កីឡាជាតិ
ជាតិ
លោក វ៉ាត់ ចំរើន៖ ដាវីន គឺជាអ្នកផ្តល់កម្លាំងដ៏ធំបំផុតរបស់ សៀវម៉ី សៀវម៉ី រួមជាមួយ ដាវីន (របួសដៃ) និងនាយបេសកកម្ម លោក ញាន សុខវិសាល នាជំនួបជាមួយលោកនាយករដ្ឋមន្ត្រី
× ថ្លែងក្នុងសន្និសីទសារព័ត៌មាននាព្រឹកថ្ងៃចន្ទ ទី ៦ ខែតុលា នេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) បានគូសបញ្ជាក់ថា ការទទួលបានមេដាយមាសរបស់កីឡាការិនីតេក្វាន់ដូ ស៊ន សៀវម៉ី ពីព្រឹត្តិការណ៍ Asian Games លើកទី១៧ គឺដោយសារតែមានការផ្តល់ជំនួយផ្លូវចិត្តយ៉ាងធំផងដែរពីសំណាក់កីឡាការិនី ស៊ន ដាវីន ដែលជាបងស្រីបង្កើត និងជាមិត្តរួមក្រុម។
«ដាវីន មានការប្រឹងប្រែងយ៉ាងខ្លាំងដើម្បីពង្រឹងទឹកចិត្ត សៀវម៉ី ដែលជាប្អូនស្រីរបស់ខ្លួន ដែលជាកត្តាចិត្តសាស្ត្រដ៏សំខាន់នៅក្នុងកីឡា»។ នេះជាការកត់សម្គាល់របស់លោក វ៉ាត់ ចំរើន ក្នុងពិធីជួបជាមួយអ្នកសារព័ត៌មានដើម្បីអបអរសាទរដល់ ស៊ន សៀវម៉ី ដែលឈ្នះមេដាយមាសជាប្រវត្តិសាស្ត្រជូនកម្ពុជាពីព្រឹត្តិការណ៍កីឡាអាស៊ី បើគិតចាប់តាំងពីកម្ពុជា បានបង្ហាញវត្តមានចាប់តាំងពីឆ្នាំ១៩៥៤មក។
កីឡាការិនី ស៊ន ដាវីន អាយុ២២ឆ្នាំ បានប្រកួតចាញ់កីឡាការិនីអ៊ីរ៉ង់ Khodabandeh Akram ក្នុងវគ្គ១/៤ផ្តាច់ព្រ័ត្រក្នុងលទ្ធផល ១ទល់នឹង៨ ក្នុងទំងន់លើស៧៣គីឡូក្រាម។ លោក វ៉ាត់ ចំរើន បានស្នើមហាជនទាំងអស់នាំគ្នាបន្តលើកទឹកចិត្តកីឡាការិនី រូបនេះ ពីព្រោះ បរាជ័យរបស់នាងកើតឡើងដោយសារកត្តាមិនអនុគ្រោះជាច្រើន។
អគ្គលេខាធិការ NOCC ដែលបានអង្គុយមើលការប្រកួតផ្ទាល់រវាង ដាវីន និង Akram បានកត់សម្គាល់ថា៖ «ដាវីន ត្រូវប៉ះជាមួយគូប្រជែងដែលមានកំពស់ខ្ពស់ជាងខ្លួន ហើយនាងមានបញ្ហារបួសចាស់ ដែលពីមុនធ្លាប់បែកឆ្អឹង និងរបួសជង្គង់។ ទោះបីជាយ៉ាងណា ដាវីន មានការប្រឹងប្រែងខ្ពស់ក្នុងការប្រកួត»។
ថ្លែងប្រាប់អ្នកសារព័ត៌មាន សៀវម៉ី ក៏បានអះអាងផងដែរថា ក្រៅពីការណែនាំលក្ខណៈបច្ចេកទេសពីគ្រូបង្វឹកកូរ៉េខាងត្បូង លោក ឆយ យ៉ុងសុក ដាវីន ដែលជាបងស្រីបង្កើតរបស់ខ្លួនតែងតែធ្វើការណែនាំជានិច្ចដល់រូបនាង។ សៀវម៉ី លើកឡើងថា ខ្លួនប្រហែលជាមិនមានឱកាសមកដល់ថ្ងៃនេះឡើយ ប្រសិនបើមិនមានការបង្ហាញផ្លូវពីបងប្រុស ស៊ន អេលីត និងបងស្រី ស៊ន សៀវម៉ី ទេនោះ។
នាអំឡុងនៃការប្រកួតរបស់សៀវម៉ី លោក វ៉ាត់ ចំរើន បានលើកឡើងថាមានអ្នកគាំទ្រប្រមាណតែជាង២០នាក់ប៉ុណ្ណោះ ដែលក្នុងនោះមានពលករខ្មែរ១០នាក់ផងដែរ៕
© រក្សាសិទ្ធិដោយ thmeythmey.com