អន្តរជាតិ
ប្រាយុទ្ធស្នើសុំសមាជិកអាស៊ានរឹតបន្តឹងសហប្រតិបត្តិការមុនសមាហរណកម្ម
× នាយករដ្ឋមន្ត្រីថៃឧត្តមសេនីយ៍ ប្រាយុទ្ធ ចាន់អូចា បានប្រកាសអំពាវនាវអោយប្រទេសជាសមាជិកអាស៊ានទាំងបង្កើនការសហប្រតិបត្តិការជាមួយគ្នាអោយកាន់តែស៊ីជម្រៅ ទាំងផ្នែកសេដ្ឋកិច្ចនិងសង្គមមុនការមកដល់នៃសមាហរណកម្មសេដ្ឋកិច្ចចុងឆ្នាំ២០១៥ខាងមុខ។ លោកប្រាយុទ្ធបានអំពាវនាវដូច្នេះ ស្របពេលដែលលោកចូលរួមក្នុងសន្និសីទកំពូលអាស៊ានលើកទី២៥ដែលប្រារព្ធឡើងនាទីក្រុងណៃពីដ៏មីយ៉ាន់ម៉ា ម្សិលមិញនេះ។
នាយករដ្ឋមន្ត្រីថៃ ឧត្តមសេនីយ៍ ប្រាយុទ្ធ ចាន់អូចា បានអំពាវនាវអោយបណ្តាមេដឹកនាំប្រទេសដែលជាសមាជិកអាស៊ានទាំងអស់ផ្តើមការបង្កើនទំនាក់ទំនង និងកិច្ចសហប្រតិបត្តិការជាមួយគ្នាលើវិស័យសំខាន់ៗទាំងសង្គម សេដ្ឋកិច្ច នយោបាយ អោយបានស៊ីជម្រៅ មុនការឈានមកដល់នៃកសមាហរកម្មសេដ្ឋកិច្ចចុងឆ្នាំ ២០១៥ខាងមុខនេះ។
តាមពិតទៅ លោក ប្រាយុទ្ធ បានឆ្លៀតយកវេទិការតំបន់នៃជំនួបប្រចាំឆ្នាំរវាងប្រមុខរដ្ឋ ប្រមុខរដ្ឋាភិបាលប្រទេសមាជិកអាស៊ាន ដើម្បីស្នើសុំអោយបណ្តាមេដឹកនាំទាំងនោះផ្តោតការចាប់អារម្មណ៍លើការបង្កើនកិច្ចសហប្រតិបត្តិការជាមួយគ្នា ដ្បិតថា លទ្ធភាពនៃការកសាងសហគមន៍សេដ្ឋកិច្ចអាស៊ានសម្រាប់ឆ្នាំ ២០១៥ នៅតែជាបញ្ហាប្រឈមនៅឡើយមកទល់ពេលនេះ។
លោក ប្រាយុទ្ធ បានថ្លែងថា ប្រទេសជាសមាជិកអាស៊ានទាំង១០ ចាំបាច់ត្រូវបង្កើតតំបន់សេដ្ឋកិច្ចពិសេសនៅតាមបណ្តោយបន្ទាត់ព្រំដែន ដើម្បីជំរុញអោយទំនាក់ទំនងរវាងប្រទេសទាំងអស់កាន់តែជិតស្និទ្ធ និងផ្តល់នូវផលប្រយោជន៍សម្រាប់ដំណើរការសមាហរណកម្មសេដ្ឋកិច្ចខាងមុខ។
លោកឧត្តមនីយ៍រូបនេះបានសង្កត់ធ្ងន់ថា ការពង្រឹង និងពង្រីកទំនាក់ទំនង រួមទាំងការបង្កើតតំបន់សេដ្ឋកិច្ចពិសេសតាមព្រំដែននោះជាផ្នែកនៃការកាតបន្ថយគម្លាតនៃការអភិវឌ្ឍន៍រវាងសមាជិកទាំងអស់នោះ។
ដោយឡែកក្រៅពីស្នើសុំអោយមេដឹកនាំអាស៊ានផ្តោតលើការបង្កើនកិច្ចសហប្រតិបត្តិការលោក ប្រាយុទ្ធ ក៏បានបង្ហាញក្តីបារម្ភពីការកើនឡើងនៃបញ្ហាប្រឈមឆ្លងដែន ជាពិសេសបញ្ហាជួញដូរមនុស្សខុសច្បាប់នោះ។
ប្រទេសថៃបច្ចុប្បន្នកំពុងតែរៀបចំព្រាងផែនការតំបន់ រួមទាំងអនុសញ្ញាអាស៊ានប្រឆាំងការជួញដូរមនុស្ស ហើយថៃកំពុងតែព្យាយាមជំរុញអោយមេដឹកនាំអាស៊ានគាំទ្រចំណាត់ការនេះដើម្បីអោយការងារនេះអាចបញ្ចប់បានត្រឹមឆ្នាំក្រោយ។ ក្រៅពីនេះលោក ប្រាយុទ្ធ ក៏បានលើកឡើងពី បញ្ហាសំខាន់ផ្សេងៗជាច្រើនដែលប្រទេសមាជិកអាស៊ានចាំបាច់ត្រូវដោះស្រាយជាពិសេសបញ្ហាទប់ស្កាត់ចរាចរណ៍គ្រឿងញៀនខុសច្បាប់ ពង្រឹងការគ្រប់គ្រងគ្រោះមហន្តរាយក្នុងតំបន់ ការលើកកម្ពស់សហប្រតិបត្តិការសេដ្ឋកិច្ច កិច្ចចរចាបង្កើតកិច្ចព្រមព្រៀងភាពជាដៃគូពាណិជ្ជកម្មក្នុងតំបន់ រួមទាំងមធ្យោបាយដោះស្រាយជម្លោះសមុទ្រចិនខាងត្បូងថែមទៀតផង។
យ៉ាងណាក៏ដោយលោកឧត្តមសេនីយ៍ ប្រាយុទ្ធ បានថ្លែងអំណរគុណដល់បណ្តាមេដឹកនាអាស៊ានទាំងអស់ដែលតែងផ្តល់ការគាំទ្រនិងយោគយល់ចំពោះការវិវត្តន៍នៃស្ថានការណ៍នយោបាយនៅក្នុងប្រទេសថៃ ក្រោយថ្ងៃរដ្ឋប្រហារយោធាឥតបង្ហូរឈាម ២២ឧសភាផងដែរ៕
© រក្សាសិទ្ធិដោយ thmeythmey.com