សុខភាព
អន្តរជាតិ
WHO យល់ព្រមឲ្យប្រើប្រាស់ថ្នាំពិសោធន៍អេបូឡា ខណៈដែលអ្នកស្លាប់កើនជាង១០០០នាក់
×
អង្គការសុខភាពពិភពលោកហៅកាត់ថា WHO កាលពីថ្ងៃអង្គារបានអនុញ្ញាតឲ្យមានការប្រើប្រាស់ឱសថពិសោធក្នុងការប្រយុទ្ធប្រឆាំងនឹងជំងឺអេបូឡា ខណៈដែលចំនួនមនុស្សស្លាប់សរុបបានកើនច្រើនជាង១.០០០នាក់ ហើយបព្វជិតអេស្ប៉ាញម្នាក់បានក្លាយជាជនជាតិអឺរ៉ុបដំបូងគេដែលស្លាប់ដោយសារផ្ទុះនូវមេរោគមួយនេះ។
ការប្រកាសដោយភ្នាក់ងារសុខភាពរបស់អង្គការសហប្រជាជាតិមួយនេះ បានកើតឡើង ក្រោយពីក្រុមហ៊ុនមួយរបស់សហរដ្ឋអាមេរិកដែលផលិតថ្នាំពិសោធមួយ បានឲ្យដឹងថា ពួកគេបានបញ្ជូនរាល់ការផ្តត់ផ្តង់ទាំងអស់ទៅកាន់តំបន់អាហ្វ្រិកខាងលិចដែលជាកន្លែងរងការវាយប្រហារខ្លាំង។
ក្រោយពីកិច្ចប្រជុំរបស់មន្ត្រីជំនាញផ្នែកសុខាភិបាលនៅទីក្រុងហ្សឺណែវ WHO បានឲ្យដឹងក្នុងសេចក្តីថ្លែងការណ៍មួយថា៖ «ក្នុងកាលៈទេសៈដ៏សំខាន់នៃការផ្ទុះជំងឺនេះ ហើយប្រសិនបើលក្ខខណ្ឌចាំបាច់ផ្សេងៗត្រូវបានឆ្លើយតប... វាជាការបង្ហាញពីក្រមសីលធម៌ក្នុងការផ្តល់នូវការអន្តរាគមន៍ដោយមិនជាក់លាក់ ខណៈដែលប្រសិទ្ធិភាព និងឥទ្ធិពលនៅមិនទាន់ដឹងនៅឡើយទេ»។
WHO បានឲ្យដឹងថា ការផ្ទុះនូវមេរោគនាពេលបច្ចុប្បន្ននេះ ដែលត្រូវបានគេចាត់ទុកថា ជារឿងដ៏អាក្រក់បំផុតបើគិតចាប់តាំងពីជំងឺអេបូឡាត្រូវបានគេរកឃើញជាលើកទី១ក្នុងរយៈពេល៤ទសវត្សរ៍កន្លងទៅ បានសម្លាប់មនុស្សចំនួន១.០១៣នាក់មកហើយ។ មកទល់ពេលនេះ ករណីផ្សេងៗ ត្រូវបានរកឃើញនៅប្រទេសហ្គីណេ លីប៊ឺរី សេរ៉ាឡេអុង និងនីហ្សេរីយ៉ា ដែលសុទ្ធសឹងជាប្រទេសស្ថិតនៅអាហ្វ្រិកខាងលិច និងជាកន្លែងមានប្រព័ន្ធសុខាភិបាលទន់ខ្សោយ និងស្ថិតក្នុងកម្រិតដ៏ទាប។
បព្វជិតអេស្ប៉ាញម្នាក់ដែលបានផ្ទុកជំងឺអេបូឡា ខណៈដែលកំពុងជួយអ្នកជំងឺនៅលីប៊ឺរីបានស្លាប់ក្នុងមន្ទីរពេទ្យនៅទីក្រុងម៉ាឌ្រីដ កាលពីថ្ងៃអង្គារ ត្រឹមតែរយៈពេល៥ថ្ងៃ ក្រោយពីត្រូវបានជម្លៀសចេញ៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com