កីឡាជាតិ
ជាតិ
លីក ២០១៤៖បៀលប្រាយ ប៉ះការពារជាតិ ចំណែកភ្នំពេញក្រោន ប៉ះត្រាយអាស៊ី
× កម្មវិធីប្រកួតបាល់ទាត់ជើងទី២ ពានរង្វាន់មិត្តហ្វូនខេមបូឌានលីក ២០១៤ នៅថ្ងៃសៅរិ៍ ទី ២៨ មិថុនា នេះមានចំនួន ២ ប្រកួត ដែលធ្វើឡើងនៅពហុកីឡដ្ឋានជាតិ ដោយក្រុម បៀលប្រាយយូណាយធិត ប៉ះក្រុម ក្រសួងការពារជាតិ នៅវេលាម៉ោង ៣:៣០ នាទីនៅពហុកីឡដ្ឋានជាតិ ខណៈគូបន្ទាប់នៅម៉ោង ៦ វិញ ក្រុមភ្នំពេញក្រោន ប៉ះត្រាយអាស៊ី។
បៀលប្រាយ ប៉ះ ការពារជាតិ ម៉ោង ៣:៣០ រសៀល (ផ្សាយផ្ទាល់ប៉ុស្ដិ៍ BTV)
បៀលប្រាយ មិនទាន់អស់ឱកាសប្រជែងកៅអី Top4 នៅឡើយទេ បើទោះជាពេលនេះឈរនៅចំណាត់ថ្នាក់លេខ ៧ តែពិន្ទុនៅប្រដេញប្រដោលជាមួយក្រុម ៣ លើផ្សេងទៀត។ ក្រុមលោក លាស់ សាឡាស់ខាន់ ត្រូវបានមហាជនទទួលស្គាល់ថាជាក្រុមពូលខាងការពារ ចំណែកផ្នែកប្រយុទ្ធវិញពេលនេះទើបតែរកគ្រាប់បាល់បញ្ចូលទីគេបាន ១៨ គ្រាប់ប៉ុណ្ណោះ ក្នុងចំណោម ១៧ ប្រកួតកន្លងមក។
ចំណែកក្រុមក្រសួងការពារជាតិវិញ ប៉ុន្មានប្រកួតចុងក្រោយ មានឈ្នះ មានស្មើ តែបែរជាចាញ់ក្រុមលេខ២ បាតតារាង គីរីវង់សុខសែនជ័យ ដែលកំពុងតែធ្លាក់ទម្រង់ប្រកួតរហូតដល់ ៣ ទល់ ០ លើទឹកដីស្ដាតចាស់ ដែលជាទីហ្វឹកហាត់ជាប្រចាំរបស់ខ្លួន។ កីឡាករ ឈិន ឈឿន, ពៅ ភារិទ្ធ, ភួង សុខសាណា, ខែក ខេមរិន្ទ, អ៊ុំ វិចិត្រ សុទ្ធតែជាតារាល្បីប្រចាំក្រុម។
ភ្នំពេញក្រោន ប៉ះ ត្រាយអាស៊ីភ្នំពេញ នៅម៉ោង ៦ ល្ងាច
ភ្នំពេញក្រោន ត្រូវការជ័យជម្នះជាចាំបាច់ដើម្បីរកពិន្ទុដាច់ឆ្ងាយនៅតំបន់កំពូលតារាងដើម្បីគ្រងជើងឯកពានរង្វាន់លីកកំពូលកម្ពុជា ជាលើកទី ៥ ខណៈ ៤ លើកកន្លងទៅធ្លាប់កាន់ពានមួយនេះនៅឆ្នាំ ២០០២, ២០០៨, ២០១០ និង ២០១១។ ខ្សែប្រយុទ្ធដែលកំពុងតែរកគ្រាប់បាល់បានច្រើនជាងគេ Bisan Goerge កំពុងតែស្រេចឃ្លានបំប៉ោងសំណាញ់ទីដៃគូប្រកួត។
ងាកមកក្រុមត្រាយអាស៊ី វិញ ជាក្រុមចំណូលថ្មីមែន តែហេដ្ឋារចនាសម្ព័ន្ធក្រុម មិនអន់ជាងក្រុមចាស់ៗ ប៉ុន្មាននោះទេ។ ក្រុមដែលមានថ្នាក់ដឹកនាំជាជនជាតិជប៉ុនមួយនេះ នៅមិនទាន់ប្រាថ្នាដណ្ដើមជើងឯកនោះទេ ប៉ុន្ដែចង់បានត្រឹមកៅអី Top 4 ។ សួង វិរៈ, គួច ដានី, Friday, ហែម ស៊ីម៉ៃ, សុទ្ធតែជាតួរសំខាន់របស់ក្រុម។
តើ បៀលប្រាយអាចរកឱកាស Top4 បានដែរឬទេ? ចុះតំណែងកំពូលតារាងរបស់ភ្នំពេញក្រោន វិញនឹងទៅជាយ៉ាងណា?
© រក្សាសិទ្ធិដោយ thmeythmey.com