ជំងឺផ្ដាសាយ ជាជំងឺដែលយើងគ្រប់គ្នាតែងតែកើតញឹកញាប់ ជាពិសេសនៅពេលដែលប្រព័ន្ធការពាររាងកាយរបស់យើងចុះខ្សោយ។

នៅពេលកើតជំងឺនេះម្ដងៗ យើងតែងតែមានអាការពិបាកនៅក្នុងខ្លួន ដូចជាក្ដៅខ្លួន ស្រៀវស្រាញ ហៀរសំបោរ និងក្អកជាដើម។ បើទោះបីជាការឆ្ពុងមិនអាចជួយព្យាបាលនូវជំងឺគ្រុនផ្ដាសាយបាន ប៉ុន្ដែវាអាចធ្វើការជួយសម្រួលដល់អាការមួយចំនួនរបស់គ្រុនផ្ដាសាយបាន។

 

 - ការឆ្ពុងអាចជួយសម្រួលដល់បញ្ហាក្អក ដោយវាអាចពង្រាវស្លេស្ម៍ដែលមាននៅប្រព័ន្ធផ្លូវដង្ហើម ដូចជាក្នុងច្រមុះ បំពង់ក និងសួតជាដើម។ 

- វាអាចជួយបន្ធូរបន្ថយនូវអាការរលាកច្រមុះ ឬការឡើងហើមនៃសរសៃឈាមតូចៗនៅផ្លូវដង្ហើម និងអាចធ្វើឱ្យធូរស្រាលនូវអាការតឹងច្រមុះផងដែរ។ 

- វាអាចអនុញ្ញាតឱ្យចំហាយទឹកក្ដៅដែលភាយមក មានសភាពក្ដៅឧណ្ហៗ ផ្ដល់ជាសំណើមទៅដល់ផ្លូវដង្ហើម និងកាត់បន្ថយនូវអាការឈឺកបាន។ 

- លើសពីនេះ ការឆ្ពុងអាចជួយសម្រួលដល់ដំណេកផងដែរ ដោយការគេងបានគ្រប់គ្រាន់ជាកត្តាសំខាន់ដើម្បីឱ្យខ្លួនប្រាណយើងអាចប្រយុទ្ធប្រឆាំងជាមួយនឹងជំងឺគ្រុនផ្ដាសាយបាន។ 

 

១. ដាំទឹកឱ្យពុះរួចចាក់ចូលក្នុងឆ្នាំង ឬចានដែក (អ្នកអាចបន្ថែមប្រេងក្រអូបក៏បាន)

២. គ្របក្រណាត់លើក្បាល រួចឱនមុខទៅនឹងឆ្នាំង ឬចានដែកនោះក្នុងចម្ងាយសមល្មម

៣. ចៀសវាងការឱនមុខជិតពេក ដែលអាចឱ្យមានការរលាក

៤. បិទភ្នែករបស់អ្នក និងដកដង្ហើមវែងៗស្រូបយកចំហាយទឹកនោះ

៥. អ្នកគួរឆ្ពុងរយៈពេលពី ១០-១៥នាទី៕
 

 

សម្របសម្រួលដោយ៖ ឱសថការី ឈាង សីហាក់ និង លីណ្ណា ជិញជិញ