ខ្មែរក្រហម
ជាតិ
រដ្ឋាភិបាល និង UN នឹងចេញសេចក្តីថ្លែងការណ៍រួមជុំវិញសាលក្រម០០២ វគ្គ១
× លោក ឌឹម សុវណ្ណារុំ ប្រធានផ្នែកកិច្ចការសាធារណៈនៃសាលាក្តីខ្មែរក្រហម បានបញ្ជាក់ឲ្យដឹងថា រដ្ឋាភិបាលកម្ពុជា និងតំណាងអង្គការសហប្រជាជាតិ (UN) នឹងធ្វើសេចក្តីថ្លែងការណ៍រួមគ្នាមួយនៅល្ងាចថ្ងៃព្រហស្បតិ៍ ទី៧ ខែសីហា ឆ្នាំ២០១៤ នេះ ជុំវិញការសម្រេចសាលក្រមផ្តន្ទាទោសមួយជីវិត ប្រឆាំង ខៀវ សំផន និង នួន ជា ក្នុងសំណុំរឿង០០១ វគ្គ១ ។
ថ្លែងក្នុងសន្និសីទសារព័ត៌មានបន្ទាប់ពីការប្រកាសសាលក្រម លោក David Scheffer អ្នកជំនាញពិសេសរបស់អគ្គលេខាធិការអង្គការសហប្រជាជាតិទទួលបន្ទុកផ្នែករ៉ៃអង្គាសថវិកាសម្រាប់ជួយដល់ដំណើរតុលាការខ្មែរក្រហម និង លោក Stephen Mathias ឧបការីអគ្គលេខាធិការអង្គការសហប្រជាជាតិ សុទ្ធតែបានអបអរសាទរចំពោះការសម្រេចរបស់សាលាដំបូងនៃសាលាក្តីខ្មែរក្រហម។
លោក Stephen Mathias បានគូសបញ្ជាក់ថា ការសម្រេចក្តីរបស់តុលាការខ្មែរក្រហមនៅថ្ងៃនេះ មានសារសំខាន់ណាស់ ដែលអាចជះឥទ្ធិពលដល់ពិភពលោកទាំងមូល ជាពិសេសករណីមេដឹកនាំនៅស៊ីរី ឬស៊ូដង់ ជាដើម ហើយវាបានបង្ហាញឲ្យឃើញថា ជនដែលប្រព្រឹត្តិអំពើសាហាវយង់ឃ្នងមិនអាចគេចផុតពីសំណាញ់ច្បាប់ឡើយ។
លោកឧបនាយករដ្ឋមន្ត្រី សុខ អាន បានអះអាងថា សាលក្រមនៅថ្ងៃនេះ មិនមែនជាការកំណត់ទុកមុននោះឡើយ ពោលគឺតុលាការសម្រេចក្តីទៅតាមនីតិវិធី និងភស្តុតាងដែលខ្លួនប្រមូលបាន៕
© រក្សាសិទ្ធិដោយ thmeythmey.com