កីឡាអន្តរជាតិ
អន្តរជាតិ
Rio Ferdinand រិះគន់រឿង Man Utd លក់ Welbeck ឱ្យ Arsenal
× ខ្សែការពារជើងចាស់ Rio Ferdinand ដែលធ្លាប់ប្រកបអាជីពនៅក្លិបបាល់ទាត់ Manchester United ក្នុងប្រទេសអង់គ្លេស បានរិះគន់យ៉ាងចាស់ដៃដល់ក្លិបចាស់របស់ខ្លួន ដែលសម្រេចចិត្តលក់ខ្សែប្រយុទ្ធ Danny Welbeck ឱ្យទៅក្លិបគូប្រជែង កាំភ្លើងធំ Arsenal។
ទោះជាបច្ចុប្បន្នបានចេញទៅប្រកបអាជីពនៅក្លិប Queens Park Rangers យ៉ាងណាក៏ដោយ តែ Ferdinand នៅមិនទានអស់អាល័យពី Man Utd នៅឡើយ ហើយបង្ហើរសម្ដីថា៖ «ខ្ញុំមិនចង់ជឿថា Man Utd លក់ Danny ចេញ ជាពិសេសគឺលក់ឱ្យក្រុម Arsenal តែម្ដង។ ជារឿងល្ងង់មួយ ព្រោះ Danny ជាកីឡាករល្អម្នាក់ក្នុងចំណោមកីឡាករល្អជាច្រើនក្នុងលីកអង់គ្លេស ហើយវាជារឿងគ្រោះថ្នាក់ដល់ពួកគេ (Man Utd) ប្រសិនជា កាំភ្លើងធំប្រើ Danny ក្នុងផ្លូវត្រូវ»។
តែខ្សែការពារវ័យ ៣៥ ឆ្នាំរូបនេះជឿជាក់ថា ជារឿងល្អទៅវិញប្រសិនបើ Danny Welbeck បង្ហាញសក្ដានុពលរបស់ខ្លួននៅ Arsenal បានប្រសើរ នោះគេនឹងមានឱកាសបញ្ចេញសមត្ថភាពក្នុងឈុតជម្រើសជាតិអង់គ្លេស ឱ្យកាន់តែខ្លាំងថែមទៀត។
Arsenal បាននាំយកកីឡាករ Danny Welbeck មកកាន់ទឹកដី Emirate Stadium ក្នុងតម្លៃខ្លួន ១៦ លានផោន នៅចំថ្ងៃបិទទីផ្សាដោះដូរកីឡាករនៅតំបន់ទ្វីបអឺរ៉ុប។
ក្រោយពេលក្លាយជាអ្នកដឹកនាំក្រុមបីសាចក្រហម លោក Louis van Gaal បានសម្រេចចិត្តលក់កីឡាករ ជាង ១០ នាក់មានដូចជា Welbeck, Shinji Kagawa, Wilfried Zaha, Javier Hernandez, Nemanja Vidic, Rio Ferdinand, Patrice Evra, Nani, Alex Buttner, Bebe,Federico Macheda, Tom Cleverley៕
ប្រែសម្រួលដោយ ប៉ែន ប៉ារ៉ាឌី
© រក្សាសិទ្ធិដោយ thmeythmey.com