ការបោះឆ្នោតប្រធានាធិបតីអាម៉េរិក នឹងមកដល់នៅខែវិច្ឆិកាខាងមុខ ដោយលោកចូ បៃឌិន និងលោកដូណាល់ ត្រាំ ទទួលបានសំឡេងគាំទ្រគ្រប់គ្រាន់ ក្នុងការប្រជែងតំណែងនៅសេតវិមានជាថ្មី។ 

 

ក្នុងសម្ភាសន៍ជាមួយសារព័ត៌មានអាម៉េរិក CNBC ចេញផ្សាយនៅថ្ងៃទី២២ ខែមីនា លោកស្រី ចម និម្មល រដ្ឋមន្រ្តីពាណិជ្ជកម្មកម្ពុជា បានបង្ហាញក្តីជឿជាក់ថា មិនថាលោកបៃឌិន ឬលោកត្រាំ កាន់តំណែងឡើយ ទំនាក់ទំនងប្រទេសទាំងពីរ នឹងនៅតែល្អប្រសើរ។ 

 

«មិនថាលទ្ធផលនៃការបោះឆ្នោតមានសភាពបែបណាក៏ដោយ ទំនាក់ទំនងកម្ពុជា និងអាម៉េរិក នឹងបន្តរីកចម្រើន»។ រដ្ឋមន្រ្តីពាណិជ្ជកម្មបានឆ្លើយតបនឹងសំណួររបស់អ្នកសារព័ត៌មានបែបនេះ ពាក់ព័ន្ធនឹងទំនាក់ទំនងអាម៉េរិក-កម្ពុជា ក្រោយការបោះឆ្នោតប្រធានាធិបតី។

 

មិនតែប៉ុណ្ណោះ លោកស្រី ចម និម្មល ក៏បានឆ្លើយសំណួរពាក់ព័ន្ធនឹងគម្រោងព្រែកជីកហ្វូណនតេជោផងដែរ។ បើតាមរដ្ឋមន្រ្តីពាណិជ្ជកម្ម គម្រោងព្រែកជីកហ្វូណនតេជោ ជាការផ្លាស់ប្តូរសំខាន់មួយ ក្នុងវិស័យដឹកជញ្ជូនរបស់កម្ពុជា។ ត្រង់ចំណុចនេះ ប្រមុខពាណិជ្ជកម្មកម្ពុជា បានបន្តពន្យល់ថា ព្រែកជីកហ្វូណនតេជោ មិនត្រឹមតែផ្តល់លក្ខណៈប្រកួតប្រជែង និងប្រព័ន្ធដឹកជញ្ជូនប៉ុណ្ណោះទេ ប៉ុន្តែវាអាចផ្តល់ជាជម្រើសបន្ថែមពីការដឹកជញ្ជូនតាមផ្លូវដែក ផ្លូវអាកាស និងផ្លូវល្បឿនលឿនជាដើម។ 

 

អាម៉េរិក ជាដៃគូពាណិជ្ជកម្មនាំមុខ និងជាទីផ្សារដ៏សំខាន់មួយរបស់កម្ពុជាក្នុងការលក់ទំនិញនៅបរទេស។  ទំហំពាណិជ្ជកម្មកម្ពុជា និងអាម៉េរិក នៅក្នុងឆ្នាំ២០២៣ មានចំនួន ៩,២ពាន់លានដុល្លារ ដោយកម្ពុជានាំចេញទៅអាម៉េរិកមានទំហំ ៨,៩ពាន់លានដុល្លារ ហើយអាម៉េរិកនាំមកកម្ពុជាមានទំហំ ២៥៧លានដុល្លារ៕