កីឡាជាតិ
ជាតិ
កម្ពុជាឈ្នះ១ ចាញ់១ នៅDavis Cupរង់ចាំប្រកួតកាត់សេចក្ដីល្ងាចនេះជាមួយម៉ាឡេស៊ី ក្រុមជម្រើសជាតិវាយកូនបាល់កម្ពុជា បានប្រកួតចាញ់ក្រុមស៊ីរី ២ ទល់ ១ និង ឈ្នះក្រុម តួរមេនីស្ថាន ២ ទល់ ១ វិញ ក្នុងវគ្គជម្រុះតាមពូលនៃពានរង្វាន់ Dvais Cup តំបន់ Asia/Oceania Zone ក្រុម Group III ឆ្នាំ ២០១៤ស្របពេលថ្ងៃទី ១៣ មិថុនា នេះត្រូវប្រកួតកាត់សេចក្ដីជាមួយក្រុមខ្លាំងក្នុងពូល A ម៉ាឡេស៊ី។
ចំពោះ Group III ឆ្នាំនេះមានក្រុមចូលរួមចំនួន ៨ ចែកជា ២ពូល ហើយក្រុមកម្ពុជាស្ថិតនៅពូល A ជាមួយក្រុម ស៊ីរី, តួរមេនីស្ថាន និងម៉ាឡេស៊ី ស្របពេល ទម្រង់នៃវគ្គជម្រុះនេះគឺក្រុមខ្លាំងចំនួន២ នឹងមានកៅអីឡើងទៅប្រកួតនៅ Group II ហើយក្រុម ២អន់ជាងគេត្រូវធ្លាក់ទៅប្រកួតនៅ Group IV នៅឆ្នាំក្រោយ ចំណែក ៤ ក្រុមទៀតរក្សាខ្លួននៅ Group III ដដែល។
ការប្រកួតដែលរៀបចំឡើងនៅកីឡដ្ឋានដីឥដ្ឋក្រហម Enghelab sports complex ក្នុងទីក្រុងតេហេរ៉ង់ ប្រទេសអ៊ីរ៉ង នេះជំនួបដំបូងនៅថ្ងៃទី ១១ មិថុនា កន្លងទៅកម្ពុជាចាញ់ ស៊ីរី ២ ទល់ ១តែប្រកួតម្សិលមិញ កម្ពុជា បានយកឈ្នះក្រុមតួរមេនីស្ថាន ២ ទល់ ១ វិញ។នៅថ្ងៃនេះកម្ពុជា ត្រូវប្រកួតដណ្ដើមពិន្ទុពីក្រុមម៉ាឡេស៊ី ដើម្បីរកកៅអីឡើងទៅវគ្គ ៤ ក្រុមចុងក្រោយ។
លោក ទេព រិទ្ធិវិទ្ធ អគ្គលេខាធិការសហព័ន្ធវាយកូនបាល់កម្ពុជា មាននាទីដឹកនាំប្រតិភូជម្រើសជាតិវាយកូនបាល់កម្ពុជា ចំណែកលោក BraenAneirosជាគ្រូបង្វឹកក្រុមជម្រើសជាតិនិង ជាប្រធានផ្នែកបច្ចេកទេស និង កីឡាករចំនួន ៤ រូបទៀត រួមមានកីឡាករ ប៊ុន កេន្នី, ម៉ម បញ្ញារ៉ា, ម៉ម ផល្គុន និង ឡុង សំនៀង៕
© រក្សាសិទ្ធិដោយ thmeythmey.com