ជម្លោះប្រដាប់អាវុធបានផ្ទុះឡើងនៅក្នុងរដ្ឋ Shan ភាគខាងជើងមីយ៉ាន់ម៉ា ចាប់តាំងពី ខែតុលាឆ្នាំមុន នៅពេលសម្ព័ន្ធក្រុមជនជាតិភាគតិចបានបើកការវាយប្រហារលើយោធា។ ខណៈការបាញ់បោះនៅតែបន្ត ប្រព័ន្ធផ្សព្វផ្សាយចិនមួយចំនួន នៅថ្ងៃទី៣ ខែមករា បានរាយការណ៍អំពីគ្រាប់កាំភ្លើងធំដែលបាញ់ចេញពីមីយ៉ាន់ម៉ា និងបានធ្លាក់ឆ្លងកាត់ព្រំដែនចិននៅទីក្រុងណានសាន (Nansan) នៃខេត្តយូណាន (Yunna)។ គ្រាប់កាំភ្លើង នេះបានផ្ទុះ និងបង្កឱ្យមនុស្សមួយចំនួនរងរបួស។

 

ទាក់ទងនឹងហេតុការណ៍ខាងលើ អ្នកនាំពាក្យក្រសួងការបរទេសចិន លោក  Wang Wenbin នៅថ្ងៃទី៤ ខែមករា បានឆ្លើយសំណួរក្នុងសន្និសីទប្រចាំថ្ងៃថា ចិនមិនពេញចិត្តយ៉ាង ខ្លាំងដែលជម្លោះប្រដាប់អាវុធបានបណ្តាលឱ្យពលរដ្ឋចិនរងរបួស។

 

«ចិនទាមទារម្តងទៀតថា ភាគីទាំងអស់នៅក្នុងជម្លោះភាគខាងជើងមីយ៉ាន់ម៉ា បញ្ឈប់ជាបន្ទាន់នូវអរិភាព និងចាត់វិធានការជាក់ស្តែងដើម្បីទប់ស្កាត់ហេតុការណ៍ដ៏អាក្រក់បន្ថែមទៀតដែលបង្កគ្រោះថ្នាក់ដល់សន្តិភាព និងភាពស្ងប់ស្ងាត់នៅតាមព្រំដែន»។ លោក Wang មានប្រសាសន៍បែបនេះរួចបន្តថា ​ចិននឹងចាត់វិធានការចាំបាច់ទាំងអស់ ដើម្បីការពារសុវត្ថិភាពជីវិត និងទ្រព្យសម្បត្តិរបស់ពលរដ្ឋខ្លួន។
 

យ៉ាងណាមិញ អ្នកនាំពាក្យរូបនេះមិន​បាន​បញ្ជាក់​អំពីចំនួន​មនុស្ស​​ដែលបានស្លាប់ ឬ​រង​របួស​ក្នុង​ឧបទ្ទវហេតុ​នោះ​ទេ។

 

កាលពីខែធ្នូ ឆ្នាំ ២០២៣ ក្រុងប៉េកាំងបានអះអាងថា បានជួយសម្របសម្រួលកិច្ចចរចារវាង ភាគីទាំងពីរ ហើយសម្រេចបានកិច្ចព្រមព្រៀងគ្នាលើបទឈប់បាញ់បណ្តោះអាសន្ន។ យ៉ាងណាមិញ ការប៉ះទង្គិចគ្នានៅតែបន្តនៅក្នុងផ្នែកខ្លះនៃរដ្ឋ Shan ហើយស្ថានទូតចិនកាល ពីសប្តាហ៍មុនបានស្នើឱ្យពលរដ្ឋរបស់ខ្លួនជម្លៀសទៅតំបន់តាមបណ្តោយព្រំដែនរួមគ្នា ដោយ បារម្ភពីហានិភ័យសន្តិសុខ៕