កីឡាករ រិន ដេវីត បានដាក់ពាក្យបណ្ដឹងភ្លាមៗ ក្រោយមិនព្រមទទួលយកការដាក់ពិន្ទុរបស់ចៅក្រម ដែលសម្រេចឲ្យខ្លួនចាញ់ ធន់ អៀងឡៃ ក្នុងការប្រកួតដណ្ដើមខ្សែក្រវ៉ាត់ទម្ងន់ ៦០គីឡូក្រាមនេះ។
 

លោក ខូវ ឆាយ បាននិយាយថា​ ការដាក់បណ្ដឹងនេះ គឺមិនខុសពីនីតិវីធី ដែលបានចងក្រងឡើយ ព្រោះ រិន ដេវីត បានប្រតិកម្ម និងដាក់ពាក្យបណ្ដឹងភ្លាមៗ ក្រោមរយៈពេល ៣០នាទី ក្រោយការប្រកាសលទ្ធផល។ ថ្នាក់ដឹកនាំសហព័ន្ធរូបនេះ បានបន្ថែមថា គណៈកម្មាធិការ និងមន្ដ្រីសហព័ន្ធ បានសិក្សាពីអង្គហេតុ ហើយពិនិត្យមើលវីដេអូឡើងវិញ ទើបត្រូវការចំណាយពេល ៤ថ្ងៃ ដើម្បីបញ្ចប់ករណីនេះ កាលពីថ្ងៃទី១២ កុម្ភៈ។
  
អនុប្រធានសហព័ន្ធរូបនេះ បានពន្យល់បន្ថែមថា ការប្រកាសលទ្ធផលលើសង្វៀន គឺមិនអាចកែប្រែបានទេ ព្រោះជាច្បាប់សកល នៃកីឡា ប៉ុន្ដែចំពោះយុត្តិធម៌ ត្រូវតែរកជូនកីឡាករ  ដើម្បីទទួលបានទំនុកចិត្តពីអ្នកគាំទ្រប្រដាល់ទាំងអស់។
 

 

«នៅក្នុងកីឡា ច្បាប់សកល មិនមានការកែប្រែលទ្ធផលទេ។ ទោះបាល់ទាត់ឧទាហរណ៍ថា បាល់ប៉េណាលទីខុស ទោះរកឃើញថា អាជ្ញាកណ្ដាលខុស យើងតវ៉ាបន្ទាប់ពីការប្រកួតទៅ គេនឹងយកវីដេអូមកមើលឡើងវិញ។ បើគេមើលឃើញថា បាល់នោះកាត់សេចក្ដីខុសមែន ប៉ុន្ដែបើបាល់ប៉េណាល់ទីចូលហើយ គេមិនដែលលុបលទ្ធផលនោះទេ។ ជាច្បាប់សកលរបស់កីឡា។

យើងមានការស្នើពីមហាជន ហើយដើម្បីឲ្យមានតម្លាភាព ដល់កីឡាករ។ យើង សុខចិត្តដកខ្សែក្រវ៉ាត់មកវិញ ហើយឲ្យវាយម្ដងទៀត។»។ លោក ខូវ ឆាយ បាននិយាយដូច្នេះ។
 

ដោយឡែក ចៅក្រុមចំនួន៣នាក់ក្នុងចំណោម ៥រូប ដែលសហព័ន្ធប្រដាល់គុនខ្មែរ រកឃើញភាពមិនប្រក្រតីក្នុងការដាក់ពិន្ទុ នឹងត្រូវដាក់ពិន័យ។ ចំពោះចៅក្រមរងការដាក់ពិន័យនោះ លោក ខូវ ឆាយ សូមមិនបញ្ចេញឈ្មោះឡើយ ដោយគ្រាន់តែប្រាប់ថា ពួកគេទាំង៣រូប អាចឈានដល់ការព្យួរការងារមួយរយៈ។ រីឯការប្រកួតដណ្ដើមខ្សែក្រវ៉ាត់ រិន ដេវីត និង ធន់ អៀងឡៃ  ដែលត្រូវរៀបចំឡើងវិញនោះ ក៏មិនទាន់បានកំណត់ពេលវេលានៅឡើយដែរ៕