កីឡាអន្តរជាតិ
អន្តរជាតិ
Sanchez នឹងក្លាយជាកង្វល់សម្រាប់ប្រេស៊ីល ខណៈអ៊ុយរូហ្គាយប្រកួតដោយគ្មាន Suarez
× ព្រឹត្តិការណ៍ World Cup ឆ្នាំ២០១៤ ឈានចូលដល់វគ្គ១៦ក្រុមចុងក្រោយហើយនារាត្រីថ្ងៃសៅរ៍ ឈានចូលថ្ងៃអាទិត្យនេះ។ ម្ចាស់ផ្ទះប្រេស៊ីលដែលជាលេខមួយពូល A ត្រូវស្វាគមន៍ឈីលី លេខពីរពូល B ហើយបន្ទាប់មក លេខមួយពូល C កូឡុំប៊ី ត្រូវតទល់ជាមួយលេខពីរពូល D អ៊ុយរូហ្គាយ។
ខ្សែប្រយុទ្ធ Alexis Sanchez នឹងក្លាយជាអាវុធដ៏សំខាន់សម្រាប់ក្រុមបាល់ទាត់ជម្រើសជាតិឈីលីនៅពេលដែលពួកគេជាមួយនឹងក្រុមជម្រើសជាតិប្រេស៊ីលក្នុងការប្រកួតវគ្គ១៦ក្រុមចុងក្រោយនៃយុទ្ធនាការ World Cup ក្នុងទីក្រុង Belo Horizonte នៅរាត្រីនេះ។
នៅពេលដែលខ្សែប្រយុទ្ធរបស់ក្លិប Barcelona រូបនេះ ចូលទៅកាន់ទីលាន ដែលដូចទៅនឹងមិត្តរួមក្រុមរបស់គេដែរ ការហ្វឹកហាត់ផ្សេងៗនឹងផ្តល់ទៅលើទេពកោសល្យដែលពួកគេបានរៀនអំឡុងពេលលេងកីឡាបាល់ទាត់នៅអឺរ៉ុប។
ក្រោយពីបានបញ្ចប់អាជីពក្នុងប្រទេសអាហ្សង់ទីនជាមួយនឹងក្លិប River Plate និងប្រទេសអ៊ីតាលីក្នុងក្លិប Udinese ក្លិប Barcelona ពិតជាបានធ្វើឲ្យ Sanchez ក្លាយជាខ្សែប្រយុទ្ធម្នាក់ក្នុងចំណមខ្សែប្រយុទ្ធដ៏គ្រោះថ្នាក់បំផុតរបស់ពិភពលោក។
កីឡាករវ័យ២៥ឆ្នាំរូបនេះ បានប្រាប់កាសែត El Pais ថា៖ «នៅក្លិប Barcelona ខ្ញុំបានរៀនពីរបៀបលេងកីឡាបាល់ទាត់ម្តងទៀត។ អ្វីដែលខ្ញុំបានធ្វើនៅក្នុងប្រទេសអ៊ីតាលី ខ្ញុំមិនអាចធ្វើនៅអេស្ប៉ាញបានឡើយ។ នៅមុនពេលលេងពីរបៀបបញ្ជូនបាល់លឿន ខ្ញុំចាំបាច់ត្រូវតែស្វែងរកល្បឿន»។
ស្របពេលជាមួយគ្នានេះ លោក Luiz Felipe Scolari គ្រូបង្វឹកនៃក្រុមបាល់ទាត់ជម្រើសជាតិប្រេស៊ីល បានបញ្ជាក់ថា កីឡាករ Fernandinho នឹងចូលលេងក្នុងតំបន់បម្រើសម្រាប់ការប្រកួតវគ្គ១៦ក្រុមចុងក្រោយនៅរាត្រីនេះជាមួយនឹងក្រុមឈីលី ខណៈដែលខ្សែការពារ David Luiz បានអវត្តមានក្នុងការហ្វឹកហាត់ដោយសារតែបញ្ហាខ្នង។
Fernandinho របស់ក្លិប Manchester City បានលេងរួមជាមួយនឹងកីឡាករស្ថិតក្នុងជម្រើសដំបូងក្នុងការប្រកួតហ្វឹកហាត់មួយជាមួយនឹងក្រុមកីឡាករបម្រុងនៅជំរំហ្វឹកហាត់ Teresopolis របស់ប្រេស៊ីល ដើម្បីបង្ហាញថា រូបគេអាចនឹងលេងក្នុងជម្រើស១១នាក់ដំបូងជាលើកទី១ក្នុងយុទ្ធនាការនេះ។
នារាត្រីនេះផងដែរ ខណៈដែលកំពុងតែរងនូវការខកចិត្តដោយសារតែបញ្ហាខាំរបស់ខ្សែប្រយុទ្ធ Luis Suarez ក្រុមបាល់ទាត់ជម្រើសជាតិអ៊ុយរូហ្គាយនឹងខិតខំព្យាយាមបង្ហាញពីភាពអស្ចារ្យក្នុងពេលអវត្តមានតារាឆ្នើមរបស់ពួកគេ នៅពេលពួកគេត្រូវជួបក្រុមជម្រើសជាតិកូឡុំប៊ីក្នុងវគ្គ១៦ក្រុមចុងក្រោយនៃយុទ្ធនាការ World Cup។
ស្របពេលដែលកីឡាកររបស់ក្រុមជម្រើសជាតិអ៊ុយរូហ្គាយ គួរតែកំពុងធ្វើការផ្តោតអារម្មណ៍ទៅលើគំរាមពីសំណាក់ខ្សែប្រយុទ្ធ James Rodriguez និងមិត្តរួមក្រុរបស់គេ ពួកគេដឹងថា ខ្លួនពួកគេផ្ទាល់ស្ថិតក្រោមសម្ពាធក្រោយពីមានរឿងអាស្រូវដ៏ធំបំផុតមួយក្នុងយុទ្ធនាការ World Cup កាលពីពេលថ្មីៗនេះ៕
កម្មវិធីប្រកួតនៅរាត្រីនេះ
ប្រេស៊ីល v ឈីលី - 11 យប់
កូឡុំប៊ី v អ៊ុយរូហ្គាយ - 3 ទៀបភ្លឺ
ជំនួបបីលើកចុងក្រោយរវាងប្រេស៊ីល និងឈីលី
20/11/13 Brazil 2-1 Chile
25/04/13 Brazil 2-2 Chile
28/06/10 Brazil 3-0 Chile
ជំនួបបីលើកចុងក្រោយរវាងកូឡុំប៊ី និងអ៊ុយរូហ្គាយ
10/09/13 Uruguay 2-0 Colombia
07/09/12 Colombia 4-0 Uruguay
09/09/09 Uruguay 3-1 Colombia
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com