ជាតិ
កំណត់សមាជិកក្រុមប្រឹក្សារាជធានី-ខេត្ត ៥៥៩នាក់ និងក្រុមប្រឹក្សាក្រុង ស្រុក ខណ្ឌ ៣៦៤១នាក់ សម្រាប់អណត្តិទី៤ កិច្ចប្រជុំក្រុមប្រឹក្សាខេត្តព្រះវិហារដែលដឹកនាំដោយលោក ប្រាក់ សុវណ្ណ
× សម្តេចនាយករដ្ឋមន្ត្រី ហ៊ុន ម៉ាណែត បានចេញអនុក្រឹត្យស្តីពីការកំណត់ចំនួនសមាជិកក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ សម្រាប់អាណត្តិទី៤។ តាមអនុក្រឹត្យដែលចុះកាលពីថ្ងៃទី១២ ខែមករា ក្រុមប្រឹក្សារាជធានី-ខេត្ត មានចំនួនសរុប៥៥៩នាក់ និងក្រុមប្រឹក្សាក្រុង ស្រុក ខណ្ឌ មាន៣៦៤១នាក់។
ចំនួនក្រុមប្រឹក្សារាជធានី-ខេត្ត មានចន្លោះ១៥ទៅ២៧នាក់។ ដោយអនុលោមតាមមាត្រា១៨ថ្មី នៃច្បាប់ស្តីពីវិសោធនកម្មច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ រាជធានីភ្នំពេញ មានសមាជិកក្រុមប្រឹក្សាចំនួន២៧នាក់ ដូច ខេត្តកណ្តាល កំពង់ចាម បាត់ដំបង ព្រៃវែង សៀមរាប និងតាកែវ។
ខេត្តត្បូងឃ្មុំ បន្ទាយមានជ័យ កំពង់ស្ពឺ កំពង់ធំ និងកំពត មានសមាជិកក្រុមប្រឹក្សាចំនួន២៥នាក់, កំពង់ឆ្នាំង និងស្វាយរៀង មាន២៣នាក់, ពោធិ៍សាត់ ក្រចេះ មាន២១នាក់ រីឯបណ្តាខេត្តដែលមានសមាជិកក្រុមប្រឹក្សាចំនួន១៩នាក់ រួមមាន ខេត្តព្រះសីហនុ កោះកុង ព្រះវិហារ រតនគិរី និងឧត្តរមានជ័យ។ ខេត្តស្ទឹងត្រែង មានចំនួនក្រុមប្រឹក្សា ១៧នាក់ រីឯ ខេត្តមណ្ឌលគិរី ប៉ៃលិន និងកែប មានសមាជិកក្រុមប្រឹក្សា១៥នាក់ដូចៗគ្នា។
តាមមាត្រា១៨ថ្មី ដដែល ខណ្ឌទាំង១៤ក្នុងរាជធានីភ្នំពេញ សមាជិកក្រុមប្រឹក្សាចន្លោះពី១៧នាក់ទៅ២១នាក់ ដែលដូចគ្នាផងដែរសម្រាប់ក្រុង-ស្រុកនៅខេត្តកណ្តាល កំពង់ចាម បន្ទាយមានជ័យ។ បណ្តាក្រុង-ស្រុកនៅខេត្តបាត់ដំបង ព្រៃវែង តាកែវ ត្បូងឃ្មុំ កំពង់ស្ពឺ កំពង់ធំ កំពង់ឆ្នាំង ស្វាយរៀង ក្រចេះ មានសមាជិកក្រុមប្រឹក្សាពី១៥ ទៅ២១នាក់។
ខេត្តដែលមានសមាជិកក្រុមប្រឹក្សាក្រុង ស្រុក ចន្លោះពី១៣នាក់ទៅ២១នាក់ មាន ខេត្តសៀមរាប កំពត ពោធិ៍សាត់។ ក្រុង-ស្រុកនៅព្រះវិហារមានសមាជិកក្រុមប្រឹក្សាពី១១ទៅ១៧នាក់ និងពី១១ទៅ១៥នាក់សម្រាប់ក្រុង-ស្រុកនៅខេត្តរតនគិរី និងស្ទឹងត្រែង។
នៅមណ្ឌលគិរី ក្រុង-ស្រុក មានសមាជិកក្រុមប្រឹក្សាពី១១ ទៅ១៣នាក់។ ក្រុងប៉ៃលិន និងស្រុកសាលាក្រៅ នៃខេត្តប៉ៃលិន មានសមាជិកក្រុមប្រឹក្សា១៥នាក់រៀងៗខ្លួន រីឯក្រុងកែប និងស្រុកដំណាក់ចង្អើរ នៃខេត្តកែប មានសមាជិកក្រុមប្រឹក្សា១៣នាក់ ដូចគ្នា៕
© រក្សាសិទ្ធិដោយ thmeythmey.com