សុខភាព
អន្តរជាតិ
WHO៖ អេបូឡានឹងកើនដល់១ម៉ឺនករណីក្នុងមួយសប្តាហ៍ក្នុងរយៈពេលពីរខែទៀត
× មន្ត្រីអង្គការសុខភាពពិភពលោកម្នាក់ បាននិយាយថា វានឹងមានករណីថ្មីនៃជំងឺអេបូឡារហូតដល់ទៅ១ម៉ឺនករណីក្នុងមួយសប្តាហ៍នៅរយៈពេលពីរខែខាងមុខទៀត។
លោកវេជ្ជបណ្ឌិត Bruce Aylward អនុប្រធាន WHO បាននិយាយថា ប្រសិនបើការឆ្លើយតបទៅកាន់វិបត្តិនៃជំងឺអេបូឡាមិនត្រូវបានដោះស្រាយក្នុងរយៈពេល៦០ថ្ងៃទេនោះ «មនុស្សជាច្រើនទៀតនឹងស្លាប់» ហើយវានឹងមានតម្រូវការដ៏ធំមួយដើម្បីដោះស្រាយជាមួយនឹងចំនួនកើនឡើងនៃករណីនេះ។
លោកបានឲ្យដឹងថា WHO បានធ្វើការប៉ាន់ប្រមាណថា វាអាចនឹងកើនដល់១០.០០០ករណីក្នុងរយៈពេលមួយសប្តាហ៍សម្រាប់រយៈពេលពីរខែខាងមុខទៀត។ លោក Aylward បានបញ្ជាក់កាលពីបួនសប្តាហ៍មុនថា វាមានករណីឆ្លងថ្មីចំនួន១ពាន់នាក់ក្នុងមួយសប្តាហ៍ បើទោះបីតួលេខនោះរាប់បញ្ចូលទាំងមនុស្សដែលត្រូវបានសង្ស័យថា បានឆ្លងក៏ដោយ។
លោកបានឲ្យដឹងថា WHO កំពុងតែមានបំណងដាក់អ្នកឆ្លងជំងឺចំនួន៧០ភាគរយឲ្យនៅដាច់ដោយឡែកពីគេក្នុងរយៈពេលពីរខែដើម្បីបញ្ចៀសការផ្ទុះការរីករាលនេះ។
WHO បានរាយការណ៍ថា ចំនួនមនុស្សស្លាប់សរុបដោយសាតែជំងឺអេបូឡាបានកើនដល់៤.៤៤៧នាក់ហើយ ដោយភាគច្រើននៃអ្នកស្លាប់ទាំងនោះស្ថិតក្នុងតំបន់អាហ្វ្រិកខាងលិច ហើយអង្គការនេះ បានបញ្ជាក់ថា ចំនួនករណីដែលបានឆ្លង និងសង្ស័យគឺស្ថិតក្នុងចំនួន៨.៩១៤នាក់។ ប្រទេសសៀរ៉ាឡេអូន ហ្គីណេ និងលីប៊េរីយ៉ា បានរងការវាយប្រហារខ្លាំងជាងគេបំផុត៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com