កីឡាអន្តរជាតិ
អន្តរជាតិ
Senzo Meyiwa អ្នកចាំទីជម្រើសជាតិអាហ្វ្រិកខាងត្បូងត្រូវបានគេបាញ់សម្លាប់
× អ្នកចាំទី Senzo Meyiwa ដែលជាប្រធានក្រុមកីឡាបាល់ទាត់ជម្រើសជាតិអាហ្វ្រិកខាងត្បូង បានស្លាប់ ក្រោយពីរងនូវការបាញ់ប្រហារកាលពីថ្ងៃចន្ទ។ នេះបើយោងទៅតាមការបញ្ជាក់របស់ប៉ូលិសអាហ្វ្រិកខាងត្បូង។ ឧប្បត្តិហេតុនេះ ត្រូវបានគេរាយការណ៍ថា បានកើតនឡើងនៅផ្ទះមិត្តស្រីរបស់ Meyiwa ក្នុងទីក្រុង Vosloorus ក្បែររដ្ឋធានី Johannesburg។
កីឡាករវ័យ២៧ឆ្នាំរូបនេះ បានលេងឲ្យក្លិប Orlando Pirates ហើយក៏បានលេងឲ្យក្រុមបាល់ទាត់ជម្រើសជាតិអាហ្វ្រិកខាងត្បូងក្នុងយុទ្ធនាការប្រកួតជម្រុះ Africa Cup of Nations បួនលើកចុងក្រោយផងដែរ។
កាលពីថ្ងៃសៅរ៍ រូបគេបានលេងឲ្យក្លិបរបស់គេ ដែលនៅពេលនោះពួកគេបានឈានទៅប្រកួតវគ្គពាក់កណ្តាលផ្តាច់ព្រ័ត្រនៃពានរង្វាន់ League Cup របស់អាហ្វ្រិកខាងត្បូង។ ក្រុម Orlando Pirates បានផ្តួលក្រុម Ajax Cape Town ក្នុងលទ្ធផល ៤-១ ។
ក្នុងសេចក្តីប្រកាសមួយ ប៉ូលិសអាហ្វ្រិកខាងត្បូង បាននិយាយថា ជនសង្ស័យពីរនាក់បានចូលទៅក្នុងផ្ទះនោះនៅម៉ោងប្រមាណជា៨យប់ (ម៉ោងក្នុងស្រុក) ខណៈដែលជនសង្ស័យទី៣នៅចាំនៅខាងក្រៅផ្ទះ។ ជនសង្ស័យទាំង៣នាក់នោះសុទ្ធសឹងរត់បាត់ស្រមោល ក្រោយពីការបាញ់ប្រហារត្រូវបានធ្វើឡើង ខណៈដែលបណ្តាញសារព័ត៌មានបានរាយការណ៍ថា ពួកគេគឺជាចោរលួចគាស់ផ្ទះ។
រង្វាន់ជាទឹកប្រាក់១៤.០០០ដុល្លារអាមេរិក នឹងត្រូវបានផ្តល់ឲ្យសម្រាប់ការផ្តល់ព័ត៌មានដើម្បីឈានទៅដល់ឃាត់ខ្លួនជនសង្ស័យ៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com