស់ស្អាត ហើយជាផ្លូវទើបសាងសង។ នេះ គឺសម្រាប់កង់គួក។ សម្រាប់កង់ភ្នំ ស្ថានភាពផ្លូវ មានភាពបទបែនច្រើន និងផ្លូវចុះភ្នំ ដែលមានស្ថានភាពខុសពីភ្នំគូលែន ដែលសុទ្ធតែថ្ម។ យើង ចង់នាំកីឡាករឲ្យទៅតំបន់មានភាពខុសៗប្លែកពីគ្នា។ យើង ចង់បណ្ដុះអ្វី ដែលថ្មីសម្រាប់កីឡាករ ឲ្យប្រកួតប្រជែងគ្នា។»។
 

ក្រៅអំពីការសម្លឹងឃើញសក្ដានុពល និងអំណោយផលដល់ការរៀបចំការប្រកួតហើយ លោក នូ ចំរើន បានក៏បន្ថែមថា ការផ្លាស់ប្ដូទីតាំងប្រកួត គឺចង់ឲ្យកីឡាករ-កីឡាការិនី មានការប្រកួតប្រជែងកាន់តែខ្លាំង សម្រាប់ប្រកួតប្រជែងជាមួយអន្ដរជាតិ ក្នុងព្រឹត្តិការណ៍នានា ។ សម្រាប់ការប្រកួតលើកនេះ មាន ២វិញ្ញាសា ខុសពីឆ្នាំមុន តែកីឡាករ-កីឡាការិនីម្នាក់ៗ អាចប្រកួតបានតែ១វិញ្ញាសាប៉ុណ្ណោះ។
 

«ដូច្នេះ យើង មិនប្រកួតនៅទីតាំងដដែរទេ។ យើង ព្យាយាមឲ្យកីឡាករ-កីឡាការិនី មានការប្រកួតច្រើនដើម្បី ឲ្យបានត្រៀមសម្រាប់ស៊ីហ្គេម លើកទី៣៣ ឆ្នាំ២០២៥ នៅប្រទេសថៃ។»។ លោក ចំ រើន បានបន្ថែមបែបនេះ។
 

ការប្រកួតជើងឯកថ្នាក់ជាតិ ឆ្នាំ២០២៣ មានអ្នកចូលរួមកើនឡើង ៥ភាគរយ បើធៀបឆ្នាំមុន ដោយក្នុងឆ្នាំនេះ មានប្រតិភូជាគ្រូបង្វឹក កីឡាករ-កីឡាការិនី មកពីបណ្ដាខេត្ត-ក្រុង សរុប ២៩៨នាក់៕