អន្តរជាតិ
នាយករដ្ឋមន្ត្រីចិន ទស្សកិច្ចនៅក្នុងប្រទេសអង់គ្លេស
× នាយករដ្ឋមន្ត្រីចិន ចាប់ផ្តើមដំណើរទស្សនកិច្ចរយៈពេលបីថ្ងៃ ទៅកាន់ប្រទេសអង់គ្លេសនៅថ្ងៃចន្ទនេះ។ ប្រមុខរដ្ឋាភិបាលចិន លោក លី ខឹឈាង បានបង្ហាញក្តីសង្ឃឹមថា ដំណើរទស្សនកិច្ចរបស់លោក នឹងជួយផ្លាស់ប្តូរនូវការភាន់ច្រលំមួយចំនួន ដែលអង់គ្លេសមានចំពោះប្រទេសរបស់ចិន ហើយថា វាក៏នឹងអាចជួយពង្រឹងទំនាក់ទំនងការទូតជាមួយរដ្ឋាភិបាលក្រុងឡុងដ៍ផងដែរ។
ស្តាប់សំឡេង
ដំណើរទស្សនកិច្ចរយៈពេលបីថ្ងៃរបស់លោកនាយករដ្ឋមន្ត្រីចិន លី ខឹឈាង បានចាប់ផ្តើមហើយនៅថ្ងៃនេះ ទៅកាន់ប្រទេសអង់គ្លេស។ លោក លី ខឹឈាង បានថ្លែងថា លោកសង្ឃឹមថាដំណើរទស្សនកិច្ចរបស់លោកទៅកាន់ប្រទេសអង់គ្លេសនេះ នឹងជួយបំបាត់នូវការភាន់ច្រលំនានាដែលអង់គ្លេសធ្លាប់មានចំពោះរដ្ឋាភិបាលលោកកន្លងមក ហើយថា វានឹងជួយអោយប្រទេសទាំងពីរអាចបង្កើន និងពង្រឹងទំនាក់ទំនងជាមួយគ្នាអោយកាន់តែល្អប្រសើរថែមទៀតផង។ ប្រមុខរដ្ឋាភិបាលចិនក៏បានកត់សម្គាល់ផងដែរថា ទំនាក់ទំនងរវាងប្រទេសទាំងពីរ អង់គ្លេស និងចិន ហាក់បីដូចជាមិនវិវត្តទៅមុខសោះឡើយ ក្នុងរយៈពេលប៉ុន្មានឆ្នាំចុងក្រោយនេះ។ ដូច្នេះលោកសង្ឃឹមថា ដំណើរទស្សនកិច្ចនេះនឹងជួយធ្វើអោយទំនាក់ទំនងនិងសហប្រតិបត្តិការនៃប្រទេសទាំងពីរកាន់តែស៊ីជម្រៅ ដោយសារតែលោកនឹងជួបពិភាក្សាជាមួយម្ចាស់ក្សត្រី Elizabeth ទី២ នៃប្រទេអង់គ្លេស។
នៅក្នុងអត្ថបទមួយដែលត្រូវបានចុះផ្សាយនៅក្នុងសារព័ត៌មាន London Times បានសរសេរថា ដំណើរទស្សនកិច្ចនៃមេដឹកនាំជាន់ខ្ពស់នៃបក្សកុម្មុយនីស្តចិនទៅកាន់ប្រទេសអង់គ្លេស គឺមានគោលដៅសំខាន់ៗចំនួនបី។ ក្រៅពីពង្រឹងកិច្ចសហប្រតិបត្តិការជាមួយអង់គ្លេស រដ្ឋាភិបាលក្រុងប៉េកាំងមានបំណងចង់ផ្លាស់ប្តូរនូវការភាន់ច្រលំ និងជម្រះអោយអស់នូវមន្ទិលសង្ស័យទាំងអម្បាលមាន របស់អង់គ្លេសដែលធ្លាប់មានកន្លងមកនេះចំពោះប្រទេសចិន។
ក្រៅពីលើកឡើងនូវគោលបំណងទាំងបីនេះ លោកនាយករដ្ឋមន្ត្រីចិន បានហៅប្រទេសអង់គ្លេសថា ជាដៃគួដ៏ល្អ មិនអាចខ្វះបានឡើយ។ និយាយក្នុងនាមរដ្ឋាភិបាលក្រុងប៉េកាំង លោក លី ខឹឈាង អះអាងថា ចិននឹងបន្តសកម្មភាព ភ្ជាប់ទំនាក់ទំនងយ៉ាងសកម្ម ជាមួយបណ្តាប្រទេសទាំងអស់លើសកលលោក ដើម្បីលើកកម្ពស់នូវសន្តិភាព និងសហប្រតិបត្តិការ។
ដំណើរទស្សនកិច្ចរបស់លោក លី ខឹឈាងនៅពេលនេះ គឺជាលើកដំបូងបំផុតមួយ បន្ទាប់ពីអតីតនាយករដ្ឋមន្ត្រីចិន Weng Jiabao បានធ្វើទស្សនកិច្ចនៅក្នុងប្រទេសអង់គ្លេសកាលពីឆ្នាំ ២០១១ ។ ប៉ុន្តែកាលពីឆ្នាំ ២០០៥ វាក៏មានមានដំណើរទស្សនកិច្ចរបស់ប្រធានាធិបតីចិន លោក Hu Jintao ដែរ។ ខណៈពេលនោះ គេសង្កេតឃើញមានចលនាបាតុកម្មរបស់ប្រជាជនទីបេ និងសកម្មជនសិទ្ធិមនុស្ស ប្រឆាំងនឹងរដ្ឋាភិបាលចិន។ ហើយអ្វីដែលរឹតគួរអោយចាប់អារម្មណ៍ គឺជំនួបមួយរវាងនាយករដ្ឋមន្ត្រីអង់គ្លេស ដេវីដ កាមេរ៉ូន ជាមួយសម្តេចសង្ឃ ដាឡៃឡាម៉ា បានធ្វើអោយទំនាក់ទំនងប្រទេសទាំងពីរ ចិន និងអង់គ្លេសកាន់តែធ្លាក់ចុះដុនដាប៕
ប្រែសម្រួលដោយ សៅ ផលនិស្ស័យ
© រក្សាសិទ្ធិដោយ thmeythmey.com