សុខភាព
អន្តរជាតិ
អេបូឡាអាចនឹងត្រូវគេផលិតជាអាវុធជីវសាស្ត្រ ស្របពេលដែលករណីឆ្លងមានការកើនឡើងខ្លាំង
×![]()
ដោយ: ថ្មីៗ
អង្គការសុខភាពពិភពលោកបានព្រមានថា ការឆ្លងមេរោគអេបូឡាអាចកើនឡើងរហ័សបំផុតរហូតដល់ ១ម៉ឺនករណីក្នុងរយៈពេលត្រឹមមួយសបា្តហ៍ប៉ុណ្ណោះ ។ ការព្រមានរបស់អង្គការសុខភាពពិភពលោកនេះ នេះជាសញ្ញាប្រកាសអាសន្នសម្រាប់ពិភពលោកទាំងមូល និងបង្ហាញថាការឆ្លងមេរោគអេបូឡាកាន់តែរីករាលដាលឆាប់រហ័ស និងពិបាកគ្រប់គ្រងថែមទៀតផង។ យ៉ាងណាក៏ដោយ មកទល់ពេលនេះមេដឹកនាំពិភពលោកត្រៀមខ្លួនពិភាក្សាគ្នាដើម្បីស្វែងរកដំណោះស្រាយកាត់បន្ថយគ្រោះថ្នាក់ដែលបណ្តាលមកពីមេរោគអេបូឡានេះនៅអង្គការសហប្រជាជាតិថែមទៀតផង។ គេព្រួយបារម្ភថាការកើនឡើងនៃការឆ្លងមេរោគ នឹងធ្វើអោយមនុស្សស្លាប់កាន់តែច្រើន ហើយគេភ័យខ្លាចថាក្រុមភេរវជនអាចប្រើប្រាស់មេរោគអេបូឡានេះដើម្បីផលិតជាអាវុធជីវសាស្ត្រថែមទៀតផង។
សូមស្តាប់ការបកស្រាយរបស់លោក សៅ ផលនិស្ស័យ ឆ្លើយតបទៅនឹងការចោទសួររបស់លោក ជាវ សំណាង ទាក់ទិននឹងបញ្ហានេះ៖
១.សំនួរ៖និស្ស័យថ្ងៃនេះយើងផ្តោតការចាប់អារម្មណ៍លើការរីករាលដាលនៃមេរោគឆ្លងអេបូឡាវិញម្តង។ ម្សិលមិញនេះ អង្គការសុខភាពពិភពលោកបានផ្តល់សញ្ញាប្រកាសអាសន្ន ថាការឆ្លងនៃមេរោគអេបូឡានេះកាន់តែកើនឡើងខ្លាំងគួរអោយព្រួយបារម្ភខ្លាំង។ ខ្ញុំចង់ដឹងថាតើអ្វីជាសញ្ញាប្រកាសអាសន្នដែលស្ថាប័ននេះបង្ហាញដល់ពិភពលោកទៅ?
១.ចម្លើយ៖អង្គការសុខភាពពិភពលោកបានព្រមានកាលពីម្សិលមិញថា ការឆ្លងរីករាលដាលនៃមេរោគអេបូឡាអាចនឹងកើតឡើងយ៉ាងឆាប់រហ័សបំផុតរហូតដល់ ១ម៉ឺនករណីក្នុងរយៈពេលត្រឹមតែមួយសប្តាហ៍ប៉ុណ្ណោះនៅដើមខែធ្នូខាងមុខ។ ការព្រមានរបស់អង្គការសុខភាពពិភពលោកនេះ ត្រូវបានគេចាត់ទុកជាសញ្ញាប្រកាសអាសន្នសម្រាប់ពិភពលោកទាំងមូល ហើយបង្ហាញថាការឆ្លងមេរោគអេបូឡាកាន់តែរីករាលដាលខ្លាំងមែនទែន ហើយនិងពិបាកគ្រប់គ្រងថែមទៀតផង។ ការផ្តល់សញ្ញាប្រកាសអាសន្ននេះកើតមានឡើងស្របពេលដែលចំនួនអ្នកឆ្លងនិងស្លាប់ដោយសារមេរោគអេបូឡានេះ មានការកើនឡើងគួរអោយភ្ងាក់ផ្អើលនៅក្នុងតំបន់អឺរ៉ុប ហើយមេដឹកនាំពិភពលោកបានត្រៀមខ្លួនដើម្បីពិភាក្សាគ្នាពីបញ្ហាវិធានការទប់ស្កាត់និងកាត់បន្ថយគ្រោះថ្នាក់នៃមេរោគឆ្លងនេះនៅស្ថាប័នអង្គការសហប្រជាជាតិនៅពេលខាងមុខនេះ។ មន្ត្រីអង្គការសុខភាពពិភពលោក លោក Bruce Aylward បានអោយដឹងថា ការប៉ាន់ស្មានរបស់អង្គការសុខភាពពិភពលោក ចំនួនករណីឆ្លងនឹងអាចកើនឡើងដល់ចន្លោះពី ៥ពាន់ ទៅ១ម៉ឺនករណី ត្រឹមតែក្នុងរយៈពេល១សប្តាហ៍គិតនៅសប្តាហ៍ទីមួយនៃខែធ្នូតែប៉ុណ្ណោះ។ គិតមកត្រឹមពេលនេះ ចំនួនអ្នកដែលស្លាប់ដោយសារឆ្លងមេរោគអេបូឡាកើនដល់ ៤៤៤៧នាក់ទៅហើយ ហើយចំនួនអ្នកដែលឆ្លងថ្មីទៀតក៏កាន់តែកើនឡើងផងដែរជាពិសេសនៅក្នុងប្រទេសដែលរងការវាយប្រហារខ្លាំងបំផុតដោយមេរោគអបូឡា ដូចជាលីបេរីយ៉ា សេរ៉ាឡេអូន និងហ្គីណេ។ កាលពីថ្មីៗនេះ ប្រធានាធិបតីអាមេរិក និងលោកប្រមុខស្ថាប័នអង្គការសហប្រជាជាតិបានអំពាវនាវអោយបណ្តាប្រទេសទាំងអស់ចូលរួមយុទ្ធនាការប្រឆាំងនឹងការកើនឡើងនៃការឆ្លងមេរោគអេបូឡានេះផងដែរ។
២.សំនួរ៖ និស្ស័យ ថ្មីៗនេះ មេដឹកនាំពិភពលោកកំពុងបង្ហាញក្តីបារម្ភចំពោះការកើនឡើងនៃករណីឆ្លងមេរោគអេបូឡា ហើយបុគ្គលិកដែលបម្រើសេវាសុខាភិបាលនៅតំបន់អាហ្វ្រិកខាងលិចបានចេញមុខតវ៉ាទាមទារអោយមានការផ្តល់ប្រាក់ឧបត្ថម្ភអោយបានខ្ពស់ដល់ពួកគេថែមទៀតផង ដោយសារការងារវាគ្រោះថ្នាក់ខ្លាំងពេក។ តើករណីនេះគេបានដោះស្រាយយ៉ាងណាដែរទៅបាទ?
២.ចម្លើយ៖ បាទក្រុមគ្រូពេទ្យ និងបុគ្គលិកដែលបម្រើការងារផ្នែកសុខាភិបាលនៅអាហ្វ្រិកខាងលិចមាននៅ លីបេរីយ៉ា បានចេញមុខតវ៉ា ដោយទាមទារអោយមានការផ្តល់ជំនួយនិងថវិកាដល់ពួកគេអោយខ្ពស់ជាមុនដើម្បីថែរក្សាអ្នកជំងឺដែលឆ្លងមេរោគអេបូឡានោះ។ តាមពិតទៅការងារពួកគេប្រឈមមុខនិងគ្រោះថ្នាក់ខ្ពស់ ហើយជំនួយនិងថវិកាដែលពួកគេទទួលបានហាក់បីដូចជាមិនគ្រប់គ្រាន់ស្មើនឹងការលះបង់របស់ពួកគេនោះឡើយ។យ៉ាងណាក៏ដោយក្រោយពីមានការផ្ទុះឡើងនូវការតវ៉ានេះ គេឃើញប្រធានាធិបតីមេរិក លោក បារ៉ាក់ អូបាម៉ានិងលោក បានគីមូន ប្រមុខអង្គការសហប្រជាជាតិបានអំពាវនាវអោយមេដឹកនាំពិភពលោកផ្សេងទៀត ចូលរួមផ្តល់ជំនួយឧបត្ថម្ភបន្ថែម រួមទាំងសម្ភារៈប្រើប្រាស់ដើម្បីពង្រឹងនិងបង្កើនការគ្រប់គ្រងនិងទប់ស្កាត់ការឆ្លងរីករាលដាលនៃមេរោគអេបូឡានេះ។ ក្រោយមានការអំពាវនាវគេឃើញមានអង្គការអន្តរជាតិ ក្រុមហ៊ុនឯកជន និងប្រទេសមួយចំនួនបានប្រកាសផ្តល់ជំនួយដល់ស្ថាប័នដែលទទួលបន្ទុកទប់ស្កាត់និងប្រឆាំងមេរោគអេបូឡានេះ។
៣.សំនួរ៖ ថ្មីៗនេះបណ្តាស្ថាប័នជាច្រើនបានផ្តល់ជំនួយជាថវិកាដល់ស្ថាប័នដែលទទួលបន្ទុកទប់ស្កាត់និងប្រឆាំងមេរោគអេបូឡានេះ។ គេលេចលឺព័ត៌មានថា ស្ថាបនិកហ្វេសប៊ុកបានប្រកាសផ្តល់លុយជំនួយដើម្បីពង្រីកការទប់ស្កាត់និងកាត់បន្ថយគ្រោះថ្នាក់ដែលបណ្តាលមកពីមេរោគអេបូឡាថែមទៀតផង។ តើព័ត៌មាននេះវាយ៉ាងណាដែរទៅ?
៣.ចម្លើយ៖រឿងនេះជាការពិត ព្រោះកាលពីម្សិលមិញនេះសហស្ថាបនិកហ្វេសប៊ុកលោក Mark Zuckerberg បានប្រកាសថាលោកសម្រេចផ្តល់ជំនួយជាថវិកាប្រមាណ ២៥លានដុល្លារអាមេរិកដល់មូលនិធិនៃមជ្ឈមណ្ឌលដើម្បីគ្រប់គ្រងមេរោគឆ្លងរបស់អាមេរិក ដើម្បីបង្កើនសមត្ថភាពទប់ស្កាត់ និងកាត់បន្ថយគ្រោះថ្នាក់ការឆ្លងមេរោគនេះ។ ការផ្តល់ជំនួយជាថវិកានេះអាចនឹងជួយពង្រឹងនិងបង្កើនសមត្ថភាពក្នុងការប្រយុទ្ធជាមួយមេរោគឆ្លងនេះបានមួយកម្រិតដែរ។ ដោយឡែកទីភ្នាក់ងារថាមពលអាតូមិចអន្តរជាតិIAEAបានចូលរួមក្នុងយុទ្ធនាការទប់ស្កាត់និងកម្ចាត់មេរោគឆ្លងនេះនៅអាហ្វ្រិកខាងលិច ដោយផ្តល់សម្ភារៈ និងអ្នកជំនាញនានារបស់ខ្លួនទៅទីនោះដើម្បីត្រួតពិនិត្យករណីឆ្លងមេរោគនេះ។ប្រធានស្ថាប័នខាងលើលោក Yukiya Amano បានថ្លែងថា បើទោះជាជំនួយរបស់ស្ថាប័នលោកវាតិចតួចក៏ដោយតែវាមានប្រសិទ្ធភាពខ្ពស់សម្រាប់ទប់ស្កាត់ក៏ឆ្លងរាលដាលនៃមេរោគអេបូឡានេះ។ ស្ថាប័នខាងលើនឹងផ្តល់បច្ចេកវិទ្យាថ្មីទំនើប សម្រាប់ត្រួតពិនិត្យស្វែងរកពីអ្នកជំងឺឆ្លងទាំងនោះបានរហ័ស និងមានប្រសិទ្ធភាពខ្ពស់ជាងមុន។
៤. សំនួរ៖ ជាសំនួរចុងក្រោយរបស់ខ្ញុំនិស្ស័យ ចាប់ពីមានការផ្ទុះឡើងនៃការឆ្លងរីករាលដាលនៃមេរោគអេបូឡា បានធ្វើអោយមានការភ័យខ្លាចថា គេនឹងអាចប្រើប្រាស់មេរោគអេបូឡាដើម្បីផលិតជាអាវុធជីវសាស្ត្រថែមទៀតផង។តើបញ្ហានេះវាយ៉ាងណាដែរទៅបាទ?
ចម្លើយ៖ គេព្រួយបារម្ភថា វាមានការលំបាកក្នុងការទប់ស្កាត់មិនអោយមានការផលិតប្រភេទអាវុធជីវសាស្ត្រ បើទោះជាពិភពលោកមានអនុញ្ញាដែលហាមឃាត់មិនអោយប្រើប្រាស់អាវុធគីមី ឬអាវុធជីវសាស្ត្រឆ្នាំ ១៩៧២ក៏ពិតមែន។ អ្នកជំនាញការរបស់រុស្ស៊ីម្នាក់លោក Vladimir Nikiforov បានអោយដឹងដែរថា អាវុធជីវសាស្ត្រវាមិនមានអ្វីដែលពិបាកធ្វើដូចជាអាវុធនុយក្លេអ៊ែរឡើយ។ ដើម្បីផលិតនុយក្លេអ៊ែរ គេចាំបាច់ត្រូវការចម្រាញ់សារធាតុអ៊ុយរ៉ាញ៉ូមជាច្រើនដំណាក់កាល ទម្រាំសម្រេចបាន តែសម្រាប់អាវុធគីមីវិញនោះ គឺអាចប្រើបន្ទប់ស្រាវជ្រាវតូចមួយ ហើយប្រើប្រាស់សារធាតុជីវសាស្ត្រដែលស្រួលរកបានថែមទៀតផង។ លោកបានបន្ថែមថា ពិភពលោកអាចស្ថិតនៅក្នុងភាពគ្រោះថ្នាក់ព្រោះគេមិនអាចធានាបានពីប្រទេសដែលមានចេតនាប្រើប្រាសមេរោគប្រភេទនេះផលិតទៅជាអាវុធជីវសាស្ត្រឡើយ។ ក្រៅពីអ្នកជំនាញរុស្ស៊ី លោក Peter Walsh ដែលជាសាស្ត្រាចារ្យ និងអ្នកជំនាញនៃសាកលវិទ្យាល័យ Cambridge បានថ្លែងព្រមានដូចគ្នាដែរចំពោះបញ្ហានេះ។ លោកអះអាងថា ក្រុមភេរវជនអាចនឹងប្រើប្រាស់មេរោគដើម្បីផលិតជាអាវុធ និងធ្វើអោយប៉ះពាល់ដល់ពិភពលោកទាំងមូល។ លោកបានបញ្ជាក់បន្ថែមថា ប្រសិនបើមានបញ្ហាដូច្នេះមែន ចំនួនមនុស្សស្លាប់នឹងមានចំនួនច្រើនខ្លាំង ព្រោះវាជាគ្រោះមហន្តរាយនៃសាកលលោក។ ក្រុមភេរវជនអាចនឹងប្រើប្រាស់មេរោគផលិតអាវុធជីវសាស្ត្រាឬគ្រាប់បែកជីវសាស្ត្រ ដែលមានឥទ្ធិពល ហើយចាប់ផ្តើមទម្លាក់វាទៅកាន់តំបន់ដែលមានប្រជាជនរស់នៅច្រើន ក្រោយមកមេរោគនឹងឆ្លងចូលខ្លួនមនុស្សបន្តគ្នាតែម្តង។
© រក្សាសិទ្ធិដោយ thmeythmey.com
