កីឡាអន្តរជាតិ
លោក Rodgers ច្រានចោលព័ត៌មានថា Liverpool ដេញថ្លៃទិញ Balotelli
× លោក Brendan Rodgers អ្នកចាត់ការទូទៅរបស់ក្លិប Liverpool បានច្រានចោលចំពោះការលើកឡើងដែលទាក់ទងជាមួយរូបលោកនឹងការដេញថ្លៃមួយសម្រាប់ការផ្ទេរខ្សែប្រយុទ្ធ Mario Balotelli របស់ក្លិប AC Milan។
លោក Rodgers បាននិយាយអំពីខ្សែប្រយុទ្ធអន្តរជាតិអ៊ីតាលីរូបនេះក្នុងពាក្យសម្តីកោតសរសើរនៅពេលដែលលោកត្រូវបានចោទសួរអំពីរូបគេកាលពីសប្តាហ៍មុន ប៉ុន្តែ គ្រូបង្វឹកសញ្ជាតិអៀរឡង់ខាងជើងរូបនេះ បាននិយាយថា ការកោតសរសើររបស់លោកមិនមែនមានន័យទៅជាការដាក់សំណើដើម្បីទិញកីឡាករវ័យ២៣ឆ្នាំរូបនេះឡើយ។
លោក បានប្រាប់បណ្តាញសន្និសីទសារព័ត៌មានមួយក្នុងរដ្ឋ Miami កាលពីថ្ងៃអាទិត្យ ក្នុងសេចក្តីអធិប្បាយដែលត្រូវបានផ្សាយយ៉ាងទូលំទូលាយក្នុងបណ្តាញសារព័ត៌មានចក្រភពអង់គ្លេស ថា៖ «ខ្ញុំអាចប្រាប់អ្នកថា Mario Balotelli នឹងមិននៅជាមួយនឹង Liverpool ឡើយ»។
លោកបានប្រាប់បន្តថា៖ «ក្នុងសន្និសីទសារព័ត៌មានចុងក្រោយរបស់ខ្ញុំ ខ្ញុំត្រូវបានចោទសួរនូវសំណួរមួយអំពី Mario Balotelli និងខ្ញុំបាននិយាយពីទេពកោសល្យដែលរូបគេមាន និងអ្វីដែលជាភាពល្អឥតខ្ចោះរបស់គេ។ នៅថ្ងៃក្រោយមក បែរជារឿងនេះត្រូវបានគេសរសេរថា យើងនឹងចុះហត្ថលេខាជាមួយនឹងរូបគេ។ ខ្ញុំគ្រាន់តែផ្តល់នូវមតិរបស់ខ្ញុំទៅលើរូបគេក្នុងនាមជាកីឡាករម្នាក់។ វាមិនគួរណាត្រូវបានគេបកប្រែទៅជាថា យើងនឹងចុះហត្ថលេខាជាមួយនឹងកីឡាកររូបនេះសោះ»។
Liverpool បានបាត់បង់ខ្សែប្រយុទ្ធដ៏ឆ្នើម Luis Suarez ក្រោយពីគេបានផ្ទេរទៅកាន់ក្លិប Barcelona កាលពីខែមុន ប៉ុន្តែ លោក Rodgers បានទិញចូលខ្សែប្រយុទ្ធអន្តរជាតិអង់គ្លេស Rickie Lambert ពីក្លិប Southampton។ ខ្សែប្រយុទ្ធអន្តរជាតិបែលហ្ស៊ិក DivockOrigi ក៏បានចូលរួមជាមួយនឹងក្លិបនេះផងដែរ ក្រោយពីផ្ទេរមកពី Lille ប៉ុន្តែ រូបគេត្រូវបានខ្ចីជើងភ្លាមៗឲ្យវិលទៅលេងក្នុងក្លិបរបស់បារាំងមួយនេះ៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com