ខ្មែរក្រហម
ជាតិ
អាមេរិកស្វាគមន៍ចំពោះសាលក្រមប្រឆាំងនឹងអតីតមេដឹកនាំខ្មែរក្រហម
× ស្ថានទូតសហរដ្ឋអាមេរិក ប្រចាំនៅប្រទេសកម្ពុជា បានសម្ដែងនូវការស្វាគមន៍ចំពោះសាលក្រម នៃការកាត់ទោសអតីតមេដឹកនាំជាន់ខ្ពស់ ក្នុងរបបខ្មែរក្រហមនៅថ្ងៃនេះ ដែលសម្រេចដោយអង្គជំនុំជម្រះវិសាមញ្ញក្នុងតុលាការកម្ពុជា ឬដែលគេស្គាល់ថាជាសាលាក្ដីខ្មែរក្រហមនោះ។
យោងតាមសេចក្ដីថ្លែងការណ៍របស់ស្ថានទូតអាមេរិក សាលក្រមដែលធ្វើឡើងដើម្បីប្រឆាំងនឹង លោក នួន ជា បងធំទី២ បន្ទាប់ពី ប៉ុល ពត និង លោក ខៀវ សំផន អតីតប្រមុខរដ្ឋ ពាក់ព័ន្ធបទឧក្រិដ្ឋកម្មប្រឆាំងមនុស្សជាតិ ដែលបានប្រព្រឹត្តក្នុងអំឡុងពេលសម័យខ្មែរក្រហមនោះ នឹងផ្តល់ជូននូវវិធានការសន្ដិភាព និងយុត្តិធម៌ទៅឱ្យក្រុមគ្រួសារនៃជនរងគ្រោះ ក្នុងរបបខ្មែរក្រហម។
ស្ថានទូតអាមេរិកក៏បានលើកឡើងថា រដ្ឋាភិបាលសហរដ្ឋអាមេរិកបានគាំទ្រជាយូរមកហើយចំពោះគោលដៅ នៃការកាត់ទោសអ្នកដែលទទួលខុសត្រូវខ្ពស់បំផុត ចំពោះអំពើយង់ឃ្នងដែលបានប្រព្រឹត្តដោយរបបខ្មែរក្រហម ដែលបានធ្វើឲ្យប្រជាជនកម្ពុជាជាង ២,២ លាននាក់ក្លាយជាជនរងគ្រោះ និងបាននាំភាពការលំបាក វេទនាដល់ប្រជាជនកម្ពុជារហូតមកដល់ពេលនេះ។
រដ្ឋាភិបាលសហរដ្ឋអាមេរិក បានសន្យាថាខ្លួននឹងបន្តការគាំទ្រដល់កិច្ចខិតខំប្រឹងប្រែងរបស់អង្គជំនុំជម្រះវិសាមញ្ញ ក្នុងការនាំយកយុត្តិធម៌ដល់ប្រជាជនកម្ពុជា ដើម្បីបង្ហាញពីបទល្មើសយ៉ាងរន្ធត់ នៃរបបខ្មែរក្រហម និងដើម្បីពង្រឹងនីតិរដ្ឋនៅកម្ពុជា។
សូមបញ្ជាក់ថា យោងតាមសាលក្រមដែលប្រកាសដោយ លោក និល ណុន ប្រធានសាលាដំបូងនៃតុលាការខ្មែរក្រហម ដោយបានប្រកាសផ្ទន្ទាទោសអតីតមេដឹកនាំជាន់ខ្ពស់របបខ្មែរក្រហមចំនួនពីររូបគឺ លោក ខៀវ សំផន និង លោក នួន ជា ឲ្យជាប់ពន្ធនាគារអស់មួយជីវិត៕
© រក្សាសិទ្ធិដោយ thmeythmey.com