ក្នុងវីដេអូរយៈពេលប្រមាណជាង៣នាទី អ្នកសារព័ត៌មានជាច្រើនរូបបានទាស់ពាក្យសម្ដីនឹងគ្នា។  អ្នកខ្លះបានចោទសួរគ្នាថា មកពីស្ថាប័នណា?  និងបានថតវីដេអូគ្នាទៅមក ដែលបានបង្កភាពរញ៉េរញ៉ៃលើសពីករណីគ្រោះថ្នាក់ចរាចរណ៍ទៅវិញ ។ តាមរយៈសកម្មភាពនៃវីដេអូដែលត្រូវបានចែកចាយក្នុងបណ្ដាញសង្គម  បានធ្វើឱ្យមហាជនរិះគន់ដល់វិជ្ជាជីវៈរបស់អ្នកសារព័ត៌មានជាខ្លាំង។ 
 

ក្នុងករណីនេះ លោក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាក់ថាករណីគ្រោះថ្នាក់នេះ ម្ចាស់រថយន្តទាំងពីរបានសម្រួលគ្នា ដោយសមត្ថកិច្ចបានដោះស្រាយរួចរាល់ហើយ។ ប៉ុន្តែ លោក ជួន ណារិន្ទ បានចោទសំណួរទៅមហាជនអំពីភាពរញ៉េរញ៉ៃក្នុងហេតុការណ៍នេះ។ 
 

«ករណីរថយន្ត និងរថយន្តប៉ះគ្នា ម្ចាស់ទាំងពីរព្រមព្រៀងគ្នាប្រគល់ជូនសមត្ថកិច្ចជំនាញយកទៅដោះស្រាយ។ សំខាន់សូមពិចារណាមើលក្នុងរូបភាពនេះឈ្លោះគ្នារឿងអ្វី? » នេះជាការលើកឡើងរបស់ លោក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ។ 
 

ក្នុងការស្រាយចម្ងល់របស់មហាជន ភ្លាមៗនោះរដ្ឋមន្រ្តីក្រសួងព័ត៌មាន  លោក នេត្រ ភក្រ្តា បានបញ្ចេញមតិក្នុងវីដេអូ ដោយលោកបានអះអាងថា អង្គភាពអ្នកសារព័ត៌មានទាំងនោះគ្មានចុះបញ្ជីស្របច្បាប់ឡើយ ហើយលោកនឹងកោះហៅអ្នកសារព័ត៌មានទាំងនោះមកអប់រំ។ 
 

លោក នេត្រ ភក្រ្តា  បានបញ្ជាក់ដូច្នេះ៖ «អង្គភាពគាត់មិនទាន់បានចុះបញ្ជីស្របច្បាប់នៅឡើយ។ ខ្ញុំបានណែនាំឱ្យមន្រ្តីជំនាញកោះហៅដើម្បីណែនាំលើក្រមសីលធម៌វិជ្ជាជីវៈ និងការគោរពច្បាប់»៕