កីឡាជាតិ
ជាតិ
ប្រភព៖ បុរសម្នាក់នៅអ្នកលឿងស្លាប់ នាអំឡុងពេលក្រោកមើល World Cup
× បុរសវ័យជាង៦០ឆ្នាំម្នាក់នៅអ្នកលឿង ខេត្តព្រៃវែង បានស្លាប់ នាអំឡុងពេលដែលគាត់បានក្រោកមើលការប្រកួត World Cup នាវេលាម៉ោង២រំលងអាធ្រាត្រ។ នេះបើតាមប្រភពជាច្រើន ទូរសព្ទប្រាប់មកគេហទំព័រថ្មីៗ កាលពីល្ងាចថ្ងៃអាទិត្យ។
ក្រោមលក្ខខណ្ឌមិនបញ្ចេញឈ្មោះ ប្រភពបានអះអាង ជនរងគ្រោះគឺជាអ្នកមានជីវភាពមធ្យមម្នាក់នៅតំបន់អ្នកលឿងត្រើយខាងកើត។ ជនរងគ្រោះ បានក្រោកមើលការប្រកួតមួយនៅវេលាម៉ោង២រំលងអាធ្រាត្រ (ប្រភពមិនបានបញ្ជាក់ថា យប់ណានោះឡើយ) នាខណៈនោះ លោកបានដើរទៅបន្ទប់ទឹក ហើយក៏ដួលស្លាប់នៅទីនោះតែម្តង។ បើតាមការអះអាងដូចៗគ្នា ប្រាប់គេហទំព័រថ្មីៗ ជនរងគ្រោះមានជំងឺលើសឈាម។
គួរបញ្ជាក់ថា ព័ត៌មានទាក់ទងនឹងការស្លាប់របស់បុរសម្នាក់នៅអ្នកលឿងដោយសារឥទ្ធិពល World Cup នេះ ត្រូវរាយការណ៍ បន្ទាប់ពីគេហទំព័រថ្មីៗ ចេញផ្សាយអត្ថបទមួយ ទាក់ទងនឹងមរណភាពរបស់ជនជាតិចិនបីនាក់។ យោងតាមសារព័ត៌មាន Shanghai Daily បុរសម្នាក់ឈ្មោះ Shou វ័យ ៣៩ ឆ្នាំ បានស្លាប់ ក្រោយពីពេលចំណាយមើលការប្រកួត World Cup ៣ យប់ជាប់ៗ គ្នា។ ជំងឺលើសឈាមរបស់គេបានរើបឡើង ក្នុងពេលមើលការផ្សាយបន្តផ្ទាល់នៃការប្រកួតរវាងក្រុម អ៊ុយរ៉ុយហ្គាយ ជាមួយក្រុម កូស្ដារីកា។ បើតាមការឱ្យដឹងពីគ្រូពេទ្យ រូបគេស្លាប់ដោយសារដាច់សរសៃឈាមក្នុងខួរ។
ចំណែកបុរសម្នាក់ទៀតនៅតំបន់ Suzhou ក្នុងខេត្ត Jiangsu ត្រូវបានគេប្រទះឃើញដេកស្លាប់នៅពីមុខទូរទស្សន៍ក្នុងផ្ទះកាលពីចុងស ស្ដាហ៍កន្លងទៅដែរ។ បើតាមការឱ្យដឹងពីគ្រូពេទ្យក្រោយធ្វើកោសល្យវិច័យរួចគឺថា បុរសវ័យ ២៥ ឆ្នាំស្លាប់ដោយសារដេកបានតិចពេក។
រីឯសាកសពទី៣ ឈ្មោះថា Li Mingqiang អាយុ ៥១ ឆ្នាំ ជាអតីតកីឡាករបាល់ទាត់ក្នុងក្លិប Dalian Aerbin F.C របស់ខេត្ត Liaoning។ ជនរងគ្រោះបានស្លាប់ក្នុងពេលមើលការផ្សាយផ្ទាល់នៃការប្រកួតរវាង ក្រុមជើងឯកឆ្នាំចាស់ អេស្ប៉ាញ ប្រកួតជាមួយជើងឯករងឆ្នាំចាស់ ហុល្លង់ ជាមួយមិត្តភក្តិ។ នេះយោងតាមសារព័ត៌មាន Beijing Youth Daily។
ម៉ោងនៅប្រទេសចិន ដើរខុសពីម៉ោងនៅប្រេស៊ីលចំនួន ១១ ម៉ោង ដូច្នេះប្រជាជនចិត្តត្រូវតាមដានការប្រកួត World Cup 2014 រហូតដល់រំលងអាធ្រាត្រ ជាពិសេសគឺត្រូវតាមដានប្រកួតម៉ោង ៦ ព្រឹកមួយគូទៀត៕
© រក្សាសិទ្ធិដោយ thmeythmey.com