មិនខុសពីឆ្នាំមុនៗឡើយ ពានរង្វាន់ព្រះនាងឥន្ទ្រទេវី ធ្វើឡើងក្រោមប្រធានបទ “សេរី” ដោយផ្ទៃរឿងទាំងមូល ត្រូវមានលក្ខណៈសមស្រប។ អ្នកនិពន្ធត្រូវប្រកាន់យកខ្លឹម៣ ដាក់ក្នុងសាច់រឿងរបស់ខ្លួន។ ទី១គឺអត្ថន័យ ដែលមាន៣ចំណុចតូចៗបន្ថែមទៀត គឺសច្ចធម៌ សីលធម៌ និងគុណធម៌។ ទី២ អត្ថរូប ក៏ត្រូវមាន៣ចំណុចទៀតដូចគ្នា គឺវិធីតែង រចនាបទ និងសីល្ប៍សោភ័ណ។ និងទី៣ អត្ថរស ដែលមាន៣ចំណុចតូចៗដែរ គឺបង្ហាញឱ្យឃើញពីការអប់រំ ការអភិវឌ្ឍ និងការរក្សាតម្លៃអត្តសញ្ញាណជាតិ។
 

អត្ថបទរឿង និងកំណាព្យ ត្រូវសរសេរលើខ្នាតក្រដាស A4 ចាប់ពី១៥-៣០ទំព័រ។ អក្សរត្រូវវាយដោយកំព្យូទ័រ Font យូនីកូត Khmer OS Simreap ទំហំ១២។ អក្ខរាវិរុទ្ធ យកតាមវចនានុក្រមខ្មែរ សម្ដេចព្រះសង្ឃរាជ ជួន ណាត ជោតញ្ញាណោ និងសេចក្ដីសម្រេចរបស់ ក្រុមប្រឹក្សាជាតិភាសាខ្មែរ។
 

ជយលាភីលេខ១-៣ ប្រលោមលោក៣រូប និងកំណាព្យរឿង៣រូប ទទួលបានពានរង្វាន់១ អមដោយទឹកប្រាក់។ រង្វាន់កិត្តិយសលេខ៤-៥ ប្រលោមលោក២រូប និងកំណាព្យរឿង២រូប ទទួលបានបណ្ណសរសើរ១ អមដោយទឹកប្រាក់។
 

សូមបញ្ជាក់ថា ឆ្នាំ២០២៤ គឺជាឆ្នាំទី២៤ នៃការប្រឡងស្នាដៃ តែងនិពន្ធប្រលោមលោក និងកំណាព្យរឿង ដែលរៀបចំឡើងដោយក្រសួងវប្បធម៌ និងវិចិត្រសិល្បៈ។ ពានព្រះនាងឥន្ទ្រទេវី គឺជាពានរង្វាន់មួយ ដែលមានវ័យចំណាស់ជាងគេ គឺចាប់បដិសន្ធិឡើង តាំងពីឆ្នាំ១៩៦០ ក្នុងសម័យសង្គមរាស្ត្រនិយម ហើយមានវត្តមានរហូតមកដល់ពេលបច្ចុប្បន្ន​។
 

សាធារណជន ដែលចាប់អារម្មណ៍ ក្នុងការតែងនិពន្ធ ហើយមានបំណងចូលរួមប្រឡង សូមបញ្ជូនស្នាដៃតែងនិពន្ធរបស់ខ្លួន ទៅនាយកដ្ឋានសៀវភៅ និងការអាន អគាលេខ៤៤ ផ្លូវសម្ដេចប៉ាន (លេខ២១៤) សង្កាត់បឹងរាំង ខណ្ឌដូនពេញ រាជធានីភ្នំពេញ រៀងរាល់ម៉ោងធ្វើការ ចាប់ពីថ្ងៃជូនដំណឹងនេះ រហូតដល់ថ្ងៃទី៣០ ខែមិថុនា ឆ្នាំ២០២៤ វេលាម៉ោង ១៧:០០នាទីជាកំហិត។ ឬផ្ញើតាម Telegram កញ្ញា ញ៉ឹក​ ថារី ០១២ ៨០១ ១២២។ លោក សំអាត សិលា ០៧៨ ៦៦ ៨៩ ៧៧។ លោក កុក រស់ ០១១ ៨៥ ០០ ៩៤។