ខ្មែរក្រហម
ជាតិ
លោក John Kerry ថា សាលក្រមម្សិលមិញជាប្រវត្តិសាស្ត្រសម្រាប់ប្រជាជនកម្ពុជា
× នៅក្រោយពេលដែលសាលាក្ដីខ្មែរក្រហម បានប្រកាសសាលក្រមដាក់ទោសអតីតមេដឹកនាំក្នុងរបបកម្ពុជាប្រជាធិបតេយ្យចំនួនពីររូបរួចមកនោះ រដ្ឋមន្ត្រីក្រសួងការបរទេសសហរដ្ឋអាមេរិក លោក John Kerry បានថ្លែងសាលក្រមនេះគឺជាព្រឹត្តិការណ៍ប្រវត្តិសាស្ត្រមួយសម្រាប់ប្រជាជនកម្ពុជាដែលបានរងគ្រោះដោយអំពើដែលគួរឲ្យរន្ធត់បំផុតនៅក្នុងសតវត្សទី២០ នេះ ។
លោកបានបន្តថា រយៈពេលជាង៣០ឆ្នាំបន្ទាប់ពីពួកខ្មែរក្រហមបានកាប់សម្លាប់ប្រជាជនប្រហែល១,៧លាននាក់មកនោះប្រជាជនកម្ពុជាបានទទួលយុត្តិធម៌បន្តិចបន្តួចប៉ុណ្ណោះ។ លោកក៏បានរំលឹកថា ពិតមែនតែយុត្តិធម៌អាចនឹងមិនបានមកក្នុងពេលភ្លាមៗក្តីតែយុត្តិធម៌ដាច់ខាតត្រូវតែមាន។
នៅក្នុងសេចក្ដីថ្លែងការណ៍របស់ខ្លួន លោក John Kerryបានលើកឡើងពីការងារដែលលោកធ្លាប់បានចូលរួមធ្វើក្នុងនាមជាសមាជិកនៃគណៈកម្មាធិការទំនាក់ទំនងបរទេសរបស់ព្រឹទ្ធសភាសហរដ្ឋអាមេរិកដើម្បីធ្វើការជាមួយភាគីកម្ពុជាដើម្បីបង្កើតអង្គជំនុំជម្រះវិសាមញ្ញក្នុងតុលាការកម្ពុជា (ECCC) មួយនេះឡើង។
ទោះជាយ៉ាងណាក៏ដោយ រដ្ឋមន្ត្រីការបរទេសរូបនេះ បានកត់សម្គាល់ឃើញថា ការខិតខំដើម្បីកាត់ទោសអ្នកដែលមានការទទួលខុសត្រូវខ្ពស់បំផុតចំពោះឧក្រិដ្ឋកម្មដ៏គួរឲ្យខ្លាចទាំងនេះបានចាប់ផ្តើមដោយមានការយឺតពេលច្រើនហើយចាំបាច់ត្រូវតែធ្វើ។
ប៉ុន្តែលោកឲ្យដឹងថា ថ្វីត្បិតតែមានការយឺតយ៉ាវក្តីសាលក្រមនេះគឺជាជំហានជាប្រវត្តិសាស្ត្រមួយនៅលើមាគ៌ាមួយសម្រាប់ប្រទេសកម្ពុជា ។ សហរដ្ឋអាមេរិកនឹងបន្តជួយគាំទ្រដល់ការខិតខំរបស់ ECCC ដើម្បីធានាអោយមានយុត្តិធម៌ហើយបំភ្លឺឲ្យគេឃើញដំណាក់កាលដ៏ខ្មៅងងឹតបំផុតនៅក្នុងប្រវត្តិសាស្ត្រកម្ពុជា។
សូមបញ្ជាក់ថាយោងតាមសាលក្រមដែលប្រកាសដោយ លោក និល ណុនប្រធានសាលាដំបូងនៃតុលាការខ្មែរក្រហមដោយបានប្រកាសផ្ទន្ទាទោសអតីតមេដឹកនាំជាន់ខ្ពស់របបខ្មែរក្រហមចំនួនពីររូបគឺ លោក នួន ជា បងធំទី២ បន្ទាប់ពី ប៉ុល ពត និង លោក ខៀវ សំផន អតីតប្រមុខរដ្ឋក្នុងរបបកម្ពុជាប្រជាធិបតេយ្យឲ្យជាប់ពន្ធនាគារអស់មួយជីវិត៕
© រក្សាសិទ្ធិដោយ thmeythmey.com