សុខភាព
អន្តរជាតិ
ថ្នាំបង្កាមេរោគអេបូឡានឹងត្រូវសាកល្បងនៅខែក្រោយ និងអាចរួចរាល់ត្រឹមឆ្នាំ២០១៥
× ការធ្វើតេស្តិ៍ទៅលើថ្នាំការពារវីរុសអេបូឡា ដែលត្រូវបានឱសថស្ថានចក្រភពអង់គ្លេស GlaxoSmithKline អះអាងថា អាចនឹងចាប់ផ្តើមនៅខែក្រោយ ហើយអាចនឹងដាក់លក់បាននៅត្រឹមឆ្នាំ២០១៥។ នេះបើយោងទៅតាមអង្គការសុខភាពពិភពលោក (WHO) កាលពីថ្ងៃសៅរ៍។
លោក Jean-Marie Okwo Bele ប្រធានថ្នាំបង្កា និងប្រព័ន្ធភាពស៊ាំរបស់ WHO បានប្រាប់វិទ្យុបារាំងថា៖ «យើងកំពុងតែកំណត់យកខែកញ្ញាសម្រាប់ការចាប់ផ្តើមសាកល្បង ដោយលើកទី១នៅសហរដ្ឋអាមេរិក និងនៅប្រទេសអាហ្វ្រិក ពីព្រោះនៅទីនោះយើងមានករណីនេះ»។
លោកបានឲ្យដឹងថា លោកមានសុទិដ្ឋិនិយមអំពីការធ្វើឲ្យថ្នាំបង្កានេះអាចរកជាវបាន។ លោកបានបន្ថែមទៀតថា៖ «យើងគិតថា ប្រសិនបើយើងចាប់ផ្តើមនៅខែកញ្ញា យើងអាចនឹងមានលទ្ធផលរួចរាល់នៅត្រឹមចុងឆ្នាំនេះ។ ព្រោះតែនេះស្ថិតក្នុងភាពបន្ទាន់ យើងអាចនឹងដាក់ដំណើរការសង្គ្រោះបន្ទាន់ភ្លាមៗ ហេតុនេះយើងអាចនឹងមានថ្នាំបង្កានៅត្រឹមឆ្នាំ២០១៥»។
បច្ចុប្បន្ន វាមានថ្នាំព្យាបាល ឬបង្កាសម្រាប់ជំងឺអេបូឡាឡើយ ហើយនេះជាមេរោគមួយដែលធ្វើឲ្យមានគ្រុនក្តៅធ្ងន់ធ្ងរ ហើយករណីកាន់តែធ្ងន់ធ្ងរបំផុតនោះ គឺថា អ្នកជំងឺនឹងហូរឈាមមិនឈប់។ ជំងឺនេះបានឆកយកជីវិតមនុស្សជិត១០០០នាក់ហើយក្នុងការរាតត្បាតនាពេលថ្មីៗនេះទូទាំងតំបន់អាហ្វ្រិកខាងលិចឆ្នាំនេះ។ អត្រានៃអ្នកស្លាប់អាចនឹងកើនដល់៩០ភាគរយ បើទោះបីការផ្ទុះឡើងនៃជំងឺនេះបានសម្លាប់មនុស្សប្រមាណជា៥៥ ទៅ៦០ភាគរយក្នុងចំណោមអ្នកដែលផ្ទុកក៏ដោយ៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com