បើតាមការប្រកាស់របស់គណៈកម្មាធិការជាតិ​អូឡាំពិក​កម្ពុជា (NOCC) គណៈកម្មាធិកា NOCC រួមជាមួយក្រសួង​អប់រំ យុវជន និង​កីឡា ត្រៀម​ខ្លួនរួចរាល់ហើយដើម្បី​រៀបចំ និង​ចូល​រួម​ប្រកួត​ព្រឹត្តិការណ៍កីឡា​សំខាន់​៣ ​​ក្នុង​ឆ្នាំ២០២៤ ដែល​​​​ជា​ឆ្នាំ​ ​គ្មាន​ព្រឹត្តិការណ៍​កីឡា​ស៊ីហ្គេម។ 
 

លោក វ៉ាត់ ចំរើន អគ្គលេខាធិការ NOCC បានអះអាងរួចហើយថានឹងមានអត្តពលិកកម្ពុជា ចន្លោះពី៣ ទៅ៥នាក់ រួមជាមួយមន្ត្រីមួយចំនួន ទៅចូលរួមការប្រកួតកីឡាអូឡាំពិកប៉ារីស ឆ្នាំ២០២៤។ កម្ពុជា នឹងត្រូវមានអត្តពលិកប្រកួតជម្រុះដើម្បីដណ្តើមកៅអីទៅអូឡាំពិក។ យ៉ាងណាក៏ដោយ លោក វ៉ាត់ ចំរើន បញ្ជាក់ប្រាប់អ្នកសារព័ត៌មានថា ទោះអត្តពលិកកម្ពុជាធ្លាក់វគ្គជម្រុះ ក៏នៅសល់សិទ្ធអនុគ្រោះដើម្បីបង្ហាញមុននៅប្រទេសបារាំងដែរ។
 

អូឡាំពិករដូវក្តៅក្រុងប៉ារីស នឹងចាប់ផ្តើមការប្រកួតផ្លូវការពីថ្ងៃទី២៦ កក្កដា ដល់ថ្ងៃទី១១ ខែសីហា ឆ្នាំ២០២៤។
 

សម្រាប់ ព្រឹត្តិការណ៍កីឡា​ក្នុង​សាល និង​យុទ្ធគុន​ចម្រុះអាស៊ី​ លើក​ទី​៦​ ដែលនឹងធ្វើឡើងនៅក្រុងបាងកក ប្រទេសថៃឯណោះវិញ NOCC ក៏នឹងបញ្ជូនកីឡាករ កីឡាការិនី ប្រមាណ១០០នាក់ចូលរួមផងដែរ។
 

ការសម្រេចទៅចូលរួមនេះ ធ្វើឡើងបន្ទាប់ពី NOCC ក្រោមការដឹកនាំរបស់លោក វ៉ាត់ ចំរើន បានទៅចូលរួមកិច្ចប្រជុំនាយបេសកកម្មដែលធ្វើឡើងក្នុងក្រុងបាងកក ពីថ្ងៃទី៣ដល់ទី៥ ខែមីនា តបតាមការអញ្ជើញរបស់ក្រុមប្រឹក្សាអូឡាំពិកអាស៊ី (OCA)។
 

ព្រឹត្តិការណ៍ 6th Asian Indoor & Martial Games 2024 ដែលមាន ៣៨ប្រភេទកីឡា នឹងធ្វើឡើងនៅថ្ងៃទី២១ ដល់៣០ ខែវិច្ឆិកា ឆ្នាំ២០២៤ ក្នុងក្រុងបាងកក។
 

ក្រៅពីចូលរួមព្រឹត្តិការណ៍ពិភពលោក និងកម្រិតតំបន់អាស៊ី ស្ថាប័ន NOCC នឹងត្រូវមានភារកិច្ចរៀបចំកីឡាជាតិលើកទី៤ និងកីឡាជាតិជនពិការ លើកទី២ របស់ខ្លួនផងដែរ នៅក្នុងឆ្នាំ២០២៤៕