កីឡាជាតិ
ជាតិ
លីក ២០១៤៖ ថ្ងៃនេះ ស្វាយរៀង ប៉ះ អាស៊ីអឺរ៉ុប បង្គ្រប់សប្ដាហ៍ទី ១៦
× ក្រុមជើងឯកឆ្នាំចាស់ខេត្តស្វាយរៀង និង ក្រុមអាស៊ីអឺរ៉ុប ត្រូវប្រកួតបង្គ្រប់សប្ដាហ៍ទី ១៦ នៃពានរង្វាន់មិត្តហ្វូនខេមបូឌានលីក ២០១៤ នៅថ្ងៃទី ១៨ មិថុនា នេះ នៅពហុកីឡដ្ឋានជាតិ វេលាម៉ោង ៣:៣០ នាទីតទៅ។
សម្រាប់ក្រុមខេត្តស្វាយរៀង ហាក់មានពន្លឺចែងចាំងឡើងវិញក្រោយ យកឈ្នះក្រុមខ្លាំងនៅក្បែរតំបន់កំពូលតារាងចម្ការកៅស៊ូបងឹកេត កាលពីចុងសប្ដាហ៍កន្លងទៅ។ ប្រកួតនេះដែរ លោកគ្រូបង្វឹក សំ វ៉ានដេត មានឱកាសបញ្ជាកូនក្រុមលើទីលានឡើងវិញក្រោយសហព័ន្ធកីឡាបាល់ទាត់ពិន័យមិនឱ្យចូលទីលានចំនួន ៤ ប្រកួត។
ខ្សែបម្រើ ប្រាក់ មុន្នីឧត្តម បានជាសះស្បើយពីជំងឺវិញ ខណៈពេលប៉ុន្ដែប្រកួតចុងក្រោយគេស្ថិតក្នុងបញ្ជីកីឡាករបម្រុងប៉ុណ្ណោះ។ ចំណែកខ្សែការពារ ឡាយ រស្មី ទំនងជាបន្តខកខាន ព្រោះរបួសជើងពេលប៉ះជាមួយក្រុមចម្ការកៅស៊ូបឹងកេត កាលពីដើមខែ។
ស្វាយរៀង ឈរចំណាត់ថ្នាក់លេខ ៧ បណ្ដោះអាសន្ន មាន ២២ ពិន្ទុក្រោយប្រកួត ១៥ លើក ឈ្នះ ៦ ស្មើ ៤ និង ចាញ់ ៥ ប្រកួត។ ខ្សែប្រយុទ្ធ Bata ជាកូនសោសំខាន់ សម្រាប់រកគ្រាប់បាល់បញ្ចូលទីឱ្យក្រុមនាពេលកន្លងទៅ។
ងាកមកមើលក្រុមសាកលវិទ្យាល័យអាស៊ីអឺរ៉ុប វិញ ៥ ប្រកួតចុងក្រោយ ស្មើណាហ្គាខប ចុងជុំទី១ ១ ទល់ ១, ចាញ់ភ្នំពេញក្រោន ៩ ទល់១, ស្មើ វេស្ទើន ២ ទល់ ២, ស្មើ ក្រសួងការពារជាតិ ៣ទល់ ៣ និង ចាញ់ណាហ្គា កាលពីសប្ដាហ៍មុន ៣ ទល់ ១ ។
លោកគ្រូបង្វឹក ប៊ុន សម្បត្តិ កំពុងតែរកវិធីសាស្ត្រជួយក្រុម ឱ្យចាកឆា្ងយពីតំបន់បាតតារាង ពោលគឺ១៥ ប្រកួតកន្លងទៅមាន ១៨ ពិន្ទុក្នុងដៃ ដោយក្នុងនោះឈ្នះ ៤ ស្មើ ៦ និង ចាញ់ ៥ ប្រកួត៕
តើ ស្វាយរៀង ឬ អាស៊ីអឺរ៉ុប អាចរកបាន ៣ ពិន្ទុ នៅរសៀលនេះ?
© រក្សាសិទ្ធិដោយ thmeythmey.com