កីឡាជាតិ
ជាតិ
ទូតខ្មែរប្រចាំប្រទេសប្រ៊ុយណេកោតសរសើរស្មារតីជាក្រុមរបស់ U21កម្ពុជា លោក ឆាយ សុខន (ស្តាំ) លោកគ្រូបង្វឹក Lee Tae Hoon និង លោក ឆាំង ពិសិដ្ឋ អ្នកដឹកនាំក្រុម U21 នាពិធីជួបជុំនៅស្ថានទូត
× ឆាយ សុខន ឯកអគ្គរាជទូតកម្ពុជា ប្រចាំប្រទេសប្រ៊ុយណេ បានអបអរចំពោះជ័យជម្នះរបស់ក្រុមកីឡាបាល់ទាត់ជម្រើសជាតិយុវជនអាយុក្រោម២១ឆ្នាំកម្ពុជា បន្ទាប់ពីពួកគេបានទទួលជ័យជម្នះ ២-១ លើឥណ្ឌូនេស៊ី កាលពីរសៀលថ្ងៃទី១៦ ខែសីហា ឆ្នាំ២០១៤ ក្នុងព្រឹត្តិការណ៍ Hassanal Bolkiah Trophy។
លោក ឆាយ សុខន ដែលបានទស្សនាការប្រកួតផ្ទាល់នៅកីឡដ្ឋាន Hassanal Bolkiah National Stadium បានបញ្ជាក់ប្រាប់គេហទំព័រថ្មីៗ ក្រោយការប្រកួតថា៖ «ខ្ញុំពិតជាមានមោទនភាពណាស់ចំពោះក្រុម U21 របស់យើង ដែលកំពុងលេងនៅក្នុងប្រទេសប្រ៊ុយណេ។ ខ្ញុំគាំទ្រយ៉ាងពេញទំហឹងចំពោះស្មារតីជាក្រុមនៃឈុត U21 របស់យើង»។
លោក មាស ចាន់ណា ជំនួយការគ្រូបង្វឹកក៏បានបញ្ជាក់ប្រាប់គេហទំព័រថ្មីៗផងដែរថា ទាំងកីឡាករ ទាំងគ្រូបង្វឹកសុទ្ធតែមានការប្រឹងប្រែងខ្លាំងដើម្បីនាំជ័យជម្នះជូនជាតិ។ លោកក៏បានបញ្ជាក់ផងដែរ កម្លាំងចិត្តដ៏សំខាន់នោះ គឺការលើកទឹកចិត្តរបស់ក្រុមអ្នកគាំទ្រ រួមទាំងសហព័ន្ធកីឡាបាល់ទាត់កម្ពុជា ជាពិសេសការឧបត្ថម្ភផ្សេងៗរបស់ស្ថានទូតខ្មែរប្រចាំប្រទេសប្រ៊ុយណេ។
លោក ឆាយ សុខន បានបញ្ជាក់ថា ការជួយគាំទ្រ ជាពិសេសម្ហូបអាហារដល់ក្រុម U21 គឺគ្រាន់តែជាចំណែកមួយនៃការលើកទឹកចិត្តពួកគេប៉ុណ្ណោះ ទោះបីជាយ៉ាងណាក៏ដោយ លោកទទួលស្គាល់ថា ក្រុមទាំងមូលមិនសូវត្រូវមាត់ជាមួយម្ហូបអាហារម៉ាឡេ ឬប្រ៊ុយណេនោះឡើយ។
នៅក្នុងពូល B កម្ពុជាត្រូវជួបជាមួយវៀតណាមនៅថ្ងៃចន្ទ ហើយការទទួលបានជ័យជម្នះនឹងនាំឲ្យកម្ពុជាទទួលកន្លែងមួយនៅវគ្គពាក់កណ្តាលផ្តាច់ព្រ័ត្រ។ អ្នកចាំទី អ៊ុំ វិចិត្រ និងខ្សែប្រយុទ្ធ ចាន់ វឌ្ឍនាកា មានបញ្ហារបួសនាជំនួបជាមួយឥណ្ឌូនេស៊ី ប៉ុន្តែបើតាមការបញ្ជាក់របស់លោក មាស ចាន់ណា ពួកគេមិនមានសភាពធ្ងន់ធ្ងរឡើយ៕
© រក្សាសិទ្ធិដោយ thmeythmey.com