កីឡាអន្តរជាតិ
អន្តរជាតិ
Hamilton ឈ្នះ Russian GP ខណៈដែលក្រុម Mercedes ឈ្នះពានផ្នែកផលិត
× កីឡាករប្រណាំងរថយន្តដ៏ឆ្នើម Lewis Hamilton បានបង្កើតប្រវត្តិសាស្ត្រក្នុងទីក្រុង Sochi កាលពីថ្ងៃអាទិត្យនៅពេលដែលរូបគេបានឈ្នះក្នុងការប្រណាំង Russian Grand Prix ដើម្បីកត់ត្រាជ័យជម្នះជាលើកទី៤ជាប់ៗគ្នារបស់គេ និងដើម្បីបន្ថែមនាំការមុខរបស់គេនៅលើតារាងជើងឯក (តារាងពិន្ទុរួម) ក៏ដូចជាជួយឲ្យក្រុម Mercedes ឈ្នះពានរង្វាន់ផ្នែកផលរិតរថយន្តជាលើកទី១ ។
ខណៈដែលចាប់ផ្តើមការប្រណាំងដោយការស្ថិតនៅទីតាំងនាំមុខគេជាលើកទី៣៨របស់គេនៅលើទីលាន កីឡាកររបស់អង់គ្លេសវ័យ២៩ឆ្នាំរូបនេះ បានធ្វើដំណើរឆ្ពោះទៅកាន់ជ័យជម្នះជាលើកទី៣១នៃអាជីពរបស់គេយ៉ាងងាយដើម្បីតាមស្មើជ័យជម្នះរបស់កីឡាករអង់គ្លេស Nigel Mansell នៅក្នុងសៀវភៅកំណត់ត្រា។
រូបគេបានទៅដល់ខ្សែបន្ទាត់ទីដោយនាំមុខក្នុងថិរវេលា១៣,៦៥៧វិនាទីលើកីឡាករ Nico Rosberg ដែលជាមិត្តរួមក្រុម Mercedes។
ការទទួលជ័យជម្នះរបស់ Hamilton បានធ្វើឲ្យគេនាំមុខចំនួន១៧ពិន្ទុពីលើ Rosberg ដែលបានធ្វើការស្រោចស្រង់ដ៏គួរឲ្យកត់សម្គាល់ពីការធ្លាក់ចេញពីផ្លូវនៃទីលាន ក្រោយពីធ្វើឲ្យមានកំហុសមួយក្នុងការប្រណាំងនៅជុំទី១ ។
បច្ចុប្បន្ន Hamilton វ័យ២៩ឆ្នាំ មានពិន្ទុសរុបចំនួន២៩១ ហើយ Rosberg មាន២៧៤ពិន្ទុ ខណៈដែលនៅសល់ការប្រណាំងត្រឹមតែបីលើកទៀតប៉ុណ្ណោះ។
ការបញ្ចប់ក្នុងចំណាត់ថ្នាក់លេខ១ និងលខ២របស់ក្រុម Mercedes មានន័យថា ក្រុមរបស់អាល្លឺម៉ង់មួយនេះ បានក្លាយជាម្ចាស់ជើងឯកផ្នែកផលិត ខណៈដែលនៅសល់ការប្រណាំងបីលើកទៀតនៅលើទឹកដីសហរដ្ឋអាមេរិក ប្រេស៊ីល និងអាប៊ូដាប៊ី៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com