តាមកាសែត Bangkok Post នៅវេលាម៉ោង ៣និង៣០នាទីរសៀល ថ្ងៃទី ១៧ ខែមករា រោងចក្រកាំជ្រួចមួយកន្លែងនៅឃុំ Sala Khao ស្រុក Muang ខេត្ត Suphan Buri ភាគកណ្តាលប្រទេសថៃ ភ្លាមៗបានផ្ទុះឡើងដោយបានសម្លាប់មនុស្ស ២៣នាក់ ។

 

ការ​ផ្ទុះ​បាន​រាលដាល​ក្នុង​ចម្ងាយ​ពី ​៥០​ទៅ​១០០​ម៉ែត្រ សាកសព​ជន​រង​គ្រោះ​ត្រូវ​បាន​រាយប៉ាយ​គ្រប់​ទីកន្លែង ។ យោង​តាម​ការ​ស៊ើបអង្កេត​បឋម ប៉ូលិស​មូលដ្ឋាន​បាន​បញ្ជាក់​ថា មនុស្ស​ ២៣នាក់​បាន​ស្លាប់ ក្នុងនោះមានស្រ្តី​ ៧នាក់និងបុរស ១៦នាក់។

 

ទីតាំងកើតហេតុខាងលើ ជារោងចក្រដែលផលិតផាវប្រើសម្រាប់ដេញសត្វស្លាប និងការពារដំណាំពីការបំផ្លាញដោយសត្វស្លាប។

 

គួរកត់សម្គាល់ថា កន្លែងផ្ទុះកាំជ្រួចនេះ ធ្លាប់មានឧប្បត្តិហេតុស្រដៀងគ្នាកាលពីខែវិច្ឆិកា ឆ្នាំ២០២២ ដែលបណ្តាលឲ្យមនុស្សម្នាក់ស្លាប់ និង៣នាក់ទៀតរងរបួស។

 

កាលពីខែកក្កដា ឆ្នាំ២០២៣ មានព្រឹត្តិការណ៍ផ្ទុះឃ្លាំងកាំជ្រួច ក្នុងតំបន់ Sungai Kolok ខេត្ត Narathiwat ភាគខាងត្បូងប្រទេសថៃ ដែលបណ្តាលឲ្យមនុស្ស ១០នាក់ស្លាប់ និង១២០នាក់រងរបួសផងដែរ៕