យុទ្ធនាការប្រមូលសំណល់ប្លាស្ទិករដូវទឹកសម្រកបឹងទន្លេសាបប្រចាំឆ្នាំ២០២៤នេះ មានអ្នកចូលរួមជិត១ពាន់នាក់ នៅសហគមន៍កំពង់ឃ្លាំង ខេត្តសៀមរាប។ យុទ្ធនាការនៅឆ្នាំនេះ ចាប់ផ្ដើមតាំងពីថ្ងៃទី២៧ មករា ក្រោមប្រធានបទ «សហគមន៍យើងស្អាត ទន្លេសាបបៃតងស្អាត ដោយគ្មានប្លាស្ទិក!»។

 

បើតាមលោក ស៊ា សុផល ប្រធានអង្គការមូលនិធិទំពាំងស្នងឫស្សី ចលនាយុទ្ធនាការនេះនឹងបន្តសកម្មភាពសម្អាតរយៈពេល៦ខែ នៅគ្រប់សហគមន៍នានា ជាប់មាត់បឹងទន្លេសាប ដូចជាសហគមន៍កំពង់ភ្លុក ចុងឃ្នៀស និងសហគមន៍មេជ្រៃ។ 
 

លោកបន្តទៀតថា យុទ្ធនាការនេះ ក៏នឹងអាចពង្រីកវិសាលភាពការងារសម្អាត ដល់តំបន់ព្រែកទាល់ក្នុងខេត្តបាត់ដំបង និងតំបន់ផ្សេងៗទៀតជុំវិញបឹងទន្លេសាប។ យុទ្ធនាការនេះ នឹងបន្តរហូតដល់ថ្ងៃអបអរទិវាបរិស្ថានជាតិ និង បរិស្ថានពិភពលោក ៥មិថុនា ដែលជាថ្ងៃកំណត់ការបិទយុទ្ធនាការសម្អាតបរិស្ថាននារដូវទឹកសម្រកផងដែរ។ 
 

គួរជម្រាបផងដែរថា នេះជាឆ្នាំទី៦ហើយ ដែលអង្គការមូលនិធិទំពាំងស្នងឫស្សី បានរៀបចំយុទ្ធនាការនេះ ដោយសហការជាមួយមន្ទីរបរិស្ថាន សមាគមទេសចរណ៍កម្ពុជា (CATA) អាជ្ញាធរមូលដ្ឋាន សហគមន៍ទេសចរណ៍ ក្រុមហ៊ុនឯកជន អង្គការ សិស្សានុសិស្ស និងពលរដ្ឋសហគមន៍ ជាដើម៕