កីឡាអន្តរជាតិ
អន្តរជាតិ
Williams ផ្តួល Wozniacki ដើម្បីឈ្នះពាន US Open ជាលើកទី៦
× កីឡាការិនីវាយកូនបាល់លេខ១ក្នុងពិភពលោក Serena Williams បានឈ្នះពានក្នុងកម្មវិធី Grand Slam ជាលើកទី១៨របស់នាងតាមរយៈការផ្តួលកីឡាការិនី Caroline Wozniacki ក្នុងលទ្ធផល ៦-៣ និង៦-៣ កាលពីថ្ងៃអាទិត្យ ដើម្បីឈ្នះពានរង្វាន់ US Open ជាលើកទី៦របស់នាង។
កីឡាការិនីរបស់អាមេរិករូបនេះ ដែលបានរងនូវការខកចិត្តក្នុងការប្រកួតដណ្តើមពានរង្វាន់សំខាន់បីនៅឆ្នាំនេះ បានបញ្ចប់រយៈពេលមួយឆ្នាំនៃការរង់ចាំ ខណៈដែលនាងបានចូលរួមជាមួយនឹងកីឡាការិនី Chris Evert និង Martina Navratilova ក្នុងការឈ្នះពានរង្វាន់សំខាន់ៗចំនួន១៨លើក ប៉ុន្តែ ដេញតាមពីក្រោយ Steffi Graf ដែលឈ្នះពានរង្វាន់ធំ២២លើកក្នុងយុគសម័យកាល Open និងដេញតាមកំណត់ត្រានៃការឈ្នះពានសរុប២៤លើកដែលត្រូវបានបង្កើតឡើងដោយនាង Margaret Court។
Williams ដែលបានឈានចូលវ័យ៣៣ឆ្នាំនៅចុងខែនេះ បានឲ្យដឹងថា គោលបំណងនៃការឈ្នះពាន Grand Slam ជាលើកទី១៨ បានស្ថិតក្នុងអារម្មណ៍របស់នាង ពីព្រោះ «ខ្ញុំនឹងចូលរួមជាមួយ Chrissy និង Martina ហើយបានគិតថា Serena Williams នឹងស្ថិតក្នុងក្រុមមនុស្សទាំងនោះ»។
Williams ដែលបានញញឹមទាំងរីករាយ ខណៈដែល Evert និង Navratilova បានប្រគល់ពានរង្វាន់ឲ្យទៅនាងនោះ បានឲ្យដឹងថា៖ «តើខ្ញុំជានរណា? ខ្ញុំមិនធ្លាប់បានគិតថា អ្នកនឹងដាក់ឈ្មោះខ្ញុំជាមួយនឹងកីឡាការិនីឆ្នើមៗទាំងនេះឡើយ»៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com