ជាតិ
គណៈកម្មការទូកខេត្តកំពង់ឆ្នាំង៖ គ្មានការរើសអើងនយោបាយលើទូក «ក្តាមប្រៃ» ឡើយ
× បន្ទាប់ពីចប់ព្រះរាជពិធីបុណ្យអុំទូក លោក លៀង ជុំសុបិន្ត សមាជិកគណៈកម្មការដឹកនាំទូកខេត្តកំពង់ឆ្នាំង បានចេញមុខបកស្រាយដើម្បីឆ្លើយតបទៅនឹងការចោទប្រកាន់នានាទាក់ទងនឹងករណីរើសអើងលើទូកងឈ្មោះ «ក្តាមប្រៃ» ។
«ក្តាមប្រៃ» ជាទូកមួយក្នុងចំណោមទូកចំនួន២២របស់ខេត្តកំពង់ឆ្នាំងដែលបានមកចូលរួមប្រកួតក្នុងព្រះរាជពិធីបុណ្យអុំទូករយៈពេលបីថ្ងៃ (ថ្ងៃទី៥-៧ ខែវិច្ឆិកា) នៅរាជធានីភ្នំពេញ។ ទូកដែលមានប្រភពពីវត្តកំពង់ត្រឡាចក្រោម ក្នុងស្រុកកំពង់ត្រឡាចនេះ ត្រូវបានបណ្តាញផ្សព្វផ្សាយមួយចំនួនលើកឡើងថា រងនូវការរើសអើងផ្នែកនយោបាយពីសំណាក់អាជ្ញាធរខេត្ត ដោយសារតែក្រុមចំណុះទូកមិនព្រមភ្ជាប់ឈ្មោះលោកនាយករដ្ឋមន្ត្រី ហ៊ុន សែន ដូចទូកជាច្រើនទៀត។
លោក លៀង ជុំសុបិន្ត បានសរសេរនៅក្នុងសេចក្តីបំភ្លឺរបស់ខ្លួនថា៖ «មួយរយៈពេលនេះ មានបងប្អូនសកម្មជនខាងគណបក្សមួយនោះ ដោយរួមទាំងព្រះសង្ឃឯករាជ្យ និងប្រព័ន្ធផ្សព្វផ្សាយមួយចំនួន បំផុសបំផុលផ្អើលគគ្រឹកគគ្រេង ចោទប្រកាន់យ៉ាង អយុត្តិធម៌បំផុតចំពោះអាជ្ញាធរខេត្ត នឹងគណៈកម្មការដឹកនាំ ទូកខេត្តកំពង់ឆ្នាំង ថាមិនបានគិតគូរយកចិត្តទុកដាក់ ចំពោះទូកឈ្មោះ ក្ដាមប្រៃ របស់ស្រុកកំពង់ត្រឡាច»។
សមាជិកគណៈកម្មការដឹកនាំទូកខេត្តកំពង់ឆ្នាំងរូបនេះ បានអះអាងថា ក្រុមការងាររបស់លោក បានខិតខំបំពេញតួនាទីយ៉ាងសកម្ម លះបង់សព្វបែបយ៉ាង ដើម្បីជួយមើលថែទាំ សម្របសម្រួលរាល់ការលំបាកផ្សេងៗក្នុងការរស់នៅរបស់បងប្អូនកីឡាករ កីឡាការនីទាំងអស់ ជាពិសេស ការរៀបចំពិធីជូនដំណើរមកភ្នំពេញតាមបែបសាសនា និងប្រពៃណី ការផ្តល់ថវិកា និងស្បៀងអាហារពីសំណាក់ថ្នាក់ដឹកនាំខេត្ត និងសប្បុរសជន រួមទាំងការផ្តល់ភាពងាយស្រួលផ្សេងៗ លើការធ្វើដំណើរ ការហូបចុក និងការស្នាក់នៅជាដើម។
លោក លៀង ជុំសុបិន្ត បានបញ្ជាក់ថា បន្ថែមពីលើនេះ ទូកក្តាមប្រៃ រួមទាំងទូកផ្សេងទៀតរបស់ខេត្តកំពង់ឆ្នាំង ទទួលបាននូវការយកចិត្តទុកដាក់ពីលោក គង់ សំអុល រដ្ឋមន្ត្រីក្រសួងព្រះបរមរាជវាំង និងលោក អ៊ុក រ៉ាប៊ុន រដ្ឋមន្ត្រី ក្រសួងកសិកម្មផងដែរ។
ទួក «ក្តាមប្រៃ» ស្ថិតក្នុងចំណោមទូកដែលបានជាប់ផែនលេខ១ ផ្នែកទូកអុំផ្នែកបុរស ដោយឈ្នះទាំង៦ជើងក្នុងរយៈពេលបីថ្ងៃកន្លងមក។ ទាក់ទងនឹងព័ត៌មានដែលថា គណៈកម្មការទូកខេត្តកំពង់ឆ្នាំងរារាំងការផ្តល់អំណោយរបស់សប្បុរសជន ត្រូវបានលោក ជុំសុបិន្ត បកស្រាយថា៖ «ក្រុមការងារយើងខ្ញុំតែងរីករាយស្វាគមន៍ចំពោះការជួយឧបត្ថម្ភគាំទ្ររបស់សប្បុរសជនជិតឆ្ងាយទាំងអស់ ប៉ុន្តែអ្វីដែល គួរឲ្យកត់សម្គាល់សម្រាប់ក្រុមសកម្មជនខាងលើ គឺពេលក្រុមពួកគាត់ចុះមកជួបកីឡាករទូកក្ដាមប្រៃម្ដងៗ ពួកគាត់មិនដែលមកប្រាស្រ័យទាក់ទង សាកសួរ ឬផ្ដល់ព័ត៌មានដល់ក្រុមគណៈកម្មការដឹកនាំទូកឡើយ ពួកគាត់មកម្ដងៗមានគ្នាច្រើន មកប្រជុំជួបជុំជាមួយកីឡាករ ជជែកពិភាក្សាលាយឡំបញ្ហានយោបាយ ប្រើ សម្ដីវាយប្រហារ មកលើក្រុមការងារយើងខ្ញុំ ចោទប្រកាន់ដោយ គ្មានមូលដ្ឋាន ច្បាស់លាស់ មិនបានសាកសួរ ប្រមូលព័ត៌មាន គ្រប់ជ្រុង ជ្រោយ»។
មន្ត្រីសាលាខេត្តកំពង់ឆ្នាំងរូបនេះ បានច្រានចោលការលើកឡើងថា ក្តាមគ្មានអ្នកឧបត្ថម្ភ គ្មានអ្នកគិតគូសោះ ជាពិសេសការលើកឡើងថា ទូកគ្មានពាក្យ «សែន» គឺមិនឈ្នះទូកដែលមានឈ្មោះ «សែន»។ «យើងខ្ញុំរីករាយស្វាគមន៍នូវរាល់ជំនួយឧបត្ថម្ភ លើកទឹកចិត្តដល់ទូកទាំងអស់របស់ខេត្តយើងខ្ញុំ ប៉ុន្តែជំនួយបន្តិចបន្តួចដែលមានបង្កប់ចេតនាមិនស្មោះត្រង់ ចង់ទទួលបានមកវិញនូវក្រេឌីត មើលរំលងនូវកិច្ចខិតខំ ប្រឹងប្រែង និងការយកចិត្តទុកដាក់ពីគ្រប់ថ្នាក់ដឹកនាំ ពីអាជ្ញាធរគ្រប់លំដាប់ថ្នាក់ គឺជាការមិនអាចទទួលយកបាន»។ នេះជាការបន្ថែមរបស់លោក លៀង ជុំសុបិន្ត៕
© រក្សាសិទ្ធិដោយ thmeythmey.com