ក្រសួងការបរទេសកម្ពុជា ឱ្យដឹងថា លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រី ការបរទេស និងសហប្រតិបត្តិការអន្តរជាតិ និងលោក កុមឺរ៉ា ម៉ាសាហ៊ីរ៉ូ (KOMURA Masahiro) អនុរដ្ឋមន្ត្រីក្រសួងការបរទេសជប៉ុន បានចុះហត្ថលេខាលើលិខិតប្តូរសារ និង ឯកសារពាក់ព័ន្ធស្ដីពីការផ្តល់ឥណទានសម្បទាននេះ នៅថ្ងៃទី១៣ ខែមីនា ឆ្នាំ២០២៤ នៅទីស្តីការក្រសួងការបរទេស។ 

 

ការផ្តល់ឥណទានសម្បទាននេះ បញ្ជាក់ពីការប្តេជ្ញាចិត្តឥតងាករេរបស់ជប៉ុន ក្នុងការគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ចំពោះការជំរុញការអភិវឌ្ឍសង្គម-សេដ្ឋកិច្ច។ សេចក្តីប្រកាសព័ត៌មានរបស់ក្រសួងការបរទេសកម្ពុជា ​បញ្ជាក់ដូច្នេះ មុននឹងបន្តថា ការគាំទ្រនេះ នឹងរួមចំណែកផងដែរ ដល់ការពង្រឹងទំនាក់ទំនងយូរអង្វែង និងកិច្ចសហប្រតិបត្តិការដ៏ជិតស្និទ្ធរវាងប្រទេសទាំងពីរ ដែលនៅក្នុងឆ្នាំ២០២៣ ត្រូវបានដំឡើងកម្រិតទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ»។

 

នៅក្នុងជំនួបចុះហត្ថលេខានេះដែរ លោក KOMURA Masahiro អនុរដ្ឋមន្ត្រីក្រសួងការបរទេស​ជប៉ុន ​បានបង្ហាញ​បំណងសហការជាមួយ​កម្ពុជា ក្នុងការដោះស្រាយបញ្ហាប្រឈមរួមរបស់សហគមន៍អន្តរជាតិ ដើម្បីរក្សា និងពង្រឹងសណ្តាប់ធ្នាប់អន្តរជាតិប្រកបដោយភាពសេរី និងបើកចំហដោយផ្អែកលើនីតិរដ្ឋក្រោម«ភាពជាដៃគូយុទ្ធសាស្ត្រគ្រប់ជ្រុងជ្រោយ»​។ 

 

ទំព័រហ្វេសប៊ុកស្ថានទូតជប៉ុននៅកម្ពុជា ​បានសរសេរដូច្នេះ ជាមួយនឹងការ​ឆ្លើយតបរបស់ លោក សុខ ចិន្តាសោភា ​វិញថា កម្ពុជាក៏មានបំណង​ធ្វើការលើវិស័យកសាងសន្តិភាព និងសកម្មភាពកម្ចាត់មីន ជាមួយប្រទេសជប៉ុន ដើម្បីសន្តិភាព និងស្ថិរភាពនៃសហគមន៍អន្តរជាតិដែរ៕