និស្សិត គាវ សំណាង គឺជាអតីតសិស្សនិទ្ទេសA ឆ្នាំ២០២៣ ដែលមានលំដាប់ពិន្ទុ ៩៩.៩៩៦  និងជាសិស្សពូកែគណិតវិទ្យាចំណាត់ថ្នាក់លេខ២ទូទាំងប្រទេស។ សិស្សពូកែរូបនេះ បានចែករំលែកបទពិសោធន៍រៀនសូត្រ ដើម្បីទទួលបានលទ្ធផលល្អ ដោយសិស្សគួររៀបចំផែនការរៀនឱ្យបានច្បាស់លាស់ចាប់តាំងពីដើមឆ្នាំទៅ។  

 

អតីតសិស្សពូកែរូបនេះ សំណាង បានរៀបរាប់ដូច្នេះ៖ «ដើមឆ្នាំសិស្សត្រូវមើលមេរៀនឱ្យយល់ខ្លះ និងមើលឱ្យបានស៊ីជម្រៅ។​​​ នៅពេលពាក់កណ្តាលឆ្នាំ  សល់២ឬ៣ខែមុនប្រឡងយើងរំលឹកមេរៀនឡើងវិញ។ ក្នុងនោះពេលរៀនជាមួយគ្រូគួរព្យាយាមចងចាំឱ្យបានល្អ រួចយកមករំលឹកអនុវត្តន៍និងស្រាវជ្រាវបន្ថែមដើម្បីយល់កាន់តែច្បាស់»។

 

ជាសិស្សអារូបករណ៍នៃវិទ្យាស្ថានបច្ចេកវិទ្យាកម្ពុជា ជំនាញវិស្វករសំណង់ យុវជន សំណាង បានបន្ថែមថា នៅពេលប្រឡងប្រចាំខែ សិស្សគួរតែព្យាយាមអស់ពីសមត្ថភាព ដើម្បីវាស់ស្ទង់ចំណេះរបស់ខ្លួន។ ម្យ៉ាងទៀត ការប្រឡងប្រចាំខែនេះ ប្រៀបដូចជាកញ្ចក់ឆ្លុះមើលពីចំណុចខ្វះខាតផងដែរ។ 

 

ជាមួយគ្នានេះ កញ្ញា ប៉ាង ធីរ៉ូម៉ូនីតា អតីតសិស្សនិទ្ទេសA ឆ្នាំ២០២២  ក៏បានចែករំលែកបទពិសោធន៍សិក្សាក្នុងការទទួលបាននិទ្ទេសល្អថា​

ការរៀបចំផែនការ និងដាក់គោលដៅឱ្យបានច្បាស់ពីដើមឆ្នាំជាកត្តាចម្បង ក្នុងការចាប់យកនិទ្ទេសA ។ បន្ថែមពីនេះសិស្សត្រូវបែងចែកពេលវេលារៀនឱ្យបានត្រឹមត្រូវ ដើម្បីរៀនបានគ្រប់មុខវិទ្យា  និងមានពេលវេលាសម្រាកគ្រប់គ្រាន់ផងដែរ។

 

«ការដាក់វិន័យតឹងតែង ទៅលើការប្រឡងប្រចាំខែ ឬប្រចាំឆមាស ធ្វើឱ្យសិស្សខំប្រឹងរៀនមានមានស្មារតីទំនួលខុសត្រូវខ្ពស់ និងមានជំនឿចិត្តលើខ្លួនឯង មិនថាការប្រឡងបាក់ឌុប ឬប្រឡងប្រជែងនានា» ។ នេះជាការលើកឡើងរបស់ កញ្ញា ប៉ាង ធីរ៉ូម៉ូនីតា។

 

សិស្សពូកែទាំងពីរខាងលើនេះ ចាត់ទុកនិទ្ទេសA ជារង្វាន់ដ៏អស្ចារ្យមួយសម្រាប់សិស្សានុសិស្ស និងអាណាព្យាបាល ដែលនាំមកកិត្តិយស និងឱកាសអាហារូបករណ៍ជាច្រើនជម្រើសដល់សិស្ស។  យុវជន យុវតីទាំងពីរ  ក៏បានលើកទឹកចិត្តដល់សិស្សថ្នាក់ទី១២ឱ្យខិតខំប្រឹងប្រែងរៀនសូត្រ ដើម្បីទទួលលទ្ធផលល្អ និងសម្រេចគោលដៅរបស់ខ្លួន៕