នាពិធីសំណេះសំណាល ជាមួយសិស្សនិទ្ទេសA នៅមជ្ឈមណ្ឌលOCIC យុវជន គុណ សុសក្ករ៉ា រួមទាំងគ្រួសារ ក៏មានវត្តមានផងដែរ។ ស្រ្តី​វ័យ​ជាង ៤០ឆ្នាំរូបនេះ បាន​ធ្វើដំណើរពីខេត្តតាកែវ​ ដើម្បីអបអរកូនទទួលរង្វាន់ពី​នាយករដ្ឋមន្រ្តី​។ 
 

កំពុងអង្គុយរង់​ចាំកូន និងសា្វមី នៅខាងក្រៅពិធី អ្នកស្រី សុភាព បានផ្តល់បទសម្ភាសជាមួយសារព័ត៌មានThmey Thmey 25 ថា លទ្ធផលនិទ្ទេសA ដែលកូនប្រុសទទួលបាននេះ គឺមិនខកបំណងនោះឡើយ ព្រោះ សុសក្ករ៉ា មានការប្រឹងប្រែងជាខ្លាំង រហូតធ្វើឱ្យម្តាយ ភ័យបារម្ភនឹងការសិក្សារបស់កូន។
 

«គាត់រៀនពេក ដល់យើងខ្លាចថាខួរក្បាលគាត់ទ្រាំទ្រអត់បាន ព្រោះយប់ឡើងឡគាត់រៀនរហូតដេកលើតុហ្នឹង។ ខ្ញុំតែងលួចមកមើលកូនរហូត។» អ្នកស្រី សារី សុភាព ពោលដូច្នេះ។
 

បន្ទាប់ពីដឹងលទ្ធផលបាក់ឌុបរបស់កូន ទឹកភ្នែកម្តាយក៏បានស្រក់ ព្រោះអររំភើប ក្រោយកូនប្រុសប្រឡងយកនិទ្ទេសជាទីគាប់ចិត្ត។ អ្នកស្រី បន្តថា កូនប្រុសខ្លូន សង្វាតរៀនតាំងពីកុមារភាពមកម្ល៉េះ ហើយទទួលចំណាត់ថ្នាក់ល្អរាល់ខែ។ជា មួយគ្នានេះ អ្នកស្រី សារី សុភាព ក៏បានជំរុញឱ្យឪពុកម្តាយ លើកទឹកចិត្តកូនៗ ដើម្បីបាននិទ្ទេសល្អ ដូចកូនខ្លួនដូច្នេះដែរ៕