កីឡាជាតិ
ជាតិ
ខ្មែរឥស្លាមមួយចំនួនកំពុងត្រៀមភ្នែកមើល World Cup
× ភ្នំពេញ៖ រដូវកាលបាល់ទាត់WorldCup ២០១៤ ដែលប្រព្រឹត្តទៅនៅប្រទេសប្រេស៊ីល នឹងចាប់ផ្តើមនាវេលាម៉ោង៣រំលងអាធ្រាត្រឈានចូលថ្ងៃសុក្រ (ម៉ោងនៅកម្ពុជា)។ មានមនុស្សមិនតិចទេ ដែលកំពុងរង់ចាំមើលព្រឹត្តិការណ៍ដ៏អស្ចារ្យមួយនេះ ក្នុងនោះមានទាំងខ្មែរឥស្លាម ដែលគេស្គាល់ថា ជាអ្នកស្នេហាវិស័យកីឡាបាល់ទាត់ដ៏ស្មោះស្ម័គ្រ។
«ខ្ញុំត្រៀមរួចហើយ។ ទន្ទឹងចាំតែដល់ថ្ងៃទេ។ ខ្ញុំគិតថា ខ្ញុំនឹងមានពេលមើលបានច្រើន ព្រោះថា ពេលនេះ ការងារខ្ញុំមិនសូវរវល់ប៉ុន្មានទេ»។ នេះជាការលើកឡើងរបស់លោក លី រ៉នី រស់នៅរាជធានីភ្នំពេញ ដែលកំពុងដេករាប់ថ្ងៃនៃការប្រកួត។លោក រ៉នី ដែលស្រលាញ់ជម្រើសជាតិប្រេស៊ីល បាននិយាយ លោកទំនងជាត្រូវលៃលកពេលវេលាច្រើន ដើម្បីមើលWorldCup នេះ។ លោកបានបញ្ជាក់៖« ខ្ញុំអាចមើលការចាក់ ផ្សាយឡើងវិញបាន ប៉ុន្តែគូរពិសេស ចង់មើលផ្ទាល់ជាង»។
ជាអ្នកគាំទ្រ ក្រុមជម្រើសជាតិ អាហ្សង់ទីន និងស្រលាញ់កីឡាករ Messi លោក ស្រ៊ីប ឡានីមិនខុសគ្នាប៉ុន្មានពីលោក រ៉នី នោះទេ។ ក្រៅពីការងារ និងការសិក្សាហើយនោះ យុវជនរូបនេះ គឺជាអ្នកស្រឡាញ់កីឡាបាល់ទាត់ដ៏ងប់ងុលម្នាក់។ ថ្លែងប្រាប់គេហទំព័រព័ត៌មានថ្មីៗ លោក ឡានី ពន្យល់ថា៖« ខ្ញុំមានគម្រោងមើលបាល់ទាត់នឹងមិត្តភក្តិនៅផ្ទះ ប៉ុន្តែបើគូពិសេស យើងអាចទៅមើល តាមហាងកាហ្វេ ព្រោះទីនោះមានភាពអ៊ូអរ ឬថា ដើម្បីផ្លាស់ប្តូរបរិយាកាស»។ លោក ឡានី បានព្រលយសំដីថា លោកមានលទ្ធភាពមើលព្រឹត្តិការណ៍ WorldCup ឆ្នាំនេះបានច្រើន ព្រោះថា លោកទើបនឹងប្រឡងចប់ហើយថ្មីៗ ។
មិនមែនមានតែអ្នកនៅភ្នំពេញទេ ដែលរំជើបរំជួលខ្លាំងទៅនឹងព្រឹត្តិការណ៍ WorldCup នេះ លោក តាំ អ៊ីសា អ្នកខេត្តត្បូងឃ្មុំនោះ ស្វះស្វែងរកទិញតារាងប្រកួត តាំងពីដើមខែមិថុនាមកម្លេះ។ លោកបានទូរសព្ទមកកូនរបស់លោក ដែលកំពុងធ្វើការនៅភ្នំពេញ ឲ្យរកទិញក្រដាសតារាងប្រកួត ដែលមានម៉ោងក្នុងប្រទេសស្រាប់ឲ្យលោក ដើម្បីងាយស្រួលលោកតាមដាន។ បុរសអាយុ៥០ឆ្នាំរូបនេះថ្លែងថា៖« ខ្ញុំមិនទាន់គាំទ្រប្រទេសណាមួយទេ ចាំមើលថ្វីជើងលេង សិន»។
គួរបញ្ជាក់ថា ខ្មែរឥស្លាមបានរួមចំណែកសំខាន់ ក្នុងការជួយលើកស្ទួយវិស័យកីឡាបាល់ទាត់ ហើយក្លិបមួយភាគធំដែលកំពុងលេងក្នុងក្របខណ្ឌខេមបូឌានលីកក៏មានវត្តមានកីឡាករខ្មែរ-ឥស្លាមផងដែរ៕
© រក្សាសិទ្ធិដោយ thmeythmey.com