ជាតិ
សេដ្ឋកិច្ច
សាលាមធ្យមវិចិត្រសិល្បៈ បានជំនួយជិត៤ម៉ឺនដុល្លារ ពីជប៉ុន ដើម្បីតម្លើងឧបករណ៍តន្រ្តីបុរាណខ្មែរ
× រដ្ឋាភិបាលប្រទេសជប៉ុនផ្តល់ជំនួយឥតសំណង៣៨,៧៥០ដុល្លារ ដល់សាលាមធ្យមវិចិត្រសិល្បៈ ដើម្បីលើកកម្ពស់ឧបករណ៍តន្រ្តីបុរាណខ្មែរចំនួន១៥ប្រភេទ។ ជំនួយនេះស្ថិតនៅក្រោមគម្រោង លើកកម្ពស់សកម្មភាពវប្បធម៌ កីឡា និងការអប់រំកម្រិតខ្ពស់ ក៏ដូចជាការអភិរក្សបេតិកភណ្ឌវប្បធម៌ នៅក្នុងប្រទេសកំពុងអភិវឌ្ឍ។
បើតាមសេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជា នាថ្ងៃទី២០មីនា តាមរយៈជំនួយឥតនេះ នឹងជួយតម្លើងឧបករណ៍តន្រ្តីបុរាណខ្មែរចំនួន១៥ប្រភេទ ដែមានសរុប២៤គ្រឿង។
ដោយសារកង្វះខាតឧបករណ៍តន្រ្តីបុរាណ សាលាមធ្យមវិចិត្រសិល្បៈ កំពុងប្រឈមមុខនឹងបញ្ហាក្នុងការបណ្តុះបណ្តាល យុវវ័យជំនាន់ថ្មី ដែលអាចលេងឧបករណ៍តន្រ្តីបុរាណទាំងនេះបាន។ នេះជាការមើលឃើញរបស់រដ្ឋាភិបាលប្រទេសជប៉ុនជាមួយក្តីរំពឹងថា ៖ « ការតម្លើងឧបករណ៍ថ្មី យើងរំពឹងថា លោកគ្រូអ្នកគ្រូ និងសិស្សានុសិស្ស នឹងមានឱកាសកាន់តែច្រើនក្នុងការសម្តែង និងហាត់សមឧបករណ៍តន្រ្តីបុរាណខ្មែរទាំងនោះ ហើយនឹងអាចពង្រីក ក៏ដូចជាបន្តវប្បធម៌ខ្មែរទៅថ្ងៃអនាគត»។
មកទល់ជប៉ុន និងកម្ពុជាមានទំនាក់ទំនងការទូតជិតស្និទ្ធិជាង៧០ឆ្នាំមកហើយ។ ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតប្រទេសជប៉ុនកម្ពុជា សង្ឃឹមថា គម្រោងនេះនឹងជួយសម្រួលដល់ការផ្លាស់ប្តូរវប្បធម៌ ក៏ដូចជាធ្វើឱ្យចំណងមិត្តភាព និងការយល់អំពីគ្នាមានភាពកាន់តែស៊ីជម្រៅរវាងប្រទេសទាំងពីរ។ លោកបន្តនិយាយដូច្នេះ ៖ «ជប៉ុន នឹងបន្តចូលរួមចំណែកក្នុងការដោះស្រាយបញ្ហាប្រឈម ដើម្បីកែលម្អគុណភាពជីវិត តាមរយៈគ្រោងការណ៍ជំនួយអភិវឌ្ឍន៍ផ្លូវការផ្សេងៗ ដែលរួមមាន ជំនួយឥតសំណងគូសាណូណិទាំងពីរទម្រង់ គឺ ជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ និងជំនួយឥតសំណងសម្រាប់គម្រោងទ្រង់ទ្រាយតូចវប្បធម៌»៕
Tag:
សិល្បៈ
ឧបករណ៍តន្ត្រីបុរាណខ្មែរ
© រក្សាសិទ្ធិដោយ thmeythmey.com