អន្តរជាតិ
នយោបាយអន្តរជាតិ
រុស្ស៊ីគ្រោងសង់រោងចក្រនុយក្លេអ៊ែរ១០នៅឥណ្ឌា
×
ក្នុងដំណើរទស្សនកិច្ចរបស់លោក វ្ល៉ាឌីមៀ ពូទីន ប្រធានាធិបតីរុស្ស៊ីទៅកាន់ប្រទេសមហាយក្សអាស៊ីខាងត្បូងឥណ្ឌា មេដឹកនាំរូបនេះបានឯកភាពចុះហត្ថលេខាលើកិច្ចព្រមព្រៀងថាមពលជាមួយសមភាគីលោក នាយករដ្ឋមន្ត្រី នារិន្ទ្រា ម៉ូឌី។ ការពង្រឹងកិច្ចសហប្រតិបត្តិការផ្នែកថាមពលនេះ នឹងអនុញ្ញាតអោយរុស្ស៊ីអាចសាងសង់រោងចក្រនុយក្លេអ៊ែរប្រមាណ១០បន្ថែមទៀតនាពេលខាងមុខនេះ។
មុំ ពិទូរ្យ លម្អិតព័ត៌មាននេះ
នាយករដ្ឋមន្ត្រីឥណ្ឌាលោក នារិន្ទ្រា ម៉ូឌីបានអោយដឹងកាលពីម្សិលមិញនេះថា រុស្ស៊ីនឹងរៀបចំសាងសង់ស្ថានីយ៍នុយក្លេអ៊ែរប្រមាណ ១០ សម្រាប់ប្រទេសឥណ្ឌា។ ការលើកឡើងពីការសាសងសង់រោងចក្រថាមពលនុយក្លេអ៊ែរ របស់នាយករដ្ឋមន្ត្រីឥណ្ឌានេះ កើតមានឡើងស្របពេលដែលប្រធានធិបតីរុស្ស៊ីលោក វ្ល៉ាឌីមៀ ពូទីន ធ្វើទស្សនកិច្ចផ្លូវរដ្ឋទៅកាន់ប្រទេសឥណ្ឌា និងបន្ទាប់ពីពេលដែលលោកពិភាក្សានិងចុះហត្ថលេខាលើកិច្ចព្រមព្រៀងលើវិស័យថាមពលជាច្រើនជាមួយលោក ពូទីន។
ដំណើរទស្សនកិច្ចរបស់មេដឹកនាំកំពូលរុស្ស៊ីលោក ពូទីន ទៅកាន់ឥណ្ឌា គឺក្នុងគោលបំណងរឹតបន្តឹងចំណងមិត្តភាពរវាងប្រទេសទាំងពីរ និងដើម្បីបង្កើនកិច្ចសហប្រតិបត្តិការផ្នែកថាមពល និងវិស័យការពារជាតិ។ លោក ពូទីន ខំប្រឹងរឹតបន្តឹងទំនាក់ទំនងជាមួយមហាយក្សប្រជាធិបតេយ្យឥណ្ឌាលើកនេះ កើតឡើងស្របពេលដែលសេដ្ឋកិច្ចរុស្ស៊ីបន្តប្រឈមមុខជាមួយនឹងទណ្ឌកម្មសេដ្ឋកិច្ចរបស់ប្រទេសលោកខាងលិច ដោយសារតែតួនាទីរុស្ស៊ីក្នុងវិបត្តិអ៊ុយក្រែន។
ទណ្ឌកម្មជាច្រើនជំហានត្រូវបានសហភាពអឺរ៉ុប និងសហរដ្ឋអាមេរិកដាក់ប្រឆាំងនឹងក្រុងម៉ូស្គូ ក្រោយការក្រសោបយកទឹកដី Crimea ពីអ៊ុយក្រែនកាលពីខែមិនា ហើយរុស្ស៊ីដែលធ្លាប់នាំចេញឧស្ម័ន និងប្រេងជាច្រើន ទៅកាន់បណ្តាប្រទេសសមាជិកសហភាពអឺរ៉ុបនោះក៏ប្រឈមមុខនឹងបញ្ហាដូចគ្នា។ ទាំងអស់ហើយដែលជំរុញអោយរុស្ស៊ីត្រូវស្វែងរកទីផ្សារថ្មីសម្រាប់ថាមពលរបស់ខ្លួន ដើម្បីបង្កើនកំណើនសេដ្ឋកិច្ចដែលកំពុងប្រឈមនឹងបញ្ហា។ បើទោះបីជា លោក នារិន្ទ្រា ម៉ូឌីព្យាយាមពង្រឹងទំនាក់ទំនងជាមួយរដ្ឋាភិបាលក្រុងវ៉ាស៊ីនតោនក៏ដោយ ក៏ឥណ្ឌានៅតែបង្ហាញជំហរគាំទ្ររដ្ឋាភិបាលក្រុងម៉ូស្គូ និងបន្តពង្រឹងចំណងមិត្តភាពយ៉ាងរឹងមាំដែលធ្លាប់មានជាមួយគ្នាតាំងពីយូរអង្វែងណាស់មកហើយនោះ។
ក្នុងជំនួបរវាងមេដឹកនាំទាំងពីរកាលម្សិលមិញនេះ គេសង្កេតឃើញមានការចុះហត្ថលេខាលើកិច្ចព្រមព្រៀងជាច្រើនរួមគ្នា ហើយឥណ្ឌានិងរុស្ស៊ីបានឯកភាពគ្នាលើគម្រោងជាច្រើន ដោយរុស្ស៊ីនឹងផលិតឧទ្ធម្ភាគចក្រនៅក្នុងប្រទេសឥណ្ឌា ការអនុវត្តគម្រោងរួមគ្នាមួយស្តីពីវិស័យថាមពលនៅក្នុងតំបន់អាក់ទិក និង បន្តកិច្ចសហប្រតិបត្តិការសន្តិសុខផ្សេងៗទៀត។ តាមពិតទៅឥណ្ឌាត្រូវការរុស្ស៊ី ព្រោះប្រទេសនេះចង់បានការចែករំលែកនូវបច្ចេកវិទ្យាយោធា និង ត្រូវការអ្នកផ្គត់ផ្គង់ថាមពល ជាពិសេសឥណ្ឌាត្រូវការរោងចក្រនុយក្លេអ៊ែរសម្រាប់ប្រើប្រាស់នាពេលអនាគត។
ដោយឡែកមូលហេតុដែលរុស្ស៊ីព្យាយាមរឹតបន្តឹងចំណងមិត្តភាពជាមួយឥណ្ឌា បញ្ជាក់ថារុស្ស៊ីចង់បង្ហាញទៅកាន់ពិភពលោក ជាពិសេសលោកខាងលិចថា ខ្លួនមិនមែនស្ថិតនៅឯកោរលើឆាកអន្តរជាតិឡើយ។ យ៉ាងហោចណាស់បណ្តាប្រទេសជាច្រើនទៀតរីករាយគាំទ្រ និងបង្កើនទំនាក់ទំនងនិងចំណងការទូតជាមួយរុស្ស៊ី ជាពិសេសនោះគឺបណ្តាប្រទេសមហាអំណាចថ្មីរបស់សមាជិក BRICS មានប្រេស៊ីល ចិន អាហ្វ្រិកខាងត្បូង និងចិនជាដើម៕
© រក្សាសិទ្ធិដោយ thmeythmey.com